Inte sha kwa Yehova Ukushinguluka Icalo—Ripabuliki wa Philippines

IFISHI fyakaba ifya milundubwe 7,083 ifyapanga Ripabuliki wa Philippines fyaba lubali lwasansama ulwa lupili lwa munkulinkuli ulwaibila lubali.a Kabili abekashi 62,000,000 ba mu Philippines balitemwa ukulanshanya mupepi na pa mutwe uuli onse. Uyu mupashi wa bucibusa ufumamo ibala lyafunda ilya kucitilo bunte kwa Bufumu.

Ukucitilo Bunte mu Sukulu

Pa cishi ca Masbate, umusambi wa pa sukulu lya ku sekondari ali na maka ya kucitilo bunte kuli kafundisha wakwe ne kalasi mu kati ka bwile bwa kwasuka cine nelyo bufi. Ashimika ukuti:

“Icipusho cali ca kuti, ‘Nga ca kuti Lesa alintemwa, te kuti ampeele impika nelyo ukunsuminisha ukucula.’ Lintu kafundisha wandi abebetele amapepala yesu, asangile ukuti bonse bayaswike ati cine ukufumyako fye ine. Kafundisha wandi ansuminishe ukulondolwela ikalasi umulandu nayasukile ati bufi. Nasosele ukuti te Lesa uutupeela impika, nangu ca kuti alasuminisha ukucula no kutusuminisha ukweshiwa. Ukubomfya Baibolo wandi, uyo nsenda lyonse ku sukulu, napelulwile ne kalasi pa mashiwi ya pali 1 Yohane 4:8, ‘Lesa kutemwa.’ Pa numa ya kulondolola kwandi, kafundisha wandi alishininwe, apampanshishe pe deski lyakwe, no kusoso kuti: ‘Marilou nalungika.’ Nali fye nine neka uwayaswike mu kulungika ici cipusho kabili napokelele amatoni yasumbukisha.”

Ubukombe bwa Bufumu Bwaba Mpanga Yonse

Ilintu alebomba ubutumikishi bwa ku ŋanda ne ŋanda mu lubali lumbi ulwa Philippines, painiya wa nshita yonse (kabilisha wa nshita yonse uwa mbila nsuma) akumenye nyina wa bana banono batatu. Umwanakashi alangile ubuseko bwaswatuka mu bukombe bwa Bufumu, kabili ici calengele cene ukuba icayanguka ukutampa isambililo lya Baibolo na wene. Nangu ca kuti umulume wakwe tasekelele pa kuti umukashi alesambilila Baibolo, ukucilisha ukufuma ku Nte sha kwa Yehova, isambililo lyalitwalilile.

Umwaume akuushishe ulupwa lwakwe ku musumba umbi, ukutontonkanya ukuti ici cali no kupwisha ukubishanya kwa mukashi wakwe ne Nte. Ilyo pashilalepa, nangu cibe fyo, Inte basangile uyu mwanakashi no kutendeka cipya cipya isambililo lyakwe ilya Baibolo. Ukwabulo kutwishika, umulume wakwe alifulilwe nga nshi. Aile nakalipa ku ncito, uko abubukile umuntu uo alelungishisha motoka. Umwaume taishibe ukuti uyu muntu waletele motoka ku kulungisha ali ni umo uwa Nte sha kwa Yehova.

Nte alondolwele ifyo kuti caba ca kunonsha nga nshi ku lupwa lonse nga ca kuti umukashi wakwe alitwalilile isambililo lyakwe ilya Baibolo. Kuti atampa ukubomfya ifishinte fya Baibolo ukutendeka mu ŋanda mwine. Na kabili calitubulwilwe ukuti umulume umwine kuti anonkelamo pa kusambilila pa lwa Bufumu bwa kwa Lesa.

Cinshi cafumine muli uku kulanshanya? Umukashi wa ulya mwaume alikwete ubuntungwa bwafulilako ubwa kusambilila Baibolo, kabili umulume apingwilepo ukubwesesha ulupwa lwakwe ku ŋanda yabo iya kale. Kulya umwanakashi acitile ukulunduluka kwa ku mupashi ku cipimo ca kuba kasabankanya wa Bufumu uushabatishiwa. Umulume wakwe na o apokelele isambililo lya Baibolo, kabili ulupwa lonse lwatendeke ukusangwa ku kulongana kwa Bwina Kristu.

[Futunoti]

[Akabokoshi pe bula 8]

UKULONDOLOLA IMIBOMBELE YA CALO

Umwaka wa Mulimo uwa 1993

IMPENDWA YA PA MUULU ABALECITILO BUNTE 116,576

ICIPIMO Nte umo kuli 549

ABASANGILWE KU CIBUKISHO 357,388

AVAREJI WA BAKASABANKANYA BAPAINIYA 22,705

AVAREJI WA MASAMBILILO YA BAIBOLO 94,370

IMPENDWA YA BABATISHIWE 7,559

IMPENDWA YA FILONGANINO 3,332

IOFESI LYA MUSAMBO MANILA

[Icikope pe bula 9]

Ukucitilo bunte kwa pa mushiika kuletako ifya kufumamo fishaiwamina

[Icikope pe bula 9]

Iofesi lya musambo wa Watchtower Society mu Manila