Bakabilisha ba Bufumu Bacita Lipoti

“Kaaneni Kaseebanya, na o Akafulumuka Kuli Imwe”

MU MWANDA wa myaka uwa kubalilapo, ibumba lya baipeeleeshe ku “malele” mu Efese bayankwile ku bukombe bwa Bwina Kristu pa koca amabuuku yabo aya fya malele pa menso ya bonse. (Imilimo 19:19) Umutengo wapendelwe uwa aya mabuuku wali sha silfere 50,000. Nga ca kuti ubulondoloshi bwa Baibolo bulelosha kuli dinari, indalama ya bena Roma iya silfere, kuti pambi wafikile mu kucefyako kuli $37,000!

Ilelo kwalibako abengi abo pa nshita imo bakwete ifitabo ifyalebomba ne fya kupandapanda lelo abalangishe umupampamina uwapala kuli ulya uwa bena Efese ba pa kale. Languluka ica kukumanya cikonkelepo ukufuma ku Canada.

Mupepi ne myaka isano iyapitapo, umo uwa Nte sha kwa Yehova aleshimikila ku ŋanda ne ŋanda lintu pa mwinshi umo umwanakashi uwe shina lya Nora mu mano yene yene amukuliile mu ŋanda. Pa myaka iingi nga nshi iya kusapika kwa ku mupashi, Nora aali nalonganika imyanda ya mabuuku ya fya butotelo ne fya mipashi, lelo afwaile ukwishiba cintu Baibolo yali no kusosa pa lwe subilo lya bafwa. Nte amutambike trakiti wa kuti Lisubilo Nshi ilya Batemwikwa Besu Abafwa? Ifipusho fya kwa Nora fyalyaswikwe, kabili apokelele ukulembesha kwa bamagazini ba Ulupungu lwa kwa Kalinda na Loleni!

Pa numa aliselele kabili alekele ukumonana ne Nte sha kwa Yehova. Nangu cibe fyo, atwalilile ukupokelela bamagazini mu melu pa cifulo cakwe icipya. Na kabili aordele impapulo shimo ishashimpwa pali Baibolo ishalumbwilwe muli bamagazini. Pa numa ya nshita imo, umo uwa Nte sha kwa Yehova aishile pa mwinshi wakwe. Pa kwebekeshiwa na fintu Nte aleya mu kulungatika kuli Baibolo lintu aleasuka ifipusho, Nora alimupokelele no kumulaalika ukubwela ku kulanshanya kwalundwapo.

Nte, nangu cibe fyo, acisangile icayafya ukumonana na Nora na kabili. Ukutandala kwa kubwekeshabwekeshapo kwalicitilwe pa nshita shapusanapusana isha kasuba kabili pa nshita shapusanapusana isha mulungu ukwabulo kutunguluka. Mu kupita kwa nshita, nangu ni fyo, umukoosha wakwe walilambwilwe, kabili asangile ifya kufumamo fisuma. Isambililo lya Baibolo ilya lyonse lyalitendeke, ilyo pa kupampamina kwa kwa Nora ilingi line lyalebako imiku itatu mu mulungu umo. Ifintu alesambilila fyamukuntile ukulanda ku fibusa fyakwe ne filundwa fya lupwa, ukufumamo batatu aba bene ukulomba amasambililo ya Baibolo ne Nte sha kwa Yehova.

Ukupitila mwi sambililo lyakwe Nora aishiletesekesha ukuti kwalibako amabutotelo ya bufi ayengi na bakasesema ba bufi abengi lelo ni nshila fye imo iitungulula ku bumi. Pa myaka iingi aalefwaya ifyasuko ku fipusho fyakwe mu mabutotelo ya bufi, lelo pa numa ya kusambilila cintu Baibolo isosa pa lwa fibanda, abombele ukupala abena Efese ba pa kale abalumbulwa pa Imilimo 19:19. Aliwemye laibrari wakwe kabili, pa kupita kwa nshiku shafulilako, aonawile amabuuku ukucila pe kana limo ayalebomba ne fya kupandapanda ne fisambilisho fya butotelo bwa bufi. Pa kati ka fitabo fyaonawilwe, icikako cimo ica mabuuku yane cali no mutengo uwacila pali $800!

Mu kumonekesha pa kufulwishiwa ne mibombele ya kwa Nora, ifibanda fyamululunkenye mupepi ne milungu ibili. Nangu cibe fyo, iyi mipashi ibifi tayali na maka ya kunenuna wene ukufuma kwi sambililo lyakwe ilya Baibolo no kubishanya kwakwe no kuteyanya kwa kwa Yehova ukwa muno nshiku.

Ifya kukumanya fya musango yo filangilila bwino icine ca mashiwi ya mu Baibolo aya kuti: “E ico lambeni kuli Lesa; lelo kaaneni Kaseebanya, na o akafulumuka kuli imwe.”—Yakobo 4:7.