Cenjeleni Kuli Bakasesema ba Bufi!
ABAUPANA babili abena Brazil bali nabaya ku kusendama ubushiku lintu baumfwile abapuupu balebengilila mu ŋanda yabo. Aba baupana babili batiinishiwa bali na maka ya kufyuka ukupula pe windo lya muputule wa kusendamamo no kwita bakapokola. Lelo pa numa ya ico umukashi alipelenganishiwe ne cakukumanya ica kuti taali nakulala mu ŋanda kabili aile ku ŋanda ya kwa nyina.
Uuli onse uo iŋanda yakwe yabala aingililwapo nelyo uwaibilwa mu nshila imbi kuti amumfwilako bulanda. Icakukumanya ca musango uyo kuti caba ca kubongolola, kabili, ica kubulwe nsansa, abantu bafulilako balecula muli iyi nshila. Kwalibako, nangu cibe ifyo, umusango wa bupuupu ubwakwatisha ifya kufumamo fyabipisha.
Cinshi cili uyu musango wacilapo kubipisha uwa bupuupu, kabili ni bani bali abapuupu? Yesu Kristu alitupeele ifyebo fimo pa lwa cene lintu, mu kulanda ulwa kasuba kesu, asosele ukuti: “Bakasesema ba bufi abengi bakema, no kulufya abengi.” (Mateo 24:11) Bakasesema ba bufi bapuupu. Ni mu nshila nshi? Cinshi ico baleiba? Ubupuupu bwabo bumfwana no kusesema kwabo. E co pa kumfwikisha umulandu mu kukumanina, tulekabila intanshi ukwishiba cintu ukusesema kwaba ukulingana na Baibolo.
Cintu Cipilibula Ukusesema
Lintu watontonkanya ulwa kusesema, nakalimo icintu ca kubalilapo icisa ku muntontonkanya obe kusobela ulwa nshita ya ku ntanshi. Ici mu cine cine cali lubali lwa mulimo wa bakasesema ba kwa Lesa aba ku kale, lelo tawali e mulimo wabo ukalamba. Ku ca kumwenako, lintu aali mu cimonwa kasesema Esekiele aebelwe ‘ukusesema ku mwela,’ aali no kupeela fye ikambisho ukufuma kuli Lesa. (Esekiele 37:9, 10) Lintu Yesu aali pa kulubulula pa ntanshi ya bashimapepo, alifwishilwe amate no kupamwe ndupi, kabili bakapakasa bakwe mu kupumya basosele ukuti: “Tusesemene, we Kristu! Ni ani uwakuuma?” Tabaleipusha Yesu ukusobela inshita ya ku ntanshi. Balemusonsomba ukwishibisha ku maka ya kwa Lesa abo abamumine.—Mateo 26:67, 68.
Na kuba, itontonkanyo likalamba ilyapeelwa na mashiwi ya lulimi aya Baibolo aya ntanshi ayapilibulwa “sesema” nelyo “ubusesemo” mu kutendekelako yaba kushimika umuntontonkanya wa kwa Lesa pa mulandu nelyo, nga fintu ibuku lya Imilimo licibika, ukushimika “ifikalamba fya kwa Lesa.” (Imilimo 2:11) Ni muli aya mano e mo abantu abengi baleibilwa kuli bakasesema ba bufi.
Ni bani, nangula ni fyo, bali bakasesema ba bufi, kabili cinshi baleiba? Pa kwasuka ici cipusho, natuloleshe ku numa mu lyashi lya kale ilya luko lwa kwa Israele ku nshita ya kwa Yeremia.