Amapaalo ya Masomo ya ku Gileadi Yaanana mu Kusaalala kwa Calo
AMASOMO muli ici calo cikote yakwata fye umutengo wapelela. Apantu yashimpwa ukucilisha pa mfundo sha buntunse mu cifulo ca kushimpwa pa cine ca kwa Lesa, te kuti yapeele imifwaile ya cine mu bumi. Lelo Isukulu lya Gileadi lyalipusanako. Mu kulandapo kwakwe ukwa kwiswila pa kupwisha isukulu kwe kalasi lyalenga 93 ilya Gileadi, Theodore Jaracz uwe Bumba Litungulula alandilepo ukuti ili sukulu lipayanya amasomo mu kuba no kusupulwa kwa cine. Nga fintu Ilumbo 119:160 lisosa, “ukusupulwa kwa cebo [ca kwa Lesa] cishinka.” E fyo cali mu kuba no kucincimuka kukalamba uko ibumba lya bantu mupepi na 6,000 bakutike kuli programu ya kupwishe sukulu pa September 13, 1992.
Ilyashi lya kubalilapo ilya lucelo, ilyapeelwe na Lon Schilling uwa Komiti ya Watchtower Farms, lyakwete umutwe wa kuti “Twalilileni Ukucimfya Icalo na Kateka wa Ciko.” Munyina Schilling atontomeshe pa Ukusokolola 12:11 kabili alondolwele ukuti icikomo cilangisha inshila shitatu isha kucimfishamo: (1) ukupitila mu mulopa wa Mwana wa mpaanga, (2) ukupitila mu kucitilo bunte, na (3) pa kukwata umupashi wa kuipeela bulilambo. Acinkwileko abasambi ukuti abengi aba babomfi ba kwa Yehova balilangisha umupashi wa musango yo kabili balilolenkana fye ne mfwa mu kuitemenwa pa kuti bengabakilila bucishinka bwabo na bumpomfu.
“Cingilileni Icaseekeshiwa Kuli Imwe Icishaiwamina” wali e mutwe walundulwilwe na John E. Barr uwe Bumba Litungulula. Mwi shiwi lyakwe ilyaishibikilwa ku kukaba, alingenye ukuseekeshiwa kwa babili pa kati ka kwa Yehova na babomfi bakwe ku kuseekesha kulundululwa mu cupo cisuma. Ukubomfya ifishinka ukufuma muli 2 Timote 1:12, 13, acincishe abasambi ukucingilila icaseekeshiwa kuli bene pa kwikatilila mu kukatama “icipasho ca fyebo fituntulu” muli Baibolo. Akomaile pa kupanga isambililo lya pa lobe ukuba ulubali lwakatama ulwa kutantika kwa cila bushiku kabili mu cikuuku akonkomeshe abasambi ukukanaleka ukulandapo kwabo pa kulongana ukuba ukulandapo fye lelo lyonse ukupanga kwene ukwabamo ubupilibulo.
William Van De Wall uwa Komiti ya Dipartimenti ya Mulimo e wapeele ilyashi lyakonkelepo, “Langilileni Ukutemwa Kwabamo Ukwangwako ku Bantu Bapale Mpaanga.” Aipwishe abasambi cintu bengafwaya muli dokota wa lupwa kabili abakonkomeshe ukulundulula ukulangulukilako kumo kwine, icililishi, ne nkumbu ifyo bengakatamika.
Daniel Sydlik uwe Bumba Litungulula alandile mu kukaba pa mutwe wa kuti “Ifintu Fyonse Kuti Fyacitika Kuli Lesa.” Acinkwileko abasambi ukuti Abrahamu na Sara balisekele pa cilolelo calemoneka icishingacitikako ica kukwata umwana mwaume mu mushinku wabo uwa bukalamba. Ayengi aya malayo ya kwa Lesa yamoneka ayashingacitikako ukufuma ku mimwene ya buntunse; lelo nga fintu malaika aipwishe Abrahamu, “bushe kuli cintu icingapesha Yehova amano?” (Ukutendeka 18:14) Munyina Sydlik akonkomeshe abasambi ukulangisha icitetekelo mu maka ya kwa Lesa ku kucita ifishingacitika, ukukanaleka ico citetekelo ukushibantukila nelyo ukupungushima, te mulandu ne fya kwesha ifyo pambi bengakumanya.
