Mwe Misepela—Bushe Mukapita Ubwesho bwa Bucishinka bwa Bwina Kristu?

“TAUTONTONKANYA ulwa myendele ya bucisenene pamo ngo kubulwa bucishinka. Ulekwata fye umusamwe. Ca cine, nawishiba ukuti nga ca kuti abafyashi bobe nelyo baeluda baali no kwishiba cene, kuti calenga ukutobeka kwa mutima ne mpika ishingi. Lelo lintu ulekwata umusamwe, ucilikila fye yonse ayo amatontonkanyo.”

Umulumendo uwacambulwa nomba line fye ali natwalilila icibelesho ca mu bumfisolo ica bulalelale. Atungulwile ubumi bwa mbali shibili, ukubepa abafyashi bakwe ne cilonganino ca Bwina Kristu. Finono amwensekeshe pali ilya nshita ukuti alefilwa ubwesho bwa bucishinka bwa Bwina Kristu.

Amakana ya misepela ya Bwina Kristu balifilwa amesho yapalako aya bucishinka. Kabili te ca kupapa! Pantu, Satana Ciwa ‘alelwa’ na bantu ba kwa Lesa, ukucita apapela amaka yakwe ukutoba bumpofu bwabo. (Ukusokolola 12:17) Ukucilisha alicita imisepela ukuba ica kutontapo ca ‘milimo yakwe iya longolo.’ (Abena Efese 6:11, Kingdom Interlinear) Muli ifyo cifwaya ukubombesha kwine kwine no mupampamina pa kutwalilila aba cishinka.

Cinshi lyene cili bucishinka? Mu Malembo ya ciHebere, ishiwi lya lulimi lwa kutendekelako ilya “bucishinka” lilangilila ukulambatila kwabamo kutemwa ku muntu mu kuba ne mifwaile mu cilolwa. (Ilumbo 18:25) Talilondolola icikakilo cimo icanaka icingaputuka mu kwanguka lelo ukulambatila ukutwalilila ukutuntulu ukufikila imifwaile ya kuko mu kulundinkana no yo muntu yafikilishiwa. Mu Malembo ya ciGreek, ishiwi lya lulimi lwa kubalilapo ilya “bucishinka” lyakwatamo itontonkanyo lya bumushilo, ubulungami, nelyo ukushinshimuna.

Bucishinka muli ifyo bubimbamo ukwampana kwalungama na Lesa. Abena Efese 4:24 (NW) atweba “ukufwalo buntu bupya, ubwalengelwe . . . mu bulungami bwa cine na bucishinka.” Bushe ulefwaya ukuba uwa cishinka kuli Yehova? Lyene ufwile ukukusha ukulambatilako kwa bucishinka kuli wene, icikakilo cishingaputuka, umupampamina wa kumusekesha mu nshila shobe shonse. Ufwile ukulambatila ku fipimo fyalungama ifya kwa Yehova—te mulandu na fintu pambi cingabe tunko ukucita mu kupusanako!

Ukutitikisha ku Kuba Uwabula Bucishinka

Mu kutashiwa, abacaice abengi pa kati ka Nte sha kwa Yehova baletukuta ukutwalilila aba bucishinka, kabili balaipakisha kampingu wasanguluka pamo nge ca kufumamo. Umutumwa Paulo nangu ni fyo aseseme ukuti mu kati ka “nshiku sha kulekelesha,” ukubulwa bucishinka kwali no kwishibisha abantu mu cinkumbawile. (2 Timote 3:1, 2) Mu kayofi, imisepela imo iya Bwina Kristu balisuminisha ici calo cabulwa bucishinka ‘ukubafenenkesesha mu kumumunga kwa ciko.’ (Abena Roma 12:2, Phillips) Ni shani fintu Satana apwishishisha ici?

Ukutitikisha kwa banabo cibombelo cimo ica kufumamo cimo ica kwa Satana. Abantu abengi bafwaya ukutontonkanishiwapo bwino kuli bambi, kabili Satana alishiba ifya kwangala pali uku kufwaisha kwa cifyalilwa. Pa kufwaya ukumonwa pamo nga bonse, imisepela imo iya Bwina Kristu baliibimba mu kulanshanya kwabipa, imyendele ya bucisenene, ukupeepa, ukukolwa—nelyo fye ukubomfya bubi bubi kwa miti ikola—fyonse mu buseko bwa kupokelelwa na banabo.

Satana afwaya ifwe ‘ukwendauka mu lunkumbwa lwa mubili wesu, ukucita amafwayo ya mubili.’ (Abena Efese 2:3) Alishiba bwino ifyo ukutinta kwa lunkumbwa lwa kwampana kwa bwamba kwingabo kwa maka mu kati ka “kutemfuma kwa bwaice.” (1 Abena Korinti 7:36, NW) Kabili afwaya iwe ukunakila kuli ulo lunkumbwa. Imisepela imo iya Bwina Kristu mu kukanaishiba balangala mu minwe yakwe pa kulatamba ifitabo fya kulangisho bwamba, ifikope fisela, na ma video nelyo pa kubelesha ukusuko bwamba. Ifi fintu, mu kukonkapo, ilingi line fitungulula ku ncitilo shabipisha isha kubulwa bucishinka. Bushe icalo ca kwa Satana ‘calikufenenkesesha mu kumumunga kwa ciko’ muli shimo isha ishi ncende?

Ukutungulula Ubumi bwa Mbali Shibili

Ilintu ukucita ulubembu lukalamba pamo ngo bulalelale cili mu cine ceka mulandu wabipisha, imisepela imo ilakusha amafya ya iko. Bapala “abantu ba bufi,” abalandwa mwi Ilumbo 26:4, “abafisa cintu baba.” (NW) Imisepela ya musango uyo itungulula ubumi bwa mbali shibili, ukubomba inshila imo ilintu bali pamo na bafyashi babo nelyo Abena Kristu bambi abakosoka kabili inshila imbi lintu bali na banabo.

Ukutungulula ubumi bwa mbali shibili, nangu cibe fyo, cili kuicimfya we mwine kabili ca busanso. Incitilo shalubana ishabulo kucilimwa mupepi na lyonse shitungulula ku ncitilo shimbi ishalubana. Kabili ilintu kampingu wa umo kuti pambi asakamikwa pa kubalilapo, ubutali umo atwalilila mu ncitilo yalubana, e fyo na kampingu ya umo yankulako mu kucepelako ku ncitilo yalubana. Umo kuti mu cine cine ‘aleka ukumfwa ubukali’ bwa kucite calubana.—Abena Efese 4:19, Kingdom Interlinear.

Pali iyi nshita ciba icayafya mu kucishamo ukutumbula incitilo ya umo iyalubana no kukwata ukwaafwa. Ici ukucilisha cilabe fyo nga ca kuti imisepela imbi iya Bwina Kristu bali ababimbwamo mu cilubo. Amano yatungululwa bubi bubi aya bucishinka ilingi line yalacimfya. Umusepela wambwilwe pa kutendeka alondolwele ukuti: “Umwensekesha cintu ulecita, kabili wishiba ukuti cintu calubana. Pa kuti abantu bambi umo umo ababimbilwemo tabali mu bwafya, usumina ukukanaeba uuli onse.”

Lelo ilintu umo kuti pambi ‘afisa cintu ali’ ku bafyashi bakwe nelyo icilonganino, umo te kuti afise kuli Yehova. “Takuli icibumbwa icishimoneka ku menso yakwe; awe ifintu fyonse fyabo bwamba kabili fyalikupukulwa ku menso ya kwa uyo tuli no kulubululako.” (AbaHebere 4:13) Baibolo itwebekesha ukuti: “Uufimba pa fya bupulumushi fyakwe takashuke.” (Amapinda 28:13) Mu nshita icilubo cikasansalikwa. Umo te kuti fye acenjeleke Yehova. Amapinda 3:7 yatila: “Wiba uwa mano mu menso yobe we mwine, tiina Yehova, no kufuma ku bubi.” Ibukisha, na kabili, ukuti “amenso ya kwa Yehova yali mu ncende shonse, yalecefya ababi na basuma.”—Amapinda 15:3.

Umusepela ulumbwilwe pa mulu, capamo na bambi abafulilako ababimbilwe mu ncitilo yalubana iya mu bumfisolo, muli ifyo alisangilwe, kabili wene na banankwe bali no kutamfiwa ukufuma mu cilonganino ca Bwina Kristu. Pa numa balipolele lwa ku mupashi kabili balibweshiwe. Nalyo line, we nshila ulafya iya kwishibilamo ubupilibulo bwa bucishinka!

‘Ukukalulushanya’ na Lesa

Ni shani nga ca kuti umo kale kale alishininkisha ukuba uwabula bucishinka mu nshila imo, nakalimo pa kucita incitilo yalubana? Cintu cayanguka ukuitumpika umwine eka no kukaana ukukabila kwa kulungika imilandu. Umusepela umo uwaibimbile mu bulalelale mu bumfisolo atile: “Naingilisheko ubutumikishi bwandi ubwa mwi bala, ukutontonkanya ukuti ici mu nshila imo cali no kufimba icilubo.” Uluko lwapasuka ulwa kwa Israele mu musango umo wine lwaeseshe ukutalalika Yehova na malambo. Lelo Yehova alikeene ukuipeelesha kwa musango uyo ukwa bumbimunda. Abacincishe ukuti: “Sambeni, isangululeni, fumyeni ububi bwa micitile yenu pa mulola wa menso yandi, lekeni ukucito bubi.” Yehova aali no kupokelela amalambo yabo lyeka fye pa numa ‘bakalulushenye na wene.’ Cili cimo cine ilelo ku uli onse uwingabimbwa pambi mu ncitilo yalubana.—Esaya 1:11, 15-18.

