Inte sha kwa Yehova Ukushinguluka Icalo—Zambia
AMALUNGU yasaalala, ayasansuka no kubatama, ayaba pa muulu wa cibwandanshi icasansuka bamita 1,200—uyu ni Zambia, icalo icabela pa kati lelo ku lubali lwa ku kapinda ka ku kulyo aka Africa. Pa kati ka kapinda ka kuso na masamba, impili sha Muchinga shalisumbuka ukufika kuli bamita 2,100. Umumana ukalamba uwa Zambezi, uubulukuta mu kupapusha pa cipooma ca Victoria caishibikwa icalo conse, e wapanga ubukulu bwa mupaka wa ku kapinda ka kulyo uwa ici calo cataluka kuli babemba. Mwalibamo abantu balekanalekana abengi, mu kuba na mabumba ya mishobo ukucila pali 70. Indimi shikalamba cinekonsekonse e shilandwa muno, lelo kwalibako na shimbi ishingi.
Mu 1911 ululimi lwapusanako lwalitendeke ukubomba no kusalangana mu Zambia. Abatandashi baletele amakope ya Studies in the Scriptures, kabili Inte sha kwa Yehova ukutula lilya ukuya na ku ntanshi balitukuta ukwananya “ululimi lwine lwine” ulwa cine ca Baibolo mu Zambia. (Sefania 3:9) Icaba ukusonsomba maka maka fisumino fishili fya mu malembo pa lwa mibele ya bafwa. Lintu abantu basambilila icine no kumona fintu ukutiine mipashi kwabateka ubusha, ica kufumamo caba ca kwilulula!—Yohane 8:32.
Ku ca kumwenako, nkashi wa busumino umo acita lipoti ati: “Lintu bayama bafwile mu kupumikisha, bamayo, icilundwa cakamamo na menshi ica United Church of Zambia, balipelenganishiwe. Pa numa ya mpupo sha kushika ishasendele umulungu utuntulu, nalibweleleko ku mushi ukuyamona ifyo baleikala. Ilyo nafikile, nasangile umwaume wa cikoloci mu ŋanda, kabili lintu aile, naipwishe mama untu ulya muntu aali. Mama atile ni ŋanga. Bamayo balefwaya ukumubomfya ku kulandule mfwa ya bandume yabo pa kuti umweo wabo wingayatuusha. Bamayo basumine ukuti pali iyo nshita umweo ‘walelulumba fye,’ nga muntu balandile.
“Mama mu kulundapo alondolwele ukuti ukutandala kwandi kwali lipaalo pa mulandu wa kuti ulupwa lwalefwaye nsomo sha kulambule ŋanga. Anombele ukuti nsangwileko, lelo mu kucenjela nalondolwele ukuti pamo ngo Mwina Kristu, nshali na kubuulamo ulubali. Napelulwile na wene ukufuma mu Ilumbo 146:4, apalanga ukuti abafwa tabakwata matontonkanyo—e co takwaba umweo ‘uululumba.’ Na kabili twalangulwike Abena Roma 12:19, apalondolola ukuti icilandushi ca kwa Yehova kabili te cesu. Pa numa ya ico, naebele bamayo pa lwe subilo lya kubuuka lintu Yesu alandilepo, nga fintu lyalembwa pali Yohane 5:28, 29. Balyebekeshiwe ku busumino bwandi ubwakosa mu malayo ya kwa Lesa. Mu kwangufyanya balitendeke ukusambilila na Nte umo no kucito kulunduluka kwa mu kwangufyanya. Baliputwile ukulundana konse no butotelo bwabo ubwa kale no kulangisho kuipeela kwabo kuli Lesa ku lubatisho. Nomba bali ni Nte ya kwa Yehova.”
Nkashi na umbi acita lipoti ati: “Naile ku cililo ca bamuka yama. Lintu nafikile, nasangile bayama no mufyala wandi bekala fye insala. Tabaliilepo nangu cimo ukutula pa bushiku bamuka yama bafwile. Lintu naipwishe umulandu, bayaswike abati ukulingana ne cishilano, tabasuminishiwa ukukosho mulilo pa kuti bengepikapo. Naipeele ukuti njipike, lelo ifilundwa fimo mu lupwa baletiina ukuti nga nakaana ukukonka uyu mwata wa cisenshi, bonse bali no kupena!
“Nalondolwele ukuti pamo nga umo uwa Nte sha kwa Yehova, nalicindika cintu Baibolo isosa pa Ubwina Lebi 18:30 kabili nshikonka ifishilano fishili fya mu malembo. Lyena nabalangile broshuwa wa Imipashi ya Bafwa. Apo pene ukukanshika kwalinakileko, kabili nalitwalilile no kupekanishisha bayama na bantu bonse ifya kulya. Abantu bafwililwe balikuntilwe ku kushipa kwandi kabili balisumine ukusambilila Baibolo mu kutwalilila. Kale kale bali ni bakasabankanya bashabatishiwa, kabili ulupwa lonse balesubila ukubatishiwa mu kwangufyanya.”
Fintu tuba abasekelela lintu ululimi lwine lwine ulwa cine lwawisha icimfulumfulu ca bufi bwa butotelo, ukucilisha amalinga yakosa aya kupelulula ayabika mu busha abantu ba kaele! Mu kuba ne paalo lya kwa Yehova, ululimi lwine lwine luleanana mu Zambia, nga fintu fye luleanana ukupulinkana isonde lyonse.—2 Abena Korinti 10:4.
[Akabokoshi pe bula 9]
UKULONDOLOLA ICALO
Umwaka wa Mulimo uwa 1994
IMPENDWA YA PA MUULU IYA ABALECITILO BUNTE: 82,926
ICIPIMO: Nte umo kuli 107
ABASANGILWE KU CIBUKISHO: 363,372
AVAREJI WA BAPAINIYA BAKASABANKANYA: 10,713
AVAREJI WA MASAMBILILO YA BAIBOLO: 108,948
IMPENDWA YA BABATISHIWE: 3,552
IMPENDWA YA FILONGANINO: 2,027
IOFESI LYA MUSAMBO: LUSAKA
[Icikope pe bula 9]
Ifikuulwa fya musambo ifya Watch Tower ku cibambo ca Lusaka
[Icikope pe bula 9]
Ukushimikila mu Shimabala, ku kapinda ka kulyo aka Lusaka