Bakafundisha Batambika Ukufunda
Bakafundisha babili aba Gileadi e balandile mu kukonkapo. Uwa kubalilapo, Jack D. Redford alundulwile umutwe wa kuti “Ukupanga Ishina Lisuma na Lesa.” Icilenga ishina ukuba ilisuma nelyo ilibi, e fintu apelulwile, caba muntu uwakwata lyene. Acilenye amashina ya musango yo pamo nga Adamu, Nimrode, Yesebele, Shauli, na Yuda ku mashina ya musango yo pamo nga Noa, Abrahamu, Ruti, Paulo, na Timote. Ishina limo na limo lyakwata ifyalundanishiwako ifingi pa mulandu wa nshila ya bumi iya wakwete lyene. Aipwishe abasambi umusango we shina bengakwata imyaka 10, 100, nelyo fye 1,000 ukutula lelo—ilyo ilya ukwinda nelyo uuilishanya nelyo ilyo ilya kwa mishonari wa busumino? Tontomesheni pa kupikulula na pa mabuyo ukucila pa mpika, e fintu abafundile.
“Ni Shani Fintu Ucingilila Bwino Icitetekelo Cobe?” wali e mutwe wa kusonsomba uwalundulwilwe na Ulysses V. Glass. Alingenye icitetekelo cakosa kuli compass (ica kusontelela intunga) musuma uyo lyonse asonta ku ntunga yalungama. Compass muli motoka kuti ayambukilwa ku fintu fyakwata amaka ya kwikata pa mbali ya maka ye sonde aya kwikata, kabili ifyakwata amaka ya kwikata ifya musango yo filingile ukusundulwa. Mu musango umo wine, ici calo cikote cilaletako ukusonga ukwingi uko kwingapumbula nelyo ukunasha icitetekelo cesu nga ca kuti twakuleka ukucite fyo. Ilyo alesoka ikalasi ukulwisha ukusonga kwa musango yo, Munyina Glass na kabili alibatashishe pa mulandu wa kwibukila kwabo ukwayangufyanya ukwa mibele no kuyumfwa kwa bambi.
Ilyashi lya kulekelesha ilya lucelo lyapeelwe na Albert D. Schroeder, icilundwa ce Bumba Litungulula. Akoseleshe abasambi “Ukusungilila Umupashi wa Bumishonari,” ukubatasha pa kulangisha umupashi wa bumishonari umo wine nge fyacitile ikalasi lya kubalilapo ku numa mu 1943, lintu alebomba nga kalemba we sukulu. Alandilepo ukuti baali abasekelela mu bantu, bakashimikila mu cifyalilwa, abatemwa ukutungululwa no mupashi wa kwa Lesa. Twalilileni ukulundulula uyo mupashi, ukubomfya New World Translation mu kukumanina mwi sambililo lya pa lwenu, e fintu acincishe. Asondwelele mu kuba no kulanshanya kwa cikomo ne cikomo ukwa Ilumbo 24 nge ca kumwenako.
Mu kukonkapo, abasambi ba Gileadi babele abapwishe sukulu lya Gileadi! Balipeelwe badiploma babo ilyo ififulo fyabo ifya kubombelamo ifya bumishonari fyalebelengwa mu kupongomoka, mu kuba no kutoota ukwingi ukufuma kwi bumba.
Mu cungulo kasuba, Calvin Chyke uwa Komiti ya Fakitare atungulwile Isambililo lya Ulupungu lwa kwa Kalinda. Programu ya basambi iya kucincimusha yalikonkelepo, iyakumine ku fya kukumanya mwi bala mu kati ka kosi wa myeshi isano na kabili yalangishe amaslaidi ya fyalo fimo uko bapeelwe umulimo. Mu kulundapo, abaupana babili abacikoloci balipushiwe, kabili bayakene amano yamo no kubelesha banonkele ukufuma mu myaka yabo iingi nga bamishonari. Icungulo kasuba casondwelele mu kuba ne cilangililo calingana ne nshita icakwete umutwe wa kuti Mwilufiwa Nelyo Ukusenteka Lesa.
