Ifipusho Ukufuma ku Babelenga

Mu mano yene yene, bushe paliba ubupusano pa numbwilo sha mu Baibolo “impaanga shimbi” na “ibumba likalamba”?

Ee, nangu ca kuti tatulekabila ukuba abayangwako mu kucishamo pa lwa mibomfeshe ya mashiwi nelyo ukukalifiwa nga ca kuti umo abomfya ishi numbwilo mu kushinkaana.

Abena Kristu abengi balibeleshanya ne mikululo umo tusanga ishi numbwilo. Umo usangwa pali Yohane 10:16. Palya Yesu atile: “Impaanga shimbi ndi na sho, ishishili sha mwi cinka ili; na sho ndi no kushileta, kabili shikomfwe shiwi lyandi; e lyo kukabo mukuni umo, umucemi umo.” Inumbwilo imbi, “ibumba likalamba,” imoneka pa Ukusokolola 7:9. Tubelengo kuti: “Ilyo papitile ifi naliloleshe, moneni, kwali ibumba likalamba ilishingapendwa ku muntu nangu umo, abafuma ku luko lonse ne mikowa ne misango ya bantu na ’bantu na ’ba ndimi, nabeminina ku menso ya cipuna ca bufumu, na ku menso ya Mwana wa mpaanga, nabafwala amalaya yabuuta, bali ne misambo ya tuncindu mu minwe yabo.”

Natutale tulanguluke Yohane 10:16. Ni bani bali ishi mpaanga? Cisuma, tulingile ukwishiba ukuti bonse abakonshi ba kwa Yesu aba bucishinka baloshiwako nge mpaanga. Pali Luka 12:32, aitile abo pa basambi bakwe abakaya ku muulu ngo “mukuni unono.” Umukuni wa cinshi? Uwa mpaanga. “Impaanga” sha mu “mukuni unono” shikaba lubali lwa Bufumu mu muulu. Nangu cibe fyo, kwalibako bambi abakwata isubilo lyapusanako abo Yesu amona nge mpaanga.

Kuti twasange ci muli Yohane icipandwa 10. Pa numa ya kulanda pa lwa mpaanga, pamo nga batumwa bakwe abo aali no kwita ku bumi mu muulu, Yesu alundilepo mu John 10 cikomo 16 ukuti: “Impaanga shimbi ndi na sho, ishishili sha mwi cinka ili; na sho ndi no kushileta.” Inte sha kwa Yehova pa nshita yalepa balishiba ukuti Yesu alelanda ulwa bantu abali no kukwata ifilolelo fya pe sonde. Aba busumino abengi aba pa nshita sha pa ntanshi ya buKristu, pamo nga Abrahamu, Sara, Noa, na Malaki bakwete ifilolelo fya musango yo. E co mu kulungika kuti twabasanshamo ngo lubali lwa “mpaanga shimbi” isha pali Yohane 10:16. Mu kati ka kuteka kwa Myake Kana, inte sha pa ntanshi ya buKristu isha busumino isha musango yo shikabuushiwa kabili lyene shikasambilila pa lwa kwa Kristu Yesu no kumupokelela, ukusanguka “impaanga shimbi” isha Mucemi Musuma.

Na kabili twalishiba ukuti ukutula pantu ubwite bwa cinkumbawile ubwe bumba lya ku muulu bwapwilile, amamilioni balisanguka Abena Kristu ba cine. Aba na bo mu kulungika betwa “impaanga shimbi,” apantu tababa ulubali lwa “mukuni unono.” Ukucila, impaanga shimbi ilelo basubila ukutwalilila ukwikala ukufika fye na muli paradise wa pe sonde.

Nomba, cinshi twingasosa pa lwa kwishibikwa kwe “bumba likalamba” ilyalumbulwa pa Ukusokolola 7:9? Cisuma, lolesha pa Re 7 cikomo 13 ne cipusho ica kuti, “Ni bani, kabili bafumine kwi?” Tusanga icasuko pa Ukusokolola 7:14: “Aba e bafuma mu Bucushi bukalamba.” E co “ibumba likalamba” lyapangwa na abo abafuma, nelyo abapusunsuka, ubucushi bukalamba. Nga fintu Re 7 icikomo 17 cisosa, ‘bakatungululwa ku tumfukumfuku twa menshi ya mweo,’ pe sonde.

Kuti mwatesekesha, nangula ni fyo, ukuti pa kuti aba bapusunsuke ubucushi bukalamba, bafwile balisamba amalaya yabo kale kale mu mulopa wa Mwana wa Mpaanga, ukusanguka bakapepa ba cine. E co, nangu ca kuti pa Ukusokolola 7:9 palelondolola ili bumba pa numa ya bucushi, kuti twabomfya inumbwilo “ibumba likalamba” kuli bonse abo abakwata amasubilo ya pe sonde abo balepyungila Lesa umulimo washila nomba, pa ntanshi fye ubucushi bukalamba tabulatendeka mu kuba no kusansa kwa nko pa kupepa kwa bufi.

Mu kusupawila, kuti pambi twaibukisha “impaanga shimbi” pamo nge numbwilo yasaalala, iisanshamo ababomfi ba kwa Lesa bonse abakwate subilo lya kwikala kuli pe na pe pe sonde. Shisanshamo ibumba lyacila pa bapale mpaanga abapeleela ilelo abalelonganikwa pamo nge “bumba likalamba” mu kuba ne subilo lya kupula mu bucushi bukalamba ubusungamine. Ubwingi bwa abo Bena Kristu ba bucishinka abali aba mweo ilelo baba ba “mpaanga shimbi,” kabili baba ulubali lwe “bumba likalamba” nalyo line.

Cili bwino ukubwekeshapo ukuti, ilintu cili fye bwino ukumfwikisha pa lwa uku kulungatika, takuli ukukabila ku Mwina Kristu uuli onse ukwa kuba uwayangwako mu kucishamo pa lwa mashiwi, icingetwa ukulengulula amashiwi kwacishamo. Paulo asokele pa lwa bamo ‘abatuumikwe’ no kuibimba mu ‘fikansa pa lwa fyebo.’ (1 Timote 6:4) Nga ca kuti ifwe pa lwesu twalishiba ubupusano bumo pa kati ka numbwilo, cili fye bwino. Lelo, pa cintubwingi nelyo pa mbali, tatulekabila ukulengulula bambi abashingabomfya inumbwilo sha mu Baibolo mu kulungatika nge fyo.