Umo te kuti akalulushanye na Yehova pa kulanda fye mu nkama ku munankwe. Ku cintu cimo, abanobe tabapeela lyonse ukwaafwa kwawamisha, apantu ilingi line baba na bo bene abapelebela mu kubelesha mu bumi. Icacilapo kucindama, te kuti balekelele ulubembu lobe. Ni Lesa eka e wingacita ico. E co ‘pongolwela kuli wene ifya mu mutima obe’ mu kutumbula. (Ilumbo 62:8) Nangu cingati pambi kuti walengwe nsoni apakalamba isha myendele yobe, bo waebekeshiwa ukuti Yehova ‘alalekelela apakalamba.’—Esaya 55:7.

Ukakabila ukwaafwa kwalundwako. “Leka abafyashi bobe beshibe, leka baeluda beshibe ilyo line fye—pa kutendeka pene,” e fikonkomesha Umwina Kristu umo uwacaice uwamwenenemo ukufuma ku kwaafwa kwa musango uyo. Ee, abafyashi bobe napamo bali mu cifulo cisuma ku kukwaafwa. “Peelo mutima obe” kuli bene, ukuleka bene beshibe icipimo cakumanina ica mpika shobe. (Amapinda 23:26) Kuti bakutantikila ukupokelela ukwafwilisha kwalundwako ukufuma kuli baeluda ba mu cilonganino lintu ico cakabilwa.—Yakobo 5:14, 15.

Ukulangisha Bucishinka bwa Cine—Shani?

Kwena, kuti cacilishapo kuwama ukukanawila mu myendele yabula bucishinka mu cifulo ca kubalilapo. Ilumbo 18:25 (NW) litwebo kuti: “Ku wa bucishinka [imwe Yehova] mu kabomba muli bucishinka; ku wa mpomfu, umuntu wakosa mukabomba muli bumpomfu.” Yehova alapaala mu kufumba abo abasungilila muli bucishinka ifipimo fyasumbuka ifya myendele.

Kuliko inshila shimbi, nangu ni fyo, umo bucishinka bobe bwingabikwa ku bwesho. Ku ca kumwenako, tutile cibusa obe atendeke ukwenda mu nshila yapasuka. Bushe ukaleka bucishinka bwatungululwa bubi bubi kuli uyo cibusa ukufimbilikisha bucishinka bobe kuli Yehova? Icintu cabamo kutemwa ica kucita kuti caba kutununuka uyo cibusa no kumucincisha ukucita lipoti umulandu ku bafyashi bakwe nelyo kuli baeluda. Eba cibusa obe ukuti nga ca kuti wene umwaume nelyo umwanakashi tacitile fyo mu ciputulwa calinga ica nshita, uli no kucite fyo iwe wine. Amapinda 27:5 yatila: “Ukwebaula ukusoswa apabuuta kwawama ukucilo kutemwa ukwafisama.” Ku kwafwilisha cibusa obe muli iyi nshila, ulelangisha te bucine bweka ubwa bucibusa bwenu lelo na kabili ukushika kwa bucishinka bobe kuli Yehova.

Te mulandu ne fili ubwesho, ubukose ku kulangisha bucishinka bufuma ku kukwata ukwampana kwa pa lobe ukwakosa na Yehova. Ipepo lyabamo bupilibulo ne sambililo lya pa lwesu ilya mukoosha fili ifyakatama nga ca kuti tuli no kuipakisha ukwampana kwa musango uyo. Mu ca kusekesha, yonse imisepela abalufyenye abalumbwilwe mu kubangilila basumine ukuti amapepo yabo ne fibelesho fye sambililo lya pa lwabo fyabele cibelesho fye—kabili mu nshita fyalipwile. Yehova alekele ukuba uwa cine cine kuli bene, kabili imyendele yakowela yalikonkelepo mu kwangufyanya. Bushe iwe, kwi pepo ne sambililo lya pa lobe, ulekosha ukwampana kobe na Yehova pa kutwalilila uwa bucishinka?

Ca cine, pa nshita shimo kuti pambi wapapa nga ca kuti ulepuswako inshita isuma. “Inshita shimo cimoneka kwati abantu ba ku calo balekwato musamwe,” e fyasosele umukashana umo. “Lelo lintu waikatwa mu mibele, kuti wamone fyo te musamwe nangu fye panono.” Alanda ukufuma ku ca kukumanya, pa kuba uwabimbilwe muli bucisenene, ukufumamo ukwimita no kuponye fumo. “Ukuba mu cine ca kucingilila,” e fyo asosa nomba—isambililo asambilile mu nshila yakosa. Ilumbo 119:165 litucinkulako kuti “Umutende wingi ku batemwa amalango [ya kwa Lesa].”

E ico, bomba ukufika pantu wingapesha ukutwalilila uwa bucishinka. Bombela pa kukuula ukwampana kubelelela na Yehova. Pata icabipa no kulambatila ku cawama. (Abena Roma 12:9) Ilumbo 97:10 litwebo kuti: “Mwe batemwa Yehova, pateni ububi; alinde [myeo ya ba bucishinka, NW] bakwe, abapokolola mu minwe ya babifi.” Ee, pamo ngo musepela wa Bwina Kristu, ukamwenamo ukufuma ku kucingilila kwa kwa Yehova no kuipakisha ubumi bwa ciyayaya nga ca kuti wapita ubwesho bwa bucishinka bwa Bwina Kristu.