Ibumba lyafumineko ilyacankwa, ilyacincimushiwa pa kumona ifyo amasomo mu cine ca kwa Lesa yengacita kabili ababekwa pa kwishiba ukuti ubunonshi bwa masomo ya musango yo bukatwalilila ukumfwikwa mu kusaalala kwa calo. Ilyo aba bamishonari 48 balesalangana ku fifulo fyabo ifya kubombelamo, amapepo ayengi yalebakonka, ukulumbulula isubilo lya kuyumfwa kwa ku mutima no kucetekela ukuti aba aba busumino bakaba lipaalo ku bantu ba kwa Lesa konse kuntu baya.
[Akabokoshi pe bula 19]
Ukutantika kwe Kalasi
Impendwa ya fyalo fyaimininweko: 7
Impendwa ya fyalo fyapeelwe ukuyako: 18
Impendwa ya basambi: 48
Impendwa ya baupana: 24
Avareji wa myaka ya bukulu: 32.8
Avareji wa myaka mu cine: 15.3
Avareji wa myaka mu butumikishi bwa nshita yonse: 10.4
[Akabokoshi pe bula 20]
IKALASI LYATANUNUNWA ILYA GILEADI LYAPWISHE SUKULU
Pa June 21, 1992, ibumba lya bamishonari 24 balipwishishe isukulu ukufuma kwi kalasi lyalenga bune ilye Sukulu lya Gileadi Lyatanununwa mu Selters/Taunus, Germany. Ikalasi, ilyapangilwe na baupana 11 na bankashi abashimbe 2 ukutula mu fyalo cinelubali, lyakwete avareji wa myaka ya bukulu 32, imyaka ukutula pa kubatishiwa 14, ne myaka 8.5 iya mulimo mu mulimo wa nshita yonse uwa bukabila bwa mbila nsuma. Ukucila pali 2,000 balisangilwe ku kupwisha isukulu.
Munyina Jaracz aiswile programu mu kuba no kulanshanya kwa Amapinda 11:24, apalondolola ukuti: “Kuli uyo uusalanganya, lelo alelundapo.” Alandilepo ukuti abasambi bali mupepi no kusalangana kabili mu kushininkisha baali no kutuninkisha ukulunduluka.
Amalyashi ya mu malembo aya kukoselesha yalipeelwe kuli Richard Kelsey, kampanya wa Komiti ya Musambo wa Germany; Wolfgang Gruppe uwa Komiti wa Mulimo; Werner Rudtke na Edmund Anstadt, na bo bene ifilundwa fya Komiti wa Musambo; na bakafundisha babili, Dietrich Förster na Lothar Kaemmer. Albert Schroeder uwe Bumba Litungulula apeele ilyashi likalamba ilya kusekesha ilyakwete umutwe wa kuti “Twalilileni Ukuba Bakasapika ba Cuma ca ku Mupashi.” Akalume ka programu kali kupeela kwa mulimo ku fyalo 11 mu Africa, Central America, na Europe wa ku Kabanga, pa numa ya ico uwapwishe sukulu umo abelengele kalata kwi Bumba Litungulula ukufuma kwi kalasi ukulumbulula ukutasha kwa kuyumfwa kwa ku mutima.
[Icikope pe bula 18]
Ikalasi Lyalenga 93 Ilya Bapwishishe Isukulu lya Watchtower Bible School of Gilead
Mu mutande pe samba, imitande ipeelwe amanambala ukufuma pa ntanshi ukuya ku numa kabili amashina yatantikwe ukufuma ku kuso ukuya ku kulyo mu mutande umo umo.
(1) Hitesman, C.; West, P.; Evans, D.; Hipps, M.; Simonelli, N.; Wood, S.; Corkle, M.; Flores, C.; Thomas, J. (2) Jones, M.; Nissinen, J.; Sponenberg, M.; Zachary, K.; Ravn, G.; Backman, M.; Wettergren, A.; Evans, D.; Flores, R.; Caporale, G. (3) Simonelli, N.; Rechsteiner, M.; Rechsteiner, M.; Ruiz-Esparza, L.; Gerbig, B.; Simpson, C.; Zanewich, C.; Zachary, B.; Ricketts, L.; (4) Simpson, J.; Backman, J.; Corkle, G.; Gerbig, M.; Ricketts, B.; Bagger-Hansen, L.; Jones, A.; Zanewich, K.; Ravn, J.; Hipps, C. (5) Sponenberg, S.; Hitesman, A.; Caporale, L.; Ruiz-Esparza, S.; Thomas, R.; Bagger-Hansen, B.; Wood, M.; West, M.; Wettergren, C.; Nissinen, E.