Ifipusho Ukufuma ku Babelenga
Bushe kuti caba icalinga ku Mwina Kristu ukwingila mu bukwebo no ushatetekela, apantu Baibolo itweba ati: “Mwiba aba kwi koli limo na bashatetekela”?
Tusanga uko kufunda pali 2 Abena Korinti 6:14-16: “Mwiba aba kwi koli limo na bashatetekela; pantu ubulungami no bupulumushi kuti fyayampana shani? napamo ulubuuto ne mfifi kuti fyakwate senge shani? Kabili kuli ukuumfwana nshi kuli Kristu na Beliali? napamo ukulingana nshi ku watetekela no ushatetekela? Kabili kuli ukusuminishanya nshi kwi tempele lya kwa Lesa no tulubi?”
Takuli umulandu wa kucetekelo kuti umutumwa Paulo apeele uku kufunda mu kuba no bufwayo bwa kwimika ifibindo fya kulungatika, pamo ngo kulwisha ukuba mu bukwebo kwa Mwina Kristu no ushatetekela. Nalyo line, ukufunda kwakwe mu kushininkisha kulabomba pali ico, pamo pene na mu mbali shimbi isha bumi.
Paulo alembele uko kufunda kuli bamunyina ba Bwina Kristu mu Korinti wa pa kale. Apo baleikala mu musumba uwali ukucilisha uwabola, baali no kulwishanya na masanso ya mu mibele na ya ku mupashi pe fye. Nga tabali abasakamana, ukuisansalika ku kusonga kushawama panono panono kuti kwanasha ukupampamina kwabo ukwa kuba abantu bapusanako, “ulupwa ulwasalwa, bushimapepo bwa bufumu, uluko lwa mushilo, abantu abo aikwatila.”—1 Petro 2:9.
Ilyo ashilalemba ifimoneka pali 2 Abena Korinti 6:14-16, Paulo aali nabomba ne mpika yabipisha pa kati ka bamunyina ba mu Korinti. Baali nabasuminisha umulandu wa bucisenene bwabipisha ukutwalilila pa kati kabo, e ico Paulo abakambishe ukufumya, nelyo ukutamfya, umubembu ushalapila. (1 Abena Korinti 5:1) Ukubifya kwa uyo muntu kwalangishe ukuti ukubishanya kubi nelyo ukuyobekamo kwabulo kulamwa mu mibele ya ku calo kuti kwaambukila Abena Kristu.
Abena Kristu ba mu Korinti baali no kusengauka ukubishanya no muntu watamfiwa, lelo bushe ico capilibwile ukuti balekabila ukuipaatulako umupwilapo ukufuma ku bashatetekela? Bushe baali no kusengauka mupepi no kwampana konse nelyo ukubomba na bashali Bena Kristu, ukusanguka kwati musango wa cakaniko ca butukami, ukupala abaYuda abaleya ku kuba beka ku Qumran mupepi na Bemba Wafwa? Lekeni Paulo asuke: “Pali kalata wandi namulembele ukuti mwiyampana na ba bulalelale; nshaloseshe ba bulalelale ba pano isonde iyo, . . . ninshi lyene muli no kufuma pano isonde.”—1 Abena Korinti 5:9, 10.
Ukutubulula kwa ayo mashiwi kuli ukwamonekesha. Paulo alimwensekeshe ukuti Abena Kristu baali bacili pali uno planeti, ukwikala pa kati kabili ukukwata ukwampana kwa cila bushiku na bashatetekela abo imibele yabo yali iya pa nshi kabili abo ifipimo fyabo fyali ifyapusanako. Apantu ico mu kutendekelako cali icishingasengaukwa, Abena Kristu baali no kuba abaibukila ulwa masanso ya kwampana kwa musango yo.
Nomba lekeni na kabili tulanguluke kalata wa cibili uwa kwa Paulo ku bena Korinti. Alondolwele ukuti Abena Kristu basubwa balifikapo ukuba bakapyunga ba kwa Lesa, inkombe sha kwa Kristu. Abebele ukuibaka ku kuba ica kupunwisha ico pambi icingalenga bukapyunga bwabo ukumonwa ubwabipa. (2 Abena Korinti 4:1–6:3) Paulo acincishe bamunyina abena Korinti mu kulungatika, abali nga bana bakwe aba ku mupashi, ukukushako icitemwishi cabo. (2 Abena Korinti 6:13) Pa numa ya ico acincishe ukuti: “Mwiba aba kwi koli limo na bashatetekela.” Abomfeshe ukucilanya kwalongoloka ukwakonkana ku kwebekesha ico cishinka.
Amashiwi yashingulukako yalangisha ukuti Paulo taletontomesha pa lubali lumo ulwa kulungatika ulwa bumi, pamo ngo bukwebo nelyo ukwingile ncito, no kwimika ifunde lya lyonse ilyali no kupampaminwa muli uko kuloshako. Ukucila, alepayanya ukufunda kwasaalala, ukusuma, ukwabamo ukwaafwa kuli bamunyina abo atemenwe cibi.
Bushe uku kufunda kuti kwabomba, ku ca kumwenako, mu mulandu wa Mwina Kristu uuli uwasekelela mu cupo? Mu kushininkisha. Muli kalata wakwe uwa kubalilapo, umutumwa afundile abena Korinti balefwaya ukuupa ukucite co “muli Shikulu epela.” (1 Abena Korinti 7:39) Akomaile pa kubamo amano kwa ayo mashiwi ku cintu alembele pa numa, nga fintu calondololwa pali 2 Abena Korinti 6:14-18. Nga ca kuti Umwina Kristu aali no kulanguluka ukuupana na umo uushali umubomfi wa kwa Yehova kabili uushili umukonshi wa kwa Kristu, wene kuti alelanguluka ukulundana no ushatetekela. (Linganyeniko Ubwina Lebi 19:19; Amalango 22:10.) Mu kumfwika, ukukanalinga mu kupalako kuti kwaletako impika, ukusanshako isha ku mupashi. Ku ca kumwenako, uushasumina kuti pambi pali ino nshita nelyo mu nshita ya ku ntanshi akonkelela ukupepa kalesa ka bufi. Paulo apelulwile ukuti: “Kuumfwana nshi kuli Kristu na Beliali?”
Ni shani, nangula ni fyo, pa lwa lubali na lumbi ulwa bumi—ukwingila mu bukwebo no ushatetekela? Mu milandu imo Umwina Kristu kuti pambi ayumfwa ukuti ukusanga ubwikalo no kusakamana ulupwa lwakwe kwafwaya ukwingila mu kwampana kwa bukwebo no muntu ushili Mwina Kristu munankwe. (1 Timote 5:8) Langulukeni ifili fye fya kumwenako:
Umwina Kristu kuti pambi afwaya ukutendeka ubukwebo bwa kushitisha umutundu umo uwa fipe, lelo inshila yeka fye ili kupokelela ukwampana no muntu uwishibe ifya kukwata ifipe filekabilwa nelyo indalama. Umwina Kristu umbi alefwaya bushimafarmu (nelyo ukuteeka umusango umo uwa fiteekwa); lelo takuli impanga, e co ali no kubomba mu kulundana na umo uuitemenwe ukumwashimisha impanga ku kwakana icibwesha icili conse. Napamo Umwina Kristu na umbi tali na maka ya kwingila mu bukwebo bwa kubika imipaipi ya menshi pantu Kaisare apeela fye balasenshi banono, kabili balipeelwa kuli bambi kale kale; inshila ya kwingilamo kuti yaba fye kuilunda kuli lupwa uushatetekela uwakwata lasenshi.—Marko 12:17.
Ifi fili fye filangililo. Tatuleesha ukufumyapo ukucitikako konse, kabili tatuleesha ukucita ukulandapo ukuli konse ukwa kusuminisha nelyo ukukaanya. Lelo mu kuba ne fi ifya kumwenako mu muntontonkanya, bushe te kuti mumone umulandu ukufunda pali 2 Abena Korinti 6:14-18 kushilingile ukusuulwako?
