Paulo Alolenkana na Plato pa lwa Kubuuka

UMUTUMWA Paulo alembele pa lwa kubuuka pali 1 Abena Korinti 15:38-58 na 2 Abena Korinti 5:1-10. Mu kucite fyo, bushe alikonkele imfundo sha mweo ushifwa isha kwa Plato na ba mano ya buntunse abaGreek, nelyo bushe aali mu kumfwana ne cisambilisho ca kwa Yesu ne ca malembo yambi ayashala?

Akatabo Immortality of the Soul or Resurrection of the Individual: St. Paul’s View with Special Reference to Plato, akalembelwe mu 1974 kabili akasuminishiwe na shikofu mukalamba uwa Greek Orthodox Church iya North na South America, kalapeela icasuko ca kusokolola. Pa numa ya kulanshanya umusango wa kubuuka mu malembo yalumbwilwe pa mulu no kusonga kwa kutumpuluka kwa ciHela ukwa pali ilya nshita, kalemba afika pa kusondwelela kwakonkapo ukuti:

“Plato asambilisha ukuti umweo utwalilila ukubako ukwabule mpela kabili ukwa muyayaya, ukufumyako umubili. Umweo kuli Plato waba lubali lwa bumunshifwa mu cifyalilwa kabili mu kutendekelako . . . Paulo Mutakatifu tasambilisha imimwene ya musango uyo atemwa ukucita ukutunga ukuli konse ukwa kucite fyo . . .

“Umutumwa Paulo tali uwayangwako na bumunshifwa bwa mweo nelyo umupashi nge fyapaatukana kabili nge filundwa fyapusana lelo mu kubuushiwa kwa mubili onse uwapikana uwa mweo no mupashi ifya muntu nge ca kufumamo ca kubuushiwa kwa kwa Kristu. Imfundo ya kwa Paulo iya musango wa mibuukile tayakwata icili conse ica kucita no kupupuutula kwa mibili yafwa ukufuma mu nshishi.

“Imfundo yakwe iya musango wa mibuukile pambi kuti yalumbululwa bwino ngo kwalula, ukulengwa cipya cipya, no kubweshiwa cipya cipya, ku maka ya kwa Lesa, aya kwikatana kwa muntu onse, ukwa muntu umo wine, ukwa buntu, iya ca mweo lwa ku muntontonkanya na ku mubili, imibele ya muntontonkanya ne ya ku mubili. Ukubuuka kwesu ukwa nshita ya ku ntanshi kukacitika te kuba nge cikwatwa cesu ica cifyalilwa, lelo nge ca bupe ca cifumu ica kwa Lesa.”

Ee, bumunshifwa te cikwatwa ca cifyalilwa ica muntunse uuli onse. Ukucila, caba ca bupe caumo mutengo kabili icabamo icikuuku ukufuma kuli Yehova ukupitila muli Shikulwifwe Yesu Kristu kuli abo abapanga icilonganino ca Bwina Kristu ica basubwa.—1 Abena Koronti 15:20, 57; Abena Filipi 3:14.

[Icikope pe bula 9]

Uwa mano ya buntunse umuGreek Plato

[Abatusuminishe]

Icikope ca Vatican Museum