Bushe Kwalibako Inshila ya Kufuminamo mu Mibele ya lubembu Iya Muntu?

MU KUBA na bana bakwe abapungwe bane, Chisako alewamya ifimbusu fya cintubwingi mu musumba amakilomita 600 ukufuma ku mwakwe. Ilintu alewamya, aleimba sutra, ubupilibulo ubo taleumfwikisha. Cali ni cimo ica fibelesho fye bumba lya butotelo ukufwaya ukusanga icaba pa ntulo ine ine iya mabutotelo yonse.

“Te mulandu no kutwalilila ifibelesho fya bumi bwakosa,” e fibukisha Chisako, “nshali no kwalula icifyalilwa candi. Pe samba lya mutima wandi, nshali no kulekelela bambi kabili nshali no kulangisha ukutemwa mu kuba ne nkuntu yafumaluka.”

Nelyo fye ni mu fyalo fya ku Kabanga, uko abantu abengi tabakwata imfundo ya lubembu nga fintu isambilishiwa muli Baibolo, abengi bayumfwa ukubipilwa kwa kampingu pa lwa kukongama kwabo ukwa lubembu, nge fyacitile Chisako. (Abena Roma 2:14, 15) Nani ushaculapo ukuyumfwa kwa kubipilwa pa kukanalanga icikuuku ku muntu umo uuli mu mibele ya kulengo bulanda nelyo uushayumfwapo ubulanda bwa kulengo kupopomenwa pa mashiwi ayo yashali no kulandwa? (Yakobo 4:17) Kabili bushe icingulungulu cabipa ica kalumwa tacafisama mu kati ka bacaice na bakalamba mu kupalako?

Mulandu nshi abantu bakwatila ukuyumfwa kwacushiwa ukwa musango uyo? Pa mulandu wa kuti, nampo nga balamwensekesha cene nelyo iyo, balikwata itontonkanyo lya lwa nkati ilya cilubo, ilya lubembu. Mu cine cine, nampo nga bantu baliba abaibukila ulwa cisambilisho ca Baibolo ica lubembu nelyo iyo, bonse balyambukilwako ku kukongama kwa lubembu. Incenshi pali uyu mulandu inshita imo asondwelele ukuti: “Bonse nababembuka, kabili bapelebela ku bukata bwa kwa Lesa.”—Abena Roma 3:23.

Bushe Ulubembu Kuti Lwafuutwa?

Abantu abengi ilelo, ukucilisha mu Kristendomu, bali abapamfiwa ukwesha ukufuuta ukuyumfwa kwa lubembu no kwa kuba aba mulandu ukufuma muli bakampingu wabo. “Ishiwi line ‘ulubembu’ . . . lyaba mupepi no kuluba,” e fyasosele Dr. Karl Menninger mu citabo cakwe Whatever Became of Sin? Nangu cibe fyo, ukusengauka ishiwi “ulubembu” takwaafwa nangu panono kwati fye fintu ukusengauka kwe shiwi “ubukote” ukwa mukoloci kushaafwa. Tulingile ukulolenkana ne cishinka ca kuti twalikwata ukukongama kwa lubembu kabili tukabila ukupokololwa ukufuma muli iyo mibele yapelelwa. Lelo kuli ani?

Umutumwa wa Bwina Kristu Paulo aipwishe ico cipusho pa numa ya kusumina ukukongama kwakwe kwine ku kucito lubembu te mulandu no kufwaya ukucita icapusanako: “Iye, ne muntu wa nkumbabulili ne! Nani akampokolola ku mubili uno uwa mfwa?” Paulo lyene atwalilile ukwasuko kuti: “Kube ukutootela kuli Lesa muli Yesu Kristu Shikulwifwe!” Mulandu nshi? Pa mulandu wa kuti Lesa atantikile ukulekelelwa kwa membu ukupitila mwi lambo lya cilubula ilya kwa Yesu.—Abena Roma 7:14-25.

Nangu cibe fyo, abengi aba mu bashili Bena Kristu aba mu calo 3,500,000,000 (imiku ibili impendwa ya betwa Abena Kristu) basanga imfundo ya cilubula iyayafya ukumfwikisha. Ku ca kumwenako, icifundisho ca cilubula cabele icilibwe cakulisha ica kuipununako ku Mushilamu uwikala mu Japan uwasambilile Baibolo pa nshita imo. Ku bengi abena Kabanga imfundo ya kuti umuntu umo kuti afwila bonse tayabamo amano.

Ici cili icaumfwika, apo nelyo fye ni bamo mu Kristendomu basanga ici cifundisho ca kutendekelapo ukuba icakosa ukumfwikisha. “Icisambilisho ca butotelo ica Kulubula,” e fyasumine New Catholic Encyclopedia, “mu mbali shimo caba icishafikwapo kabili citwalilila ukupeela impika mu masambililo ya fya butotelo.”

Icipimo ca cimfundawila pali ici cifundisho calangililwa bwino mu mashiwi ya kwa kalemba wa butotelo N. H. Barbour aya kuti: “Imfwa ya kwa Kristu tayacilile pa kuba fye ukupwishishisha kwa kukanda ukwa membu sha muntu ukucila pa kutunga pini ukupulinkana mu mubili wa kwa lunshi no kumulenga ukucula ne mfwa kwingalangulukwa ku mufyashi wa pe sonde ngo kupwishishisha kwabamo ubulungi ukwa cilubo cacepesha mu mwana wakwe.” Uwalebishanya na Barbour pali ilya nshita aali ni Charles T. Russell, uwamwene ukukabila kwe pamfya ukwa kucingilila icisambilisho ca cilubula. Alifumineko kuli Barbour kabili mu 1879 atendeke ukusabankanya magazini ipya, iyo pa numa iyaishileba magazini intu ulebelenga. Ukutula pa kutendeka kwa luko, Ulupungu lwa kwa Kalinda lwaliba ni kafwilisha we lambo lya cilubula ilya kwa Yesu Kristu.

Lelo bushe ici cifundisho kuti cabala acipokelelwa kuli abo abashaba ne cikulilo ca “buKristu”? Ku kusanga, natubebete mu kupalamisha ici cisambilisho ca muntu umo ukufwila bonse.