Bakabilisha Ba Bufumu Bacita Lipoti
Lesa Taba na Kapaatulula ka Bantu
IMYAKA ukucila pali 1,900 iyapitapo, umutumwa Petro acitile ubunte kuli mushika wa fita Korneli, ukusoso kuti: “Cine cine ninkutuluka ukuti Lesa taba na kapaatulula ka bantu, lelo uwa mu luko lonse uwamutiina no kubombo kulungama asekelelwa kuli wene.” (Imilimo 10:34, 35) Korneli alangishe akatiina ka kuli Lesa no kutemwa ubulungami. Alipokelele ubunte bwapeelwe na Petro kabili asangwike Umwina Kristu.
Icishinte cimo cine caliba ica cine ne lelo—Lesa taba na kapaatulula ka bantu. Tumone ci ku ca kukumanya ukufuma ku Germany. Lipoti yatila:
“Mu cifulo ca kubombelamo ica cilonganino cesu, mwaliba inkambi ya bashilika ba cina Russia iikalamba. Mu 1989, mu kwipipa pa numa Icibumba ca Berlin cawile, baeluda balipwishe nga ca kuti uuli onse uwa bakasabankanya alishibe ululimi lwa ciRussian. Bamo aba ifwe twalishibe, kabili twaile ku kubomba muli ici cifulo ca kubombelamo, icashinina ukuba ubuseko bukalamba. Icakonkapo ni cimo ica fya kukumanya fyafulisha.
“Nali na kasabankanya uushabatishiwa (uyo pali ino nshita uwabatishiwa) lintu twalandile kuli mushika mukalamba uwa fita. Mushika mukalamba wa fita alikutike ku fintu twali no kusosa kabili lyene atulaalike ukulanda ku bashilika bakwe. Atile bafwile ukumfwa pa lwa kwa Lesa na Baibolo na bo bene, e co twalitantike ukubwelelako.
“Twaipwishe nkashi uwalongoloka mu kulanda iciRussian ukuya na ifwe nga kapilibula. Mu muputule wa kalabu ya mu nkambi, twaimike itebulo lya fitabo kabili twali na maka ya kulanda ku bashilika 68 no kwasuka ifipusho fyabo. Pa numa mu nsansa balipokelele ifitabo 35 na bamagazini mupepi na 100. Ilyo twalefuma mu muputule wa kalabu, twamwene amabumba yanono yalelanshanya pa lwa fitabo.
“Twatantike ukubwelelako pa July 4, 1992. Tushifika fye pa 10:50 inshita ya lucelo, umulinshi pa mpongolo ya nkambi atwebele ukuti abashilika baletwenekela. Mushika wacepako atutwele ku muputule wa kalabu, kabili twasangile ukuti umukashana, uwali napokelela ifitabo ukufuma kuli ifwe ifya kubika mu laibrare, alibilishe ukwisa kwesu ukupitila mu kubika ifipampa mu nkambi. Bamunyina batatu bapeele utumalyashi utwipi pa lwa mulimo wesu uwa mu kusaalala kwa calo no kulangisha umulandu twingacetekela Baibolo. Lyene twasuminishe inshita ya fipusho ukufuma kwi bumba, ukupeela ifyasuko ukufuma muli Baibolo. Pa kati ka fipusho pali ica kuti, Cifulo nshi ica Nte sha kwa Yehova pa lwa mulimo wa mu fita, kabili bushe abali bonse aba bene bashilika? Ici capeele kasabankanya ushabatishiwa uwanshindike ku numa ishuko lya mu nshita ukulondolola umulimo wakwe uwa myaka 25 mu fita fya ku East Germany, imyaka ya kulekelesha pamo nga kapiteni wa bashilika ba mu ndeke. Ashimike ifyo asambilile pa lwa kwa Lesa na Baibolo kabili nomba alefwaya ukusanguka umo uwa Nte sha kwa Yehova. Abashilika balyebekeshiwe pa lwa fintu baumfwile. Mu maminiti fye cinelubali ifitabo fyonse ifyo twaishile na fyo fyali mu maboko ya bashilika, kabili abengi balefwaya amaBaibolo. Mwi tuuka lya fitabo twali na maka ya kusanga amaBaibolo ya ciRussian cinelubali, ayo abashilika batashishe ukupokelela. Bwali buseko icine cine ukupeela aba aba nsala ya ku mupashi ifyebo fya mu Baibolo, kabili tulesubila ukuti bakabombelapo.”
Mu cine cine, Lesa taba na kapaatulula ka bantu. Ukupitila mu Cebo cakwe apaapaata abantu ba mitima ya bufumacumi abali bonse kabili ukuli konse bengaba. Alaalika bene ukusambilila pa lwa wene no mwana Wakwe, Yesu Kristu, kabili abengi ukufuma ku nyendelo shonse isha bumi e fyo balecita.—Yohane 17:3.