Bushe Uleibukisha?

Bushe waliipakisha ukubelenga ishafuma isha nomba line isha Ulupungu lwa kwa Kalinda? Nga ni fyo, walacisanga ukube ca kulengo buseko ukwibukisha ifyakonkapo:

▫ Mulandu nshi inengu sha cina Israele shasoobwelepo ukutubilisha mu ŋanda ya kwa Rahabu cilende?

Inengu sha cina Israele shaikalile kwi Funde lya kwa Lesa, e co tashatubilishe mu ŋanda ya kwa Rahabu ku mifwaile ya bucisenene. Nakalimo shatontonkenye ukuti ukuba mu ŋanda ya kwa cilende kwali ukushingapalishako ukwimyo mutunganya mu musumba. Ukuti iŋanda yakwe yakuulilwe pa cibumba ca musumba pambi kuti kwayangushako ukufyuka. Lelo pali fyonse, Yehova abatungulwile ku mubembu uo umutima wakwe wali uwayambukilwako bwino ku lukumo lwa mibombele ya bulesa na bena Israele ica kuti alilapile no kwalula inshila shakwe.—12/15, amabula 24-5.

▫ Ni shani fintu ubukali bwambukila ubutuntulu bwesu ubwa bumi?

Ukufwailisha kulango kuti ubukali bulaletako amahormone yalengo kukanshika. Ukupuuka kwa libili libili ukwa bukali kuti kwaletako ukukanalingana pa kati ka menshi ya mu mubili yacingilila ku malwele na yacito kucena, ukutubika mu busanso bwa bulwele bwa ku mutima.—12/15, ibula 32.

▫ Mitubululo nshi ikatwaafwa ukwingilishako ukwananya kwesu ukwa bamagazini ba Ulupungu lwa kwa Kalinda na Loleni!?

Ba uwaibukila pa lwa Ulupungu lwa kwa Kalinda na Loleni!; ba ne mipeelele iyaanguka; ba uwakondenkana pa kupekanya imipeelele yafulilako iipi; imika ubuyo bwa pa lobe.—1/1, amabula 24-5.

▫ Mulandu nshi Mose abela ca kumwenako cishaiwamina ica teokratiki kuli ifwe ukukonka?

Mose afwaile ubutungulushi bwa kwa Yehova pa milandu. Takwete ukuibililika kwa pa lwakwe lelo ali uwaangwako pa lwa bukata bwa kwa Yehova. Akwete icitetekelo cakosa, kabili tatalile alaba ukuti Yehova aali e Kateka wa cine cine uwa luko lwa Israele.—1/15, ibula 11.

▫ Ni nshila nshi shimo umo ukusambilisha kwa bulesa kucimfisha?

Ukusambilisha kwa bulesa kulacimfya pa kupeela ku bantu ba kwa Yehova ukumfwikisha ukulundulukilako ukwa cine. Kuleta abantu mu lubuuto lwa ku mupashi, kabili kulanga abafuuka ifya kupepa Lesa “mu [mupashi] na mu cine.” (Yohane 4:24) Ukusambilisha kwa bulesa na kabili kulacimfya ifya kwesha ne calo cibifi.—2/1, amabula 10-12.

▫ Cinshi caba e lufungulo ku kufunda kwatunguluka?

Ulufungulo lwaba mucinshi walinga ku muntu umbi ne nsambu shakwe sha kusungwa mu nshila yacindamikwa. Muli fyo, iciŋombe ca Bwina Kristu cilingile ukuba ica cikuuku kabili icashansha lelo cilingile ukucindamika uulepokelela ukufunda.—2/1, ibula 28.

▫ Ni shani fintu Icalici lya Roma Katolika lyaishile mu kupokelela Inshiku Nkulu ya Kupakata Maria pamo nge cifundisho?

Mu myanda ya myaka iya kubalilapo pa numa ya mfwa ya kwa Yesu, imfundo ya Nshiku Nkulu ya Kupakata Maria uwasendwa ku muulu tayaishibikwe nangu panono mu mintontonkanya ya Bena Kristu. Nangu cibe fyo, pa numa icisambilisho ca Bulesa Butatu casangwike icifundisho ce calici ica mu bulashi, Maria atendekwe ukupeelwa ulubali lwacindama mu kwingilishiwako. Imfundo ya Nshiku Nkulu ya Kupakata tayapokelelwe pamo nge cifundisho ukufikila November 1, 1950, lintu Papa Pius XII abilishe ukuti: “Twalondolola yene ukuba icifundisho casokololwa na Lesa.”—Munificentissimus Deus.—2/15, amabula 26-7.

▫ Muli Yeremia icipandwa 24, cinshi cintu ifipe fibili ifya makunyu, amakunyu yawama na yabipa, fyaiminineko?

Amakunyu yawama yaiminineko abaYuda abo pa kubalilapo basendelwe bunkole ku Babiloni, umo abashalapo baali no kubwelulukila ku Yuda. Amakunyu yabipa yaiminineko Imfumu Sidekia na baali nankwe abapondokele Imfumu Nebukadnesari te mulandu no kuba nabalapa mwi shina lya kwa Lesa. Mu kulinganyako, tusanga mu nshita sha muno nshiku abashalapo ba kwa Israele wa ku mupashi, abaletako ifisabo fyawama mu bumi bwabo, mu kupusanako na bashibutotelo ba mu Kristendomu, abaletako ifisabo fyabola.—3/1, amabula 14-16.

▫ Ni bani baali Aba Bushiku Bwalenga 14, kabili mulandu nshi babela aba buseko ku Bena Kristu ilelo?

Pa numa ya nshita ya batumwa, kwaliko bamo abasefeshe Ica kulya ca Cungulo ica kwa Shikulu pa Nisani 14 cila mwaka, ukukonka icipasho ca butumwa. Baishileishibikwa nga “Aba Bushiku Bwalenga 14.” Ici cili ica buseko ilelo, apantu cilanga ifyo nelyo fye ni pa numa abatumwa bafwile, kwaliko bamo abaikatilile ku nshila yalungama iya kwibukisha imfwa ya kwa Yesu umuku umo mu mwaka pa Nisani 14.—3/15, amabula 4-5.

▫ Nani aali William Whiston?

Aali muntu wasoma uwalamuka uwa mu mwanda wa myaka walenga 18 mu England, umunankwe wapalamisha uwa kwa Sir Isaac Newton. Whiston apilibwile Amalembo ya Bwina Kristu aya ciGreek, alwishishe icisambilisho ca Bulesa Butatu apabuuta, kabili aali ni kafundisha pa maplaneti na mapendo. Lelo mu kupalishako Whiston alebukishiwa ukucilisha pa kupilibula kwakwe ukuleta mu ciNgeleshi ifyalembwa fya kwa kalemba wa lyashi lya kale uwa ciYuda Flavius Josephus.—3/15, amabula 26-8.

▫ Ni shani fintu umuntu apangilwe mu cipasho ca kwa Lesa? (Ukutendeka 1:27)

Umuntu apangilwe mu kuba na maka ya kubelesha imibele yapulamo iya kwa Lesa iya kutemwa, ubulungi, amano, na maka—capamo ne mibele imbi.—4/1, ibula 25.