Bushe Uleibukisha?

Bushe walipeelako itontonkanyo lyasakamanisha ku shafuma isha nomba line isha Ulupungu lwa kwa Kalinda? Nga ni fyo, pambi walacisanga ica kusekesha ukwibukishe fyakonkapo:

▫ Cinshi cili “icishibilo ca busuma” ico Yehova apayanishisha abakonshi ba mu nkasa sha kwa Yesu? (Ilumbo 86:17)

Cali ‘kusekelela mu mupashi wa mushilo’ e kwakoseleshe Abena Kristu ba kwamba ukushipikisha imisango yalekanalekana iya kupakaswa iyo yabaponene. (1 Abena Tesalonika 1:6) Cili cimo cine ilelo, kabili Yehova, Kapeela wa “ca kupeelwa conse icisuma ne ca bupe conse icafikapo,” aliba uwasekelela ‘ukupo mupashi wa mushilo ku bamulomba.’ (Yakobo 1:17; Luka 11:13) E co cili kusekelela kwa mupashi wa mushilo e kupayanishisha abakonshi ba kwa Yesu “icishibilo ca busuma.”—12/15, amabula 18-19.

▫ Mulandu nshi cabela icacindama kuli ifwe ukupokelela imimwene ya kwa Lesa pa kubepa?

Ilumbo 5:6 litila Lesa ‘akalofya abasoso bufi.’ Ukusokolola 21:8 mu kulundapo kusoso kuti impela ya ba bufi bonse ni “mfwa ya cibili.” E ico, ukupokelela imimwene ya kwa Lesa pa kubepa kutupeela umulandu wakosesha ku kulande cine na muli fyo ukupokelela ica bupe cakwe ica bumi.—12/15, ibula 23.

▫ Cinshi capangile umusango wa kupepa uwa cina Samaria? (Yohane 4:20)

Abena Samaria, mu kupepa kwabo ukwasaakana, bapokelele nga Amalembo amabuuku fye yasano aya kubalilapo aya kwa Mose, Pentateuch. Mupepi no mwanda wa myaka uwalenga ine B.C.E., baimike itempele pa lupili lwa Gerisimu, mu kucimfyanya ne tempele lya kwa Lesa mu Yerusalemu. Nangu ca kuti itempele lya bena Samaria lyalyonawilwe, ukufika kuli buno bushiku balakwata ukusefya kwa Kucilila ukwa cila mwaka pa Gerisimu.—1/1, ibula 25.

▫ Bushe Abena Kristu balafwaikwa ukwafwilisha incitilo sha kulwisha ukukowesha nelyo isha kusangulula?

Lintu aali pe sonde, Yesu taeseshe ukupikulula impika shonse isha fya kwangalila pamo isha mu kasuba kakwe. Lintu Yehova ukupitila mu Bufumu bwakwe ubwa buMesia abika mu kubomba ifishinte fyakwe ifyalungama pa cipimo ca mu cibulungwa, impika sha fyashingulukako shikapikululwa mu kubelelela. E ico, Inte sha kwa Yehova babuula imimwene yashikatala. Ukutemwa kwa mwina mupalamano wabo kubasesha ukulangisho mucinshi ku fipe fya bambi, lelo mu kulungama babika ukushimikila ubukombe bwa Bufumu bwa kwa Lesa intanshi. (Mateo 6:33)—1/1, ibula 31.

▫ Ni mu nshila nshi Yesu abombele nga kasenda wa lubuuto? (Yohane 8:12)

Yesu aipeeleshe umwine ku kushimikila imbila nsuma iya Bufumu bwa kwa Lesa. (Luka 4:43; Yohane 18:37) Kabili aletele pa bwelu ubufi bwa butotelo na muli fyo apayenye ubuntungwa bwa ku mupashi kuli abo abaiketwe mu busha bwa butotelo. (Mateo 15:3-9) Mu kupuulamo, ashininkishe ulubuuto lwa mu calo pa kubika ku mfwa ubumi bwakwe ubwa buntunse ubwapwililika nge cilubula. (Mateo 20:28; Yohane 3:16)—1/15, amabula 10-11.

▫ Milandu nshi imo intu twalila imisha ya kunakila kuli Yehova?

Yehova ni Mulopwe wa Kubumbwa konse, kabili pali uyu mulandu twalilye misha ya kunakila kuli wene. Na kabili, apantu Yehova aba uwa maka yonse, takuli nangu umo uwingakaanya wene mu kutunguluka, e co te kuti tusuule ukunakila kwesu kuli wene. Ifibumbwa fyonse ifyalamuka fyabumbilwe ku kubombela imifwaile ya kwa Kalenga wa fiko, kabili ici cibika bonse pe samba lya kukakililwako kwa kuinashisha abene kuli Lesa mu mbali shonse.—2/1, amabula 10-11.

▫ Cinshi cayafwile Yosefe ukucincintila ukucita ubulalelale na muka Potifari?

Yosefe alikwete amaka yaletuninkisha mu muntontonkanya wakwe. Aali uwaibukila ulwa kwampana kwakwe na Yehova kabili alitesekeshe ukuti incitilo ya bulalelale yali no kuba kubembukila te mulume wakwe fye lelo, icacilanapo kucindama, kubembukila Lesa.—2/15, ibula 21.

▫ Cinshi cintu Yesu apilibwile lintu asosele ukuti: “Nine . . . cine”? (Yohane 14:6)

Yesu talandile fye no kusambilisha icine; aikele no kupashanya cene. Muli fyo, ubuKristu tabuli fye ni mfundo; buli ni nshila ya bumi.—3/1, ibula 15.

▫ Lisambililo nshi ilya kusansamusha ilisangwa mwi Ilumbo 51?

Ili lumbo litwaafwa ukwiluko kuti nga ca kuti twawila mu lubembu lelo tuli mu cine cine abalapila, Shifwe wa mu muulu uwa kutemwa akomfwa ukukuuta kwesu ukwa nkumbu no kutupususha ukufuma ku kupelelwa. Nangu cibe fyo, tulingile ukwangwako apakalamba pa lwa museebanya uuli onse uwaletwa pe shina lya kwa Yehova.—3/15, ibula 18.

▫ Cinshi caimininwako no lubatisho lwa mu menshi?

Ulubatisho luli cishibisho ca ku nse ica kuipeela kwa umo kuli Yehova Lesa. Ukutumpikwa pa nshi ya menshi kulangililo kuti abo abalebatishiwa balefwa ku nshila yabo iya bumi iyashimpwa pa bene. Ukwimishiwa ukufuma mu menshi kulangilila ukuti bali abomi nomba ku kucito kufwaya kwa kwa Lesa, ukukubika ukwa ntanshi mu bumi bwabo. (Mateo 16:24)—4/1, ibula 5-6.