Ukubungana kwa Cilye Ukwa Mabutotelo ya mu Calo—Bushe Kukatunguluka?

IMYANDA ya ntungulushi sha butotelo balilongene pa Kubungana kwa Cilye ukwalenga bubili ukwa Mabutotelo ya mu Calo ukwacitilwe mu Chicago, Illinois, U.S.A., mu lusuba lwa 1993. UbuBuddha, Kristendomu, ubuHindu, ubuYuda, no buShilamu bonse bwalimininweko. Aba buŋanga na bakapepa ba balesa banakashi na bo bene eko bali. Balanshenye ulubali lwabo mu kupwisha inkondo. Ceyamani wa kubungana kwa cilye asumine ukuti “ifiputulwa fibili muli fitatu ifya kukansana kukalamba ukwa mu calo ilelo fibimbamo amabutotelo.”

Imyaka Umwanda Umo Iyapitapo

Bushe ukubungana kwa cilye kwalitungulwike? Lolesha pa cacitike imyaka umwanda umo iyapitapo pa Kubungana kwa Cilye ukwa Mabutotelo ya mu Calo ukwa kubalilapo. Na ko kwine kwacitilwe mu Chicago, mu lusuba lwa 1893, kabili ukucila pa mabutotelo 40 yalimininweko. Icilye ca Kubungana kwa Mabutotelo ya mu Calo cisumino kuti abo abasangilweko mu 1893 “basumine ukuti kwali no kuba ukwa kubalilapo mu kukonkana kwa kukolongana kwa pa kati ka nko ukwa kukumbinkanya ifisumino uko kwali no kusangwilako ku kumfwana, umutende no buyantanshi. Te fintu cali. Ukukanasuminisha ukuilumbulwila kwa butotelo no lukaakala fyaliba lubali lwa nkondo sha myaka yapitapo 100, kabili fitwalilila ukube fyo ilelo.” Mulandu nshi uwa kufililwa? Pa mulandu wa kuti imfundo yonse iya kukumbinkanya ifisumino tayasuminishiwa kuli Lesa. Baibolo itila: “Mwiba aba kwi koli limo na bashatetekela.”—2 Abena Korinti 6:14-17.

Mu kulingisha, iyafumine iya September 1893 iya Zion’s Watch Tower yaebekeshe ukubulisha ukutungilila kwa mu Malembo ukwa Kubungana kwa Cilye ukwa Mabutotelo ya mu Calo lintu lwasosele, mu kubamo imitumfyo aluti: “Balishula imibungi yakangwa iye bumba iyawama iingi ukufuma mu fitantala fya Babiloni ne misumba imbi iya ku kale, lelo kwalibako imo iishilasangwa. . . . Tabasangako iili yonse iilanda ulwa kwa Mose na Yoshua nga bakwete ‘Ukubungana kwa Cilye ukwa Mabutotelo,’ ukwa bena Moabu na bena Amone, na bena Edomu . . . Tabasangako iili yonse iilanda ulwa kwa Samwele wasakamanishisha uwa ku kale ngo watumine ifyebo ku Gati na Ekrone ku kwipusha ukusontwa kwa bashimapepo ba kwimininako Dagone ukwisa ku Shilo no kukwata ukukumana na bashimapepo ba kwa Yehova . . . Tabasangako iili yonse iilanda ulwa kwa Eliya wa ku kale uwa mushipi wa mpapa ngo watubulwile ukuti kubeko ‘ukwisa pamo’ na bashimapepo ba kwa Baali na Moloke ku kulanshanya pa mulungu umo pa fifundisho fya fisumino fyabo ifyalekanalekana, mu kuba ne cilolwa ca kutwala pa ntanshi umucinshi wa bonse ku butotelo bwa bambi bumo na bumo.”

Ubufumu bwa kwa Lesa—Isubilo Lyeka Fye

Ukubungana kwa Cilye ukwa Mabutotelo ya mu Calo takwakatunguluke. Inyunshipepala na makombe babomfeshe inumbwilo pamo nga “icimfulumfulu,” “ubwafya,” na “icimfulunganya” mu kulundana no kubungana kwa cilye. Ukulingana na lipoti umo, nelyo fye ni bakapokola balibimbilwemo mu kutalalika ifimfulunganya fibili ifyaimishiwe na malekano ya bupolitiki. Mu cipepala calembwa ica mu 1952, ukubungana kwa cilye kwatantike ici pamo nga cimo ica mifwaile ya ciko: “Ukwimika Ukubungana kwa Cilye kwabelelela ukwa Calo ukwa Mabutotelo ku kubombela pamo na UNITED NATIONS mu kunonko mutende wa calo no kumfwana pa kati ka bantu na bantu bonse.” Mu kucilana, Yesu asosele ukuti Ubufumu bwakwe tabwali lubali lwa cino calo. Baibolo isonta ku Bufumu bwa kwa Lesa ngo kupikulula kweka fye ku mpika sha mutundu wa muntu.—Daniele 2:44; Yohane 18:36.