Bakabilisha ba Bufumu Bacita Lipoti
Yehova Alikosa Ukucila Abalwani Bakwe
CIWA ne fibanda fyakwe pa nshita ntali balyesha ukucilikila ukushimikila kwa mbila nsuma ukupitila mu butotelo bwa bufi no kupupe mipashi. Baibolo ilanda pa lwa mapange ya kwa Satana ayabipisha pali 2 Abena Korinti 4:4 apo ilondolola ukuti “umulungu wa nshita ino wapofwishe mitima ya bashitetekela, ku kulesho kuca kuli bene ulubuuto lwa mbila nsuma ya bukata bwa kwa Kristu, uuli cipasho ca kwa Lesa.”
Lelo Yehova Lesa alikosa ukucila Satana. Tapali nangu cimo ico abalwani ba kwa Yehova bengacita ku kulesha ukupwishishiwa kwa kufwaya kwakwe ukwa bulesa, ukwaba kwa kuti ‘abantu bonse bapusuke no kufika ku kwishibe Cine.’ (1 Timote 2:4) Amalipoti yakonkapo ukufuma kuli bakabilisha ba Bufumu mu Australia yaleebekesha ici cishinka.
□ Pa numa ya kuleka ukuya ku calici pa myaka 20, umwanakashi umo atendeke ukubelenga Baibolo na kabili. Ubuseko bwakwe muli Baibolo ubwabuukulwilwe bwamulengele ukukwata ifipusho fishaifulila, e co alipepele kuli Lesa ku kwaafwa ukusanga ifyasuko. Alefwaya ukusapike cine, lelo alishibe ukuti nga abwelele ku butotelo bwakwe ubwa kale tacali na kupikulula impika yakwe. Mu cifulo ca ico, atendeke ukusapika ukupitila mu kutandalila amatuuka yashitishe fitabo ku kumona nga balikweteko ifitabo fya butotelo.
Shimatuuka aibukishe ukuti alikwete icitabo cimo ica butotelo icishali mwi tuuka, lelo cali ku ŋanda. Umutwe wa citabo wali Kuti Waikala Kuli Pe na pe muli Paradise Pe Sonde, icasabankanishiwe ne Nte sha kwa Yehova. Uyu mwanakashi alibelengele ici citabo mu kuswatuka kabili alisangile ifyasuko ku fipusho fyakwe ifishaifulila ifya Baibolo. Pa numa ya kufwailishe Nte sha kwa Yehova mu citabo ca manambala ya lamya, mu kupelako alibasangile no kutendeka isambililo lya Baibolo ilya lyonse.
□ Umukashana umo aipwishe inyunshipepala ya cikaya ukusabankanya ukuti aleshitisha impinga. Ukusabankanya kwaloseshe kuli yene nge ‘mpinga ya mu nkulo sha pa kati kabili iya maka nga nshi.’ Umo uwa Nte sha kwa Yehova alimwene uku kusabankanya. Apingwilepo ukutuma lamya ku nambala yapeelwe no kulanda kuli uyu mwanakashi pa lwa ntulo ya maka yaletungwa ukukwata iyi mpinga. Pakonkele ukulanshanya pa lwa mimwene ya Baibolo iya mibombele ya fibanda. Uyu mukashana wakwete iyi mpika alondolwele ukuti ubushiku fye bwafumineko, aali napepa kuli Lesa ukumwaafwa ne mpika shakwe isho akwete ne fibanda. Inte alitantike ukuti bakakwate ukulanshanya na kumbi pali lamya.
Lintu nte atumine lamya, umukashana taalipo. Nyina kwa mukashana e wayaswike kabili atile: “Nshishibe ico waebele umwana wandi, lelo icacitika cipapwa!” Ashimike ukuti pa numa balanshenye pali lamya pa muku wa kubalilapo, umwana wakwe alipoosele ifikope fyakwe fyonse ifya busatana ne fitabo kabili atendeke ukubelenga Baibolo.
Mu kwangufyanya, calitantikwe ukuti uyu mwanakashi atandalilwe. Ilyo line alipokelele isambililo lya Baibolo ilya lyonse ne Nte sha kwa Yehova. Na o wine atendeke ukubishanya ne Nte ukupitila mu kusangwa ku kulongana kwa Bwina Kristu. Na kabili, Yehova alicimfishe ifibanda ukupitila mu kulenga ukwishiba kwalungikwa ukwa cine ca Baibolo ukusanikila.