Ifipusho Ukufuma ku Babelenga

AbaHebere 9:16 basosa ukuti uwacita icipingo afwile ukufwa pa kuti icipingo cibe icibomba. Lelo Lesa alicitile icipingo cipya, kabili tafwile. E co ni shani fintu twingomfwikisha ici cikomo?

Tubelenga pa AbaHebere 9:15-17 ukuti: “Kabili e ico [Kristu] aba kawiikishanya wa cipingo cipya, ukuti abaitwa bapokelele icilayo ca bupyani bwa muyayaya, ico kwali imfwa iyabalubula ku fya bumpulamafunde ifya mu cipingo ca ntanshi. Pantu ukwashiwo mulao, imfwa ya [wacita icipingo uwa buntunse] ifwile ukubikulwa. Pantu umulao utendeko kubomba ilyo papone mfwa; tawaba na maka nakalya ilyo [uwacita icipingo uwa buntunse] acili no mweo.”a

Yehova aba e Kapanga wa cine cine uwa cipingo cipya. Pali Yeremia 31:31-34, Lesa mu kulungatika asobele ukuti umwine aali no kucita icipingo cipya na bantu bakwe. Umutumwa Paulo ambula ili lembo pa AbaHebere 8:8-13, apalangilila ukuti Paulo alitesekeshe ukuti, mu kulandikisha, Lesa e watendeke ici cipingo ca bulesa.

Nangu cibe fyo, mu AbaHebere icipandwa 9, Paulo atwalilile ukulanda pa mbali shalekanalekana isho Yesu abombele mu kulosha ku cipingo cipya. Kristu aishile nga Shimapepo Mukalamba uwa ici cipingo. Ukufuma ku mimwene imbi, Yesu aali e lambo lya cipingo cipya; “mulopa wa kwa Kristu” weka fye e ‘wingasangulula bakampingu wesu ku milimo yafwa.’ Kristu na kabili aali e Kawiikishanya wa ici cipingo, nga fintu fye Mose aali kawiikishanya wa cipingo ce Funde.—AbaHebere 9:11-15.

Paulo alumbulwile ukuti imfwa yalekabilwa ku kulenga ifipingo pa kati ka kwa Lesa na bantunse ukubomba. Icipingo ce Funde caba ca kumwenako. Mose aali e kawiikishanya wa ciko, umo uwa kuletako uku kusuminishanya pa kati ka kwa Lesa na Israele wa cifyalilwa. Mose muli ifyo abombele ulubali lwakakala kabili aali e muntunse uwabombele na bena Israele lintu baleisa muli ici cipingo. Mose muli ifyo ali no kumonwa ngo wacita icipingo uwa buntunse uwa cipingo ce Funde ico icatendekwe na Yehova. Lelo bushe Mose aali no kusuumya umulopa wakwe uwa bumi ku cipingo ce Funde ukwisa mu kubomba? Iyo. Mu cifulo ca ico inama shalipeelwe, umulopa wa shiko ukupyana pa mulopa wa kwa Mose.—AbaHebere 9:18-22.

Ni shani pa lwa cipingo cipya pa kati ka kwa Yehova no luko lwa kwa Israele wa ku mupashi? Yesu Kristu alikwete ulubali lwakatama ulwa kuwiikisha, Kawiikishanya pa kati ka kwa Yehova no luko lwa kwa Israele wa ku mupashi. Nangu cingati Yehova e watendeke ici cipingo, catontele pali Yesu Kristu. Pa mbali ya kuba Kawiikishanya wa ciko, Yesu akwete imibombele ya kulungatika mu mubili mu kuba na abo abali no kutwalwa intanshi muli ici cipingo. (Luka 22:20, 28, 29) Mu kulundapo, aali uwafikapo ku kupayanya ilambo likabilwa ku kulenga icipingo ukubomba. Ili lambo talyali lya nama sha fye lelo ubumi bwa buntunse ubwapwililika. E co Paulo kuti alosha kuli Kristu nga uwacita icipingo uwa buntunse uwa cipingo cipya. Pa numa “Kristu [aingile] . . . mu mulu mwine, ku kumonekela nomba ku cinso ca kwa Lesa pa mulandu wa ifwe,” icipingo cipya calitendeke ukubomba.—AbaHebere 9:12-14, 24.

Mu kulanda ulwa kwa Mose na Yesu nga bacita icipingo aba buntunse, Paulo taletubulula ukuti umo uwa aba e watendeke ifyo fipingo, ifyo mu cituntulu fyacitilwe na Lesa. Ukucila, abo bantunse babili mu kubamo isenge balibimbilwemo nga bakawiikishanya mu kuletako ifyo fipingo. Kabili mu mulandu umo umo, imfwa yalekabilwa—inama ukupyana pali Mose, na Yesu ukutambika umulopa wakwe wine uwa bumi kuli abo ababa mu cipingo cipya.

[Futunoti]