Bushe Ukalumba Yehova?

“IFILI ishina lyenu, mwe Lesa, e fili ukumutasha ukufika ku mpela sha pano isonde.” Aya mashiwi yafumine mu lwimbo lwa mu busesemo ulwa bana ba kwa Kora. (Ilumbo 48:10) Ilelo, ibumba lyakosa ilya mamilioni ya Nte sha kwa Yehova lilelumba Lesa no kwishibisha ishina lyakwe pa kushimikila imbila nsuma iya Bufumu bwakwe. Pa kucite ici mu fyalo 232 ne fishi fya pali bemba kabili mu ndimi ukucila 300, mu cine cine balefika “ku mpela sha pano isonde.”

Cinshi cikunta abantu aba ntambi shapusanapusana, ifya kwangalila capamo, ne fikulilo fya ndimi ukulumba Yehova? Ukutasha kwabo ukwa kwishiba kwalungikwa ukwa Cebo ca kwa Lesa, Baibolo, kwaba e mulandu ukalamba. Icine ca ku mupashi calibalubula ku kutiine mipashi na ku fisumino fya butotelo ifingisha mu busha pamo ngo kulungulusha kwa ciyayaya. (Yohane 8:32) Icine na kabili cilabaafwa ukutesekesha imibele yawamisha iya kwa Lesa, pamo ngo kutemwa kwakwe, amaka, amano, no bulungi ifyendela pamo ne nkumbu. Lintu abantu batambalala baumfwikisha ukutambika kwa kwa Lesa ukwa Mwana wakwe uwafyalwa eka, Yesu Kristu, pamo nge lambo lya cilubula ilya mutundu wa muntu balakuntwa ku kulumba no kubombela Yehova.

Ukulingana ne buuku lya mu Baibolo ilya Ukusokolola, bakemba ba mu muulu babilisha ukuti: “Mwaliwamina, mwe Shikulwifwe Lesa wesu, ukupokelelo bukata no mucinshi na ’maka; pantu ni ’mwe mwalengele ifintu fyonse: kabili mulandu wa kufwaya kwenu fyabeleleko no kulengwa.” (Ukusokolola 4:11) Ukulumba kwa musango yo takwisako pa mulandu wa kuti balikakililwako. Ukucila, kutuntuka mu katiina ka kucindikisha aka kuli Yehova.

Lumba Lesa Ukupitila mu Kubilisha Imbila Nsuma

Mu kulumbanya Yehova, umuntu alapashanya ica kumwenako cawamisha ica kwa Yesu Kristu, kalumba mukalamba uwa kwa Lesa. Ukukonka mu nkasa sha kwa Yesu kusanshamo ukwakana mu mulimo wa kushimikila imbila nsuma iya Bufumu bwa kwa Lesa. (Mateo 4:17, 23; 24:14) Iyi mibombele ya kushimikila yalisanguka ukubombesha kwakulisha mu kusaalala kwa calo ukwa kulumbilamo Yehova.

Uyu mulimo wa kushimikila waliba uwacindama nga nshi ica kuti Baibolo mu kulengama yalundanya wene ne pusukilo. Pa Abena Roma 10:13-15 pabelengwo kuti: “Umuntu onse uwalilila kwi shina lya kwa [Yehova, NW] akapusuka. Lelo bakalilila shani ku o bashitetekelako? Lelo bakatetekela shani uo bashaumfwile? Lelo bakomfwa shani, apabula kabila? Lelo bakabila shani nga tabatuminwe? Ifyo calembwa, aciti, Ifyo yayemba amakasa ya balete mbila nsuma iya fisuma!”

Umwaka wapwile weka fye, Inte sha kwa Yehova shapeeleshe ukucila pa maawala bilioni umo ku mulimo wa kushimikila. Kabili mwandi fya kufumamo fisuma fyaishile ukufuma muli uku kulumba Lesa! Mupepi na bantu 314,000 bailundile kwi bumba lya bakalumba pa kulangisha ukuipeela kwabo kuli Yehova ukupitila mu lubatisho lwa mu menshi.

