Bushe Uleibukisha?

Bushe walitesekesha ukubelenga ishafuma isha nomba line isha Ulupungu lwa kwa Kalinda? Cisuma, mona nga kuti wayasuka ifipusho fyakonkapo:

◻ Cishinte nshi cintu bakacema ba ku mupashi bakwata ku kubuula ukuitendekelako ku kukumanya abatamfiwa ku kumona nga ca kuti pambi kuti baseshiwa ku kulapila?

Nangu fye ilintu abena Israele baali muli bunkole kabili nalyo line ababulo kulapila, Yehova, ukupala kacema, abuulile ukuitendekelako ku kufwailisha bene, ukutuma bakasesema bakwe kuli bene. Bakacema ba Bwina Kristu baliba abasekelela mu kwaafwa abalapila abali bonse abengaba nge mpaanga shaluba. (Linganyeniko Luka 15:4-7.)—4/15, amabula 21-3.

◻ Ni shani icilangililo ca kwa Yesu ica mwana monaushi cilanga ifyo ukuyumfwa kwesu ne ncitilo filingile ukuba lintu umo abweshiwa mu cilonganino ca Bwina Kristu? (Luka 15:22-32)

Ubuyo bwesu bulingile ukuba ukupashanya wishi, uwalangishe insansa pa kubwela kwa mwana wakwe umonaushi. E ico, tulingile ukulanda mu kukakuka na munyina wabweshiwa no kutendeka ukumukoselesha ukucita ukulunduluka mu cine.—4/15, ibula 25.

◻ Fya kucilikila nshi fibomba fingabuulwa ku kusengauka ukuba icinakabupalu ca misoka?

Ilili lyonse lintu cingacitikako, sengauka ukwenda mu ncende sha busanso mu nshita ya bushiku. Fisa ifibekobeko fyobe, kabili sendela ifipe fya musango uyo pamo nga makamera mu cola ca kusendelamo. Ba uwacenjela pa lwa kwendela mupepi na kashila kanono, ukucilisha nga usendele umusango uuli onse uwa cola nelyo akacola kanono. (Moneni Amapinda 3:21-23.)—5/1, amabula 5-6.

◻ Mulandu nshi ubusesemo pali Sefania 2:3 busosela ukuti: “Napamo kuti mwabelama mu bushiku bwa bukali bwa kwa Yehova”?

Ipusukilo ku bumi lyashintilila pa busumino no kushipikisha. (Mateo 24:13) E ico, ni abo beka abalukila ku fipimo fya kwa Lesa no kutwalilila ukulanda ululimi lwine lwine e bakabelama mu bushiku bwa bukali bwa kwa Yehova. (Sefania 2:1, 2)—5/1, ibula 14.

◻ Cinshi cabimbwamo mu kubika Lesa intanshi mu bumi bwa lupwa?

Abafyashi na bana bafwile ukupepa Yehova no kwikalila umwabela ifipimo fyakwe nga fintu fyatantikwa muli Baibolo.—5/15, ibula 5.

◻ Mulandu nshi Yehova takandila ababifi mu kwangufyanya?

Umulandu umo uli wa kuti ishina lya kwa Lesa lifwile ukwishibikwa mwi sonde lyonse. (Linganyeniko Abena Roma 9:17.) Na umbi kusuminisha inshita ku kupwishishisha ifikansa fya bumulopwe bwa kwa Lesa na bumpomfu bwa muntu, ubo bwafumine mu kupondoka mu Edene. Na kabili, ukushishimisha kwa kwa Lesa kupeela abalufyanya ishuko lya mu nshita ku kulapila no kuwamya inshila shabo. (2 Petro 3:9)—5/15, amabula 11-12.

◻ Fishinka nshi fishininkisha ukuti Baibolo yaba ya ntulo yacila pa buntunse?

Baibolo yalembelwe na bakalemba bapusanapusana 40, abafumine mu nyendelo shonse isha bumi kabili abaikeleko pa ciputulwa ca myaka ukucila pali 1,600; nalyo line bonse aba bakalemba bakonkele umutwe wa kutendekelako umo. Uku kumfwana kwa mu kati ukwa Baibolo te kuti kucitikeko nga kwalekelwe ku mankumanya nelyo ukutungulula fye kwa muntu.—6/1, ibula 5.

◻ Mulimo nshi uweni kabili uwaba umbi umbi, uwasobelwe pali Esaya 28:21, untu Yehova akacita mu bushiku bwesu?

Ukusoka pa Ukusokolola 17:16 kulanga ifyo bacilende ba bupolitiki aba kwa Babiloni Mukalamba bushiku bumo bakamwalukila. Pamo nge ca kufumamo, Kristendomu akonaulwa umupwilapo pamo na mabutotelo yambi aya bufi. Iyi ikaba ni ncitilo iyeni iya kwa Yehova kabili umulimo wakwe uwaba umbi umbi ku nshiku shesu.—6/1, ibula 22-3.

◻ Cinshi cintu abanakashi ba Bwina Kristu balingile ukusunga mu muntontonkanya ukulosha ku kubomfya kwa fibekobeko ne fya kusubasuba?

Baibolo taibinda ukubomfya ifya kwafwilisha ukuyemba ifya musango uyo. (Ukufuma 32:2, 3; Estere 2:7, 12, 15) Lelo ukulinga kulingile ukubapo. Umwanakashi kuti mu kwanguka apashanya imisango ya ku calo, ukubomfya ifya kusubasuba pa kanwa ifyacishamo, ukupenta amasaya, nelyo ukupente nkopyo, nga fintu fye Yesebele acitile. (2 Ishamfumu 9:30) Ukusakamana kulekabilwa pa kuti ifya kusuba fya kuyemfya tafibomfiwe mu kucishamo kabili ifibekobeko fibomfiwe tafili fya mataki.—6/1, amabula 30-1.

◻ Ni shani fintu abena Israele bapusunswike ‘amalwele yonse ayabipa aya Egupti’ ayo ayaanene mu nshita sha mu kubangilila? (Amalango 7:15)

Mu kumonekesha balipusunswike intenda sha musango uyo apakalamba pa mulandu wa kubaka ifibelesho fya busaka ifyalunduluka ifyakambishiwe mu cipingo ce Funde.—6/15, ibula 4.

◻ Mulandu nshi Lesa abikile cipope ukuti abantu tabafwile ukulya umulopa? (Ukutendeka 9:3, 4; Ubwina Lebi 17:10, 11; Imilimo 15:22-29)

Ubumi ca bupe ukufuma kuli Lesa kabili ubumi bwa buntunse bwashintilila pa nsandesande shitungilila ubumi ishitwa umulopa. (Ilumbo 36:9) Pa kucindika umulopa nga uwaibela, abantunse balanga ukushintilila kwabo pali Lesa ku bumi. E co, umulandu ukalamba ku cipope ca kwa Lesa ukulosha ku mulopa wali, te mu kuti ukulya umulopa kuti kwaba ukwa busanso ku butuntulu bwa bumi, lelo ukuti umulopa walikwete ubupilibulo bwaibela kuli Lesa.—6/15, amabula 8-9.

◻ Ni shani fintu abafyashi ba Bwina Kristu ne misepela bengakosha ukupalishako kwa kuti ukukaana kwa mwana ku kukuushishamo kwa mulopa kukacindikwa?

Nangula mwi funde te mukalamba, umusepela wa Bwina Kristu alingile ukulondolola mu kulengama kabili mu kushangila cintu ukukaana kwakwe ukwakosa ukwa butotelo kuli ku kulya umulopa. Abafyashi kuti bakwata utushita twa kubelesha na bana babo pa kuti aba banonke ukwishiba mu kulondolola ukushininwa kwabo kwine.—6/15, ibula 18.

◻ Ni shani fintu abanakashi bapaalilwe apakalamba mu kati ka butumikishi bwa kwa Yesu ubwa pe sonde?

Yesu atendeke umulimo uyo waleteleko icisansamushi, isubilo, no mucinshi upya ku banakashi ba mishobo yonse. Asambilishe abanakashi icine ca ku mupashi icashika. (Yohane 4:7, 24-26) Mu kati ka butumikishi bwakwe, apokelele ukupyungila kwa banakashi ilyo aleenda ukupulinkana impanga. (Marko 15:40, 41)—7/1, amabula 14-15.

◻ Micenjelo nshi iya kusambilisha iya kwa Yesu intu abafyashi basanga iibomba na bana babo?

Abafyashi balacita bwino ukubomfya ifilangililo ku kulenga icine ca Bwina Kristu ukwipukisha ku mitima ya bana babo abacaice, kabili kuti babomfya amepusho yatontonkanishiwa bwino ku kwiluka cintu abana babo abakalamba baletontonkanya mu cine cine. (Linganyeniko Mateo 17:24-27.)—7/1, ibula 26.

◻ Mulandu nshi tulingile ukusupila icikuuku ca kutemwa?

Imibele ya cikuuku ca kutemwa itulenga ukutemwikwa kuli Lesa na kuli bambi. Ilasumbula icileela no kutulenga abacilapo ukulangulukilako. Ilakosha ifikakililo mu kati na nkati ka lupwa na mu cilonganino ca Bwina Kristu. Pa mulu wa fyonse, icikuuku ca kutemwa cilaleta ubukata kuli Yehova.—7/15, ibula 22.

◻ Mulandu nshi cingacitikilako ku Mwina Kristu ukulufiwa mu mulandu wa kubishanya? (1 Abena Korinti 15:33)

Umuntu kuti pambi amoneka uwa bucibusa no wasuminishiwa, lelo nga ca kuti takana ukwangwako kwa Bwina Kristu ku mulimo wa kwa Yehova nelyo fye tasumina muli Baibolo, wa kubishanya nankwe uwabipa. Mulandu nshi? Pa mulandu wa kuti ubumi bwakwe bwashimpwa pa fishinte fyapusana, kabili fintu ifyo fyakatama ku Mwina Kristu kuti fyakwata ubupilibulo bunono kuli wene.—7/15, ibula 23.

◻ Mulandu nshi Ubushiku bwa Bupingushi bwabela ni nshita ye subilo?

Ubushiku bwa Bupingushi ciputulwa ca myaka ikana limo. Bukatangililwa na Lesa umwine no Mwana wakwe, Kristu Yesu, uwasontwa kuli Lesa ku kubomba nga Kapingula. Iyi ikaba ni nshita ya kubwesesha ku muntu ubumi bwapwililika ubwa muntu buntu Adamu alufishe ku bufyashi bwakwe. (1 Abena Korinti 15:21, 22)—8/1, amabula 5-7.