Umwina Kristu uwaingila mu bukwebo no ushatetekela, nampo nga ni lupwa nelyo iyo, kuti pambi akumanya impika shishaenekelwa na matunko. Nakalimo uyo uwa kwampana nankwe wa bukwebo kuti asondwelela ukuti inshila ya kupangilamo icibwesha cisuma kukanacita lipoti ishifolwa shimo nelyo ukwingisha ababomfi ukwabula ukubalemba, nelyo fye ico nga caletoba amafunde ya kamfulumende. Kuti pambi alefwaya ukulalipila abalete fipe mu bumfisolo pa fipe ifishilangilwe pali lisiti wa kushitilapo. Bushe Umwina Kristu kuti akwata ulubali muli uko kubulwo bufumacumi nelyo ukwapalako? Kabili cinshi Umwina Kristu engacita nga caisa ku nshita iyo bonse babili balesaina amapepala ya misonko nelyo ifipepala fimbi ifya mwi funde pa lwa fintu bacita ubukwebo bwabo?—Ukufuma 23:1; Abena Roma 13:1, 7.
Nelyo uwa kubishanya nankwe uwa bukwebo uushatetekela kuti pambi afwaya ukulete fipe fya kushitisha ifyayampana na maholide ya cisenshi, ukutuma amakardi ya maholide mwi shina lya kampani, nelyo ukuyemfya ubukwebo ku kubaka amaholide ya butotelo. Paulo aipwishe ati: “Kuli ukusuminishanya nshi kwi tempele lya kwa Lesa no tulubi? Pantu ifwe tuli itempele lya kwa Lesa wa mweo.” Fintu kuli ukwalinga ukulandapo kwa kuti: “E ico fumeni mwi bumba lyabo, mupaatukeko,” e fyo asosa Yehova, “kabili mwiikatako ku cishasanguluka; na ine nkamusekelela”! (2 Abena Korinti 6:16, 17) Mu kubomfya uko kufunda kwa mano, Abena Kristu abengi balisalapo imisango ya ncito ya ku calo iyo iingabasansalika ku mpika shingenekelwa ishinono nga nshi.—AbaHebere 13:5, 6, 18.
Icilonganino tacakambishiwa ukusopa nelyo ukufwailisha fyonse ifyo Abena Kristu bacita mu ncito yabo iya ku mubili, nampo nga baingile ncito nelyo abene ba makwebo. Kwena, nga caishileishibikwa ukuti Umwina Kristu ali ulubali mu kucite fibi, pamo ngo kusumbula ukupepa kwa bufi nelyo umusango umo uwa kubepa nelyo ukwiba, icilonganino cili no kubuula intampulo ku kwikatilila ifipimo fya kwa Yehova.
Inkonta, nangu cibe fyo ili ya kuti, ukufunda kwa kwa Paulo ukwapuutwamo ukwa kuti, “Mwiba aba kwi koli limo na bashatetekela,” kuti kwaafwa Abena Kristu ukusengauka impika ne ncitilo ya bupingushi iili yonse iingakabilwa. Abena Kristu ba mano bakomfwila uko kufunda no kukanasala ukwingila mu mibele iyo bakaba pe samba lya kutitikisha kwalundwapo ukusuusuka ku fishinte fya Baibolo. Nga ca kuti umo aleyumfwa ukuti afwile ukwingila mu bukwebo no ushatetekela, bambi tabalekabila ukususwa ukumupingula atemwa ukumulengulula, ukwishiba ukuti akasenda ukushingamwa pa kusala kwakwe. Mu kutendekelako, Paulo taleimika ifunde lya lyonse, ilingapampamikwa ukulwisha ukwingila mu bukwebo no ushatetekela. Nalyo line, ukufunda kwakwe takulingile ukusuulwako. Lesa apuutilemo uko kufunda kabili akwete kwene ukulembwa muli Baibolo ku kunonkelamo kwesu. Tucita bwino ukumfwila kwene.