Ilyashi lya Bakabilisha ba Bufumu

Imilimo Isuma Iicindika Yehova

MU LYASHI lyakwe ilya pa Lupili, Yesu aebele abasambi bakwe ati: “Ulubuuto lwenu lengeni lubalikile ku cinso ca bantu, ukuti bamone imilimo yenu iisuma, no kucindika Shinwe wa mu muulu.” (Mateo 5:16) Mu kupalako, Abena Kristu ba cine ilelo balaibimba mu ‘milimo isuma’ iicindika Yehova.

Bushe iyi milimo isuma yaba milimo nshi? Isanshamo ukushimikila imbila nsuma, lelo imyendele yesu iya ca kumwenako yaliba lubali ulwacindama na yo. Ilingi line caba myendele yesu iisuma mu kutendekelako e ipalamika bantu ku cilonganino ca Bwina Kristu. Ifya kukumanya fyalakonkapo filelangilila fintu Inte sha kwa Yehova mu Martinique ‘shilelenga ulubuuto lwa shiko ukubalika ku cinso ca bantu.’

◻ Ilyo aali mu mulimo wa kushimikila kwa ku ŋanda ne ŋanda, umo uwa Nte sha kwa Yehova atandalile umwanakashi wa ciKatolika. Pa myaka 25 uyu mwanakashi aaleikala no mwaume uo bashaupene nankwe. Aali uwabeleshanya ne fisambilisho fya Nte sha kwa Yehova, apantu, mupepi ne myaka 7 mu kubangilila, ali napokako icitabo ca Kuti Waikala Kuli Pe na pe muli Paradise Pe Sonde.a Uyu mwanakashi aebele Nte ukuti: “Imipepele yalifulisha. Nshaishiba abo ningasumina muli ici cimfulumfulu conse.” Nte amulondolwelele ukuti icine kuti casangwa fye muli Baibolo no kuti pa kuti engacisanga, alingile ukusambilila Amalembo mu kusakamana no kupepa kuli Lesa ku kupeelwa umupashi wakwe uwa mushilo no kutungululwa.

Pa ciputulwa cimo ica nshita, nangu cingatila alisekelele mu kusambilila Baibolo, uyu mwanakashi alekaana ukulaalikwa konse uko alelaalikwa ukwa kusangwa ku kulongana kwa Bwina Kristu pa Ŋanda ya Bufumu iya Nte sha kwa Yehova. Mulandu nshi alekanina? Aleumfwe nsoni cine cine. Nangu cibe fyo, pa numa ya kulaalikwa ku Cibukisho ca mfwa ya kwa Kristu, alicimfishe nsoni no kuyasangwako.

Icamwebekeshe ukucilamo pa lwa kulya kulongana cali mibele ya kutemwa iyali mu Ŋanda ya Bufumu. Tatalile akumanyapo bucibusa bwa cine cine ubwa ulya musango mwi calici aleyako! Pa numa ya kulya kulongana atampile ukusangwa ku kulongana konse ukwaletungululwa ne Nte sha mu ncende yakwe, kabili mu kwangufyanya alyupilwe ku mwaume uo aleikala nankwe. Nomba ali cilundwa ca cilonganino icabatishiwa.

◻ Imilimo isuma iya kwa Nte na umbi yalileteleko ifya kufumamo fyawama. Ali uwa cifulo cikalamba mwi ofesi limo ifi. Pa numa umwaume umo uwafumine ku Réunion alembelwe incito, bamo mu babomfi batendeke ukulamutumfya pa mulandu wa kuti aali umwipi. Aali ica kusekwa. Mu kupusanako, uyu Nte lyonse ali uwa cikuuku kabili uwa mucinshi kuli uyu mwaume. Mu kwangufyanya umwaume aipwishe umulandu wene abelele uwapusanako.

Nte alondolwele ukuti imibele yakwe iya mucinshi yafumine mu fishinte fya mu Baibolo ifyo aali nasambilila ukufuma ku Nte sha kwa Yehova. Na kabili amulangile cintu Amalembo yasosa pa lwa mifwaile ya kwa Lesa ne subilo lya calo cipya. Uyu mwaume alipokelele isambililo lya Baibolo, atampile ukusangwa ku kulongana kwa Bwina Kristu, kabili baupene no mwanakashi untu aali aleikala nankwe.

Mu kupelako alibwelelemo ku Réunion. Akale, alesanga ubwafya na bantu bakwe, ukucilisha ku lupwa lwa mukashi wakwe. Lelo nomba baali abaebekeshiwe apakalamba ku myendele yakwe iya Bwina Kristu. Uyu mwaume alibatishiwe kabili pali ino nshita ali mubomfi utumikila. Abengi aba muli ulu lupwa, ukusanshako no mukashi wakwe na bana banakashi babili, na bo balabomba mu cilonganino ca Bwina Kristu nga bakasabankanya ba mbila nsuma iya Bufumu bwa kwa Lesa.

[Futunoti]