Nalyo line, cinshi cingasoswa pa lwa bantu 12,288,917 abasangilwe ku Cibukisho ca mfwa ya kwa Kristu ica mu 1994? Pali bene palipo ukucila pali 7,000,000 abo bashilati batendeke ukulumba Yehova pamo nga bakashimikila ba mbila nsuma. Lelo ukusangwapo kwabo pali aka kashita kacindama mu kupelako kuti kwafumamo ukulundwako kwa mamilioni yafulilako kwi bumba lya bakalumba. Cinshi cingacitwa ku kwaafwa aba balesekelela ukusanguka bakalumba ba kwa Yehova?

Ukwaafwa Kwabako

Abantu balesekelela abengi kuti pambi bafwaisha ukulumba Yehova lelo bayumfwa ifyo te kuti bakumanishe ififwaikwa. Balingile ukwibukisha amashiwi ya kwa kemba wa malumbo uwatile: “Ndeinwina amenso yandi ku mpili. Ni kwi ukufumo kunjafwa? Ukunjafwa kufuma kuli Yehova, uwacito muulu na pano isonde.” (Ilumbo 121:1, 2) Mu kumonekesha, kemba wa malumbo ainwine amenso yakwe ku mpili sha Yerusalemu uko itempele lya kwa Yehova ne cipuna ca pano isonde ica kamfulumende wa teokrasi fyabelele. Ukufuma kuli ici kuti mu kulungika twasondwelela ukuti ukwaafwa kukabilwa ku kulumba Lesa no kubilisha ubukombe bwa Bufumu kufuma fye kuli Yehova no kuteyanya kwakwe.—Ilumbo 3:4; Daniele 6:10.

Ilelo, abo bafwaisha ukulumba Yehova kuti baenekela ukwaafwa kwabamo kutemwa ukufuma ku kuteyanya kwakwe ukwa pano isonde. Ku ca kumwenako, Inte sha kwa Yehova shitambika ukwaafwa ukupitila mu kutungulula amasambililo ya Baibolo aya mu ŋanda aya pa fye ku balesekelela. Uyu programu wa kusambilisha asanshamo ifyacila pa kusambilila fye ififundisho fya Baibolo. Aafwa umusambi ukulundulula ukutesekesha kwa cintu alesambilila no kuteyanya uko Yehova alebomfya.

Mu kumfwana ne ci, Nte uuletungulula isambililo lya Baibolo alesha ukushininkisha ukuti icine cipya icasangwa tacileingila fye mu mutwe lelo na kabili mu mutima. Kabili kasambilisha talingile ukukwinda ku kulanga umusambi ifyo Yehova alebomfya ukuteyanya Kwakwe ku kupwilikisha imifwaile Yakwe pe sonde. Broshuwa wa Inte sha kwa Yehova—Mu Kwikatana Shicito Kufwaya kwa kwa Lesa mu Kusalala kwa Calo na tepu wa video Jehovah’s Witnesses—The Organization Behind the Name ilingi line fyalishinina ukuba ifya kwaafwa mu kupwilikisha ici.

Ukulongana kwa Bwina Kristu na ko kulabomba ulubali lwakatama mu kwaafwa abaleenekelwa ukuba bakalumba ba kwa Yehova. Ilyo fye isambililo lya Baibolo lili pa mubalo, umusambi kuti pambi alaalikwa ukusangwa ku kulongana kwa Bwina Kristu. Mu kupita kwa nshita, akeshiba ubucindami bwa kusangwako lyonse no kwakanamo mu kulongana kwa cilonganino konse. (AbaHebere 10:24, 25) Bakangalila kuti bapayanya ukwaafwa kwakatama ku basumina banabo na baleenekelwa ukuba bakalumba ba kwa Yehova pa kupekanya ukulongana ukwaba ukwa kukuulilila lwa ku mupashi kabili ukubomba.

