Bushe Lesa Alasuka Amapepo Yobe?

“NSHATALA nkwatapo ukuyumfwa kwa kukwata amapepo yandi ukwasukwa,” e fyasosele umwanakashi uwikala mu Hokkaido, Japan. Muli uku kuloshako taba eka. Abantu abengi bayumfwa ukuti amapepo yabo tayatala ayasukwa. Na kuba, kuti pambi wasunguka nga ca kuti Lesa alasuka amapepo yobe.

Amamilioni balalungika amapepo yashingapendwa ku minshipendwa ya milungu. Mulandu nshi cimonekele fyo amapepo ayengi ifyo tayasukwa? Pa kusanga, natubale tubebete umusango wa mapepo yapepwa.

Finshi Fintu Bamo Bapepela?

Mu kati ka ciputulwa ca Mwaka Upya, ifiputulwa fibili muli fitatu ifya bwingi bonse ubwa bantu mu Japan, nelyo abantu bamo amamilioni 80, balapepa mu mfuba sha baShinto nelyo mu matempele ya baBuddha. Balapeela amakobili nge fya kuninika kabili bapepela ishuko lisuma no kucingililwa kwa lupwa.

Mu January na February—pa ntanshi fye ya mashindano ya kwingilila ayakakala—abasambi bakonkomokela ku mfuba ukupala ulwaba mu Tokyo ulwaishibikilwa kuli lesa wa luko uwa masomo. Balalemba ukufwaya kwabo pa maseleti ya mbao no kuyakobeka ku milando mu mansa sha mfuba. Mu kucepako 100,000 iya aya maseleti yayemfeshe incende yapindililwa iya lufuba lwaishibikwa mu Tokyo mu kati ka ciputulwa ca 1990 ica mashindano.

Amapepo ayengi yasanshamo ubutuntulu bwa bumi. Pa lufuba mu Kawasaki, Japan, abantu bapepela ukucingililwa kuli AIDS. “Ubupilibulo bwa kupepela ukulwisha AIDS,” e fyalondolwele shimapepo wa lufuba, “buli bwa kuti cikalenga abantu ukushilimuka mu myendele yabo.” Lelo bushe ico e conse cabako kwi pepo?

Pe tempele na limbi, umwanakashi umukoloci apepeele “imfwa ya kupumikisha.” Mulandu nshi? Pantu alefwaya ukusengauka ukucula ubulwele bwa mutatakuya kabili talefwaya ukube cisendo ku lupwa lwakwe.

Mu calo cimo iciitwa ica Bwina Kristu, umukalamba we bumba lya mupila wa ku makasa apepeele ukucimfya kwe bumba lyakwe no kucingililwa ukufuma ku kucenwa. BaKatolika mu Poland bapepela ubutuntulu bwa pa lwabo kabili balayemfya Madonna ne fibekobeko lintu bacetekelo kuti amapepo yabo yalomfwikwa. Abantu abengi bakonkomokela ku macalici pamo nga Guadalupe yalumbuka mu Mexico City, na Lourdes, mu France, ukupaapaatila ukundapa kwa fipesha amano.

Ku Kabanga nelyo ku Masamba, abantu balapepa amapepo pa milandu iingi kabili iyalekanalekana iya pa lwabo. Mu kukanatwishika, balafwaya amapepo yabo ukumfwikwa no kwasukwa. Nangu cibe fyo, bushe calibamo ukupelulula ukwenekela ukuti amapepo yonse yakasukwa mu kusenaminwa? Ni shani pa lwa mapepo yobe yene? Bushe yalasukwa? Na kuba, bushe Lesa alasuka fye na mapepo?