Amabupilibulo ya Baibolo aya Cina Africa

Ukupilibula kwa mu kubangilila sana ukwa Baibolo onse ukutwala mu lulimi lwa cina Africa kwacitilwe mu Egupti. Ayaishibikwa nga amabupilibulo ya ciCoptic, yatontonkanishiwa ukukokola ukufuma ku mwanda wa myaka walenga butatu nelyo bune C.E. Mupepi ne myaka imyanda itatu pa numa, Baibolo yapilibwilwe mu ciEthiopic.

Imyanda ya ndimi ishishalembwa ishalelandwa ku kapinda ka ku kulyo aka Ethiopia na Sahara shali no kulolela ukwisa kwa bamishonari mu mwanda wa myaka walenga 19. Mu 1857 ica kucitika cikalamba califikilwepo lintu Robert Moffat apwishishishe ubupilibulo bwa Baibolo mu ciTswana, ululimi lumo ulwa ku Africa wabela ku kapinda ka kulyo. Kabili apulintile yene mu fiputusha pali mashini wa kupulintila uwa ku minwe. Iyi yali e Baibolo ya kubalilapo iyakumanina ukupulintwa mu Africa na kabili bwali e bupilibulo bwakumanina ubwa ntanshi mu lwali kale ululimi lushalelembwa ulwa cina Africa. Ku ca kusekesha, Moffat abomfeshe ishina lya bulesa Yehova mu bupilibulo bwakwe. Mu bupilibulo bwa 1872 ubwasabankanishiwe na British and Foreign Bible Society, ishina Yehova lyalibomfiwa mu fyebo fikalamba ifyalandilwe na Yesu nga fintu fyalembwa pali Mateo 4:10 na Marko 12:29, 30.

Ukufika mu 1990 Baibolo yakumanina yali naipilibulwa mu ndimi 119 isha cina Africa, mu kuba ne mbali shimo sha iko ukubako mu shalundwako 434.