Afweni Abana Ukulumba Yehova

Abana bali pa kati ka bantu abengi abengaba bakasabankanya ba mbila nsuma mu nshita ya ku ntanshi iipalamishe. Ukucilisha bashibo balikwata icishingamo ca mu Baibolo ku kukusha abana babo “mu kufunda no kukonkomesha kwa kwa Shikulu.” (Abena Efese 6:4) Lintu bakanshiwa bwino ku bafyashi ba bukapepa, nelyo fye bana banono nga nshi kuti balundulula ukufwaisha kwa kulumba Yehova.

Umukashana munono umo mu Argentina atununwike baeluda ba mu cilonganino mu kubwekeshabwekeshapo pa myeshi yafulilako, ukubalomba ukwaafwa kwabo pa kuti engafikapo ukuba kasabankanya wa Bufumu. Mu kupita kwa nshita, abafyashi bakwe na baeluda balisumine ukumuleka ukuba kasabankanya ushabatishiwa. Kale kale alatambika ubukombe bwa Bufumu mu kufumamo cimo pa minshi. Nangu cingati uyu mukashana munono ali fye ne myaka ya bukulu isano kabili taishiba kubelenga, alisungila apasangwa amalembo yamo aya mu Baibolo. Pa numa ya kusanga ilembo, alepusha mwine ŋanda ukulibelenga, kabili lyene alalondolola.

Cili icamonekesha ukuti baeluda na bafyashi kuti bapwilikisha ifingi ukupitila mu kukoselesha no kwaafwa abo abalelunduluka ukulola ku kuba bakalumba ba kwa Yehova.—Amapinda 3:27.

Ukwampana kwa Ciyayaya na Yehova

Lelo, ni shani nga ca kuti iwe pa lobe walibishanya ne Nte sha kwa Yehova pa nshita imo lelo taulati uilunde kuli bene mu mulimo wabo uwa kushimikila? Kuti pambi caba ica kunonsha ukuipusha we mwine ifipusho fyakonkapo, ‘Bushe nalisumina ukuti nalisanga icine no kuti Yehova e Lesa wa cine eka? Bushe nalishininwa ukuti Ubufumu bwa kwa Lesa e kupikulula kweka fye ku mpika sha mutundu wa muntu? Bushe nalisha ubutotelo bwa bufi bonse ne myata ya ku calo ne fibelesho ifyo fifulwisha Yehova? Bushe nalitemwa Lesa ne fifwaikwa fyakwe ifyalungama mu kushika?’ (Ilumbo 97:10) Nga ca kuti mu kufumaluka wingasuka ati ee kuli ifi fipusho, cinshi cilekulesha ukulumba Yehova?—Linganyako Imilimo 8:36.

Ukulumba Yehova kubimbamo ifyacila pa kushimikila fye imbila nsuma. Nga ca kuti walikwata ukwishiba kwalungikwa, walikwata icitetekelo ca cine, kabili ulelenga ubumi bobe ukumfwana ne fifwaikwa fya bulesa, ulekabila ukukosha ukwampana kwa pa lobe na Lesa. Mu nshila nshi? Ukupitila mu kuipeela kuli wene mwi pepo kabili lyene ukulangisha ici ukupitila mu lubatisho lwa mu menshi. Ubumi bwa muyayaya buli mu busanso. E ico, bombela pali uku kufunda kwa kwa Yesu nomba: “Ingileni pa mpongolo ya kamfyemfye: pa kuti impongolo yasalala, kabili inshila yapabuka iitwala ku boni, kabili bengi abengilako. Lelo inshila iitwala ku mweo ya kamfyemfye kabili yalifyenenkana, kabili banono abaisanga.”—Mateo 7:13, 14.

Mu kuba ne micitile ya fintu iya ndakai ukupalamina impela ya iko iyabamo akayofi, ino taili ni nshita ya kushingashinga. Lino line fye bombela pa ncitilo shitungulula kwi senge lya ciyayaya na Yehova. Mu cine cine, nomba e nshita ku kwankula ati ee ku cipusho ca kuti, Bushe ukalumba Yehova?