Imbukuli ya fya Kulya Yacitilo Bunte

PA NUMA ya cinkukuma cacitike ku Kobe, Japan, mu January wafumako, abantu ba muli iyi ncende baliculile sana pa kusange ca kulya. Nalyo line, Inte sha kwa Yehova tababulishe ica kulya, pa mulandu wa kwaafwa kwabamo icikuuku ukwa bamunyinabo. Pa nshiku sha kubalilapo shibili ukufika kuli shitatu pa numa ya cinkukuma, ifilonganino fyali lwa mupepi fyapayenye imbukuli sha mupunga. Mu kwangufyanya, ifibusa fisakamana fyapayenye imbukuli sha fya kulya. Kuli ishi mbukuli sha fya kulya, abengi bakambatikeko utupepala uto balembelepo ukuti baali abayangwako pa lwa baali mu bucushi. Abapokelele ifya kulya basosele ukuti ifya kulya fyonse fyalungilwemo ifilamba fya buseko ifyalukutilepo lintu balebelenga utupepala.

Inte sha kwa Yehova baabene ifya kulya fyabo na bantu bambi abaali mu kukabila. Nte umo alelya ica kulya cakwe ica kasuba ilintu aali pa lwendo lwa muli motoka pamo na cibusa wakwe uushili Nte uo abomba nankwe pa kampani kamo kene. E co amupeeleko imbukuli imo iya fya kulya iyo apokelele.

Uyu cibusa aipwishe ati “Ni kwi washitile iyi mbukuli ya fya kulya?” Munyina alondolwele pa lwa mulimo wa kukumbusuka uwa Nte. “Papita inshiku shafulilako apo naliliilepo umusaalu. Nalashilako no lupwa lwandi ku ŋanda,” e fyo uyu mwaume asosele ilyo alesantika.

Umuku walenga butatu ici cacitike, uyu cibusa afumishe bayen 3,000 (mupepi na badola ba ku United States 35) no kupeela Nte ukusoso kuti: “Ninjishiba imibombele yenu, e co napaapaata leka nsangwileko ku mulimo wenu. Ndesantika sana pa kumpako ica kulya ca kasuba. Mu cituntulu, ifibusa fyobe bonse bantu abasuma nga nshi.”