Ukupayanya Ifya Kukumbusuka mu Kati na Nkati ka Fitantaala

UKUBOMBESHA kwa muntu ku kupayanya ifya kukumbusuka lintu kwabako ubusanso mu cine cine kuletashiwa. Imitantikile iingi iya kukumbusuka yalyafwa ukukuula cipya cipya amayanda, ukwikatanya indupwa na kabili, pali fyonse, ukupususho bumi.

Lintu kwabako ubusanso, Inte sha kwa Yehova balapokelela—kabili balatasha—ukupayanya ukuli konse ukupayanishiwa ukupitila mu mitantikile ya ku calo iya kukumbusuka. Pa nshita imo ine, balikakililwako ukulingana na Malembo ‘ukubombe icisuma . . . no kucishamo ku ba bwananyina bwa mu citetekelo.’ (Abena Galatia 6:10) Ee, Inte shiyumfwa ukuti shaba lupwa; baimona ukuba “aba bwananyina.” E mulandu wine baitila abati “munyina” na “nkashi.”—Linganyeniko Marko 3:31-35; Filemone 1, 2.

E co lintu ubusanso bwacitikako mu bwina mupalamano, baeluda pa kati ka Nte sha kwa Yehova balabombesha nga nshi ukufwaya ukwishiba ukuli icilundwa cimo na cimo ica cilonganino na fintu abulishe no kutantikako ukupayanya ukwaafwa kulekabilwa. Langulukeni fintu ici caishileilangisha mu Accra, Ghana; San Angelo, ku U.S.A.; na Kobe, Japan.

Accra—“Kwati fye Bushiku bwa kwa Noa”

Imfula yatendeke ukuloka mupepi na 23:00 hrs, kabili yali miloke pa maawala ayengi. “Yaleloka iya maka nga nshi ica kuti ulupwa lwandi lonse lwalifililwe ukusendama,” e fyasosa John Twumasi, umo uwa Nte sha kwa Yehova mu Accra. Inyunshipepala ya Daily Graphic yaitile yene ukuti “kwati fye Bushiku bwa kwa Noa.” Munyina Twumasi atwalilila ukuti: “Twaeseshe ukutwalako ifipe fimo mu ŋanda yabeleleko pa muulu, lelo ilyo fye twaiswile iciibi ca kufumina pa nse ku kuya mu matabo, amenshi yapongolokele mu kati.”

Abalashi babilishe ukusoka kwa kufulumuka, lelo abengi baleshimunuka, ukutiino kuti iŋanda yabulwamo abantu—nangu line iswilemo amenshi—kuti yabe yasansalikwa ku bapuupu. Bamo balefilwa ukufuma nga ca kuti balefwaya ukuya. Umukashana we shina lya Paulina asoso kuti: “Ine na bamayo twalifililwe ukwisula ku ciibi. Amenshi yatwalilile ukufulilako, ica kuti twaninine pa mitungi ya mbao no kwikatilila ku myalo ya mu mutenge. Mu kupelako, mupepi na 5:00 hrs, abena mupalamano besu baishiletupususha.”

Mu kwangufyanya nga nshi lintu ifintu fyabeleko bwino, Inte sha kwa Yehova batendeke ukubomba. Nkashi wa Bwina Kristu uwe shina lya Beatrice ashimiko kuti: “Baeluda ba mu cilonganino baletusapika, kabili batusangile pa ŋanda ya kwa Nte munensu, apo twaileuba. Inshiku fye shitatu pa numa ya ulya mulamba, baeluda na bacaice mu cilonganino baishile mu kutwaafwa no kukololola amatipa mu ŋanda na pa nse. Watch Tower Society yatumine basopo ba kuwamisha, imiti ya kwipaya utushishi, penti, bamatileshi, amalangeti, ifisalu, ne fya kufwala fya bana. Bamunyina batutumine ifya kulya pa nshiku ishingi. Nalikuntilwe apakalamba!”

John Twumasi, uwambwilwe ku numa, ashimiko kuti: “Naebele abo twaleikala na bo bambi ukuti Sosaite yesu naitutumina basopo no muti wa kwipailako utushishi—ifyakumanina ku kuwamya iŋanda ya munkulinkuli yonse. Abantu mupepi na 40 abaleikala muli ilya ŋanda ya munkulinkuli balyafwileko ukuwamya. Nalipeeleko basopo ba kuwamisha bamo ku bena mupalamano bandi, ukusanshako umwaume umo uuli ni shimapepo we calici lya muli yo ncende. Abo momba na bo mu cilubo baletontonkanya ukuti Inte sha kwa Yehova balangisha fye ukutemwa ku bantu babo epela.”

Bamunyina ne nkashi aba Bwina Kristu balitashishe apakalamba pa kwaafwa kwabