Ukulandila mu Ndimi—Icinjelengwe Cilekulilako

“AMAKA yamo yalamine ululimi lwandi kabili ifyebo fyalepongoloka fye kwati menshi. We buseko we fintu bwali! Kwaliko ukuyumfwa kwa kusanguluka kwacilishapo. Nshatala mba cimo cine ukutule lyo,” e fyapundile umo uwakwete ica kukumanya caibela ica kulandila mu “lulimi lushaishibikwa.”

Ubo buli bulondoloshi bwa muntu ubwa ca kukumanya cakwe ca kubalilapo ica kulandila mu “lulimi lushaishibikwa.” ‘Lelo bushe cinshi ico?’ e fyo bamo bengepusha mu kulungama. Cilelosha ku cibelesho nelyo icisumino mu macalici yamo umo abaume na banakashi baitunga ukuseshiwa no mupashi wa kwa Lesa ku kulandila mu ndimi isheni nelyo shimbi shimbi shintu bashaishiba.

Cinjelengwe ca butotelo icilekula. Icamwenwe pa nshita imo nga ica kucitika capaatulwa ica basumina muli buPentecostal, ukulandila mu ndimi nomba kuciluka imipaka ya fyakaniko fya butotelo ifya cishilano ku kusanshamo baBaptist, baEpiscopal, baLutele, baMethodist, baPresbyterian, na baRoma Katolika. Ifyo umuntu aba lintu ali muli iyi mibele calondololwa nga ukucilimuka, ukusakatuka, utulo tukalamba, kabili icilaalikisha. Bamo baciita fye no kuti ica kukumanya ca ciwowo. Kwaliba ukucebusha kwapesha amano kabili ukwa congolo ukwaampana no kulandila mu ndimi.

Mulandu Nshi wa Kufwaisha Ilelo Ica Bupe ca Ndimi?

Mu citabo cakwe Tongues of the Spirit, Cyril G. Williams atubulula ati kuti pambi kwabako “ukwampana pa kati ka kuyumfwa kwa kufilwa, no kufwaisha kwa ‘ndimi.’” Alondolola kwene nge mibombele ya kufuminapo iyakwata “ukukatama kwa maka ya kuposha pamo nga ica kunashako ukufinininwa” kabili “icipikulula ukukansana kwa lwa nkati.” Ukufulunganishiwa mu mulimo we calici, ukupopomenwa kwa mu nkuntu, ukufilwa mu mulimo wasobolwapo, ukufwilwa, ukutintana kwa pa ŋanda, nelyo ukulwala mu lupwa e filumbulwa nge fya kusangwilako ifilenga imilandile ya kucilimuka.

Mu kupalako, muli The Psychology of Speaking in Tongues, John P. Kildahl asoso kuti “ukusakamikwa e cifwaikwa ku kulundulula amaka ya kulandila mu ndimi.” Ukupitila mu kusapika kwa pa lwakwe no kwipusha kwa mu kusakamana, casangilwe ukuti “ukucila pali 85% iya balandila mu ndimi balikumenyepo ubwafya bwa kusakamikwa ubwamonekesha ukutangilila ukulandila kwabo mu ndimi.” Ku ca kumwenako, nyina umo afwaile ukulandila mu ndimi pa kuti engapepelako umwana wakwe umwaume uwalwele kansa. Umwaume umo atendeke ukulandila mu ndimi mu kati ka ciputulwa cakwe ica nshita ca kufilwo kupingulapo pa lwa kusumbulwa pa ncito ukwatambikwe. Umwanakashi umo atendeke ukulandila mu ndimi mu kati fye ka mulungu umo pa numa lintu umulume wakwe ailundile ku Alcoholics Anonymous (akabungwe akafwilisha abakunkuma ku fya kunwa fikola).

Cinshi Cintu Umo Akumanya?

Umbi uwalandile mu ndimi pa muku wa kubalilapo ashimike ati: “Naumfwile ukukaba umubili onse, no kutalala ne fimata fya libe, ukukanka no kucepelwa maka mu filundwa fyandi.” Icaampana ne ca kukumanya ca kulandila mu ndimi, kwalibako ilingi line imibele iyeni iyo bambi basanga ukuba iya kukalifya. Ku ca kumwenako, “umukashana umo apeene asakaminwe amate yakwe yene ilyo ayolwele pa mupando, umukoshi wakwe ukusaila ku numa ya uko, ifitende fyakwe pa nshi, amolu yakwe ayakosa.” Mu kati ka kukumana kwa cilonganino cimo “umwaume aile alewa kamfulimukonko ukufuma ku mpela imo iye calici ukuya ku ibiye.”

“Ku bantu bamo,” e fyalemba Profesa William J. Samarin, “ukulandila mu ndimi e cifwaikwa pa kubatishiwa mu Mupashi wa Mushilo.” Ukwabula cene, “balengwa ukuyumfwako nga abashapwililila.” Cimonwa na kabili “nga icasuko kwi pepo, ukwebekesha kwa kutemwa kwa bulesa no kupokelelwa.” Bambi balisosa abati cibasha no kuyumfwa kwa kwikatana ukwa lwa nkati, ubuseko, no mutende, kabili pamo no “kwiluka kwakulilako ukwa maka” no “kwiluka kwakoselako ukwa kwishibikwa.”

Bushe imilandile yacilimuka mu cine cine bushininkisho bwa kubomba kwa mupashi wa mushilo? Bushe ica kukumanya cilapusanya umuntu pamo ngo Mwina Kristu wa cine? Bushe ukulandila mu ndimi lubali lwa kupepa kwapokelelwa ilelo? Ifi fipusho fyawaminwa ifingi ukucila pa casuko ca mu lupita. Mulandu nshi? Pantu tufwaya ukupepa kwesu ukukwata ukusuminisha kwa kwa Lesa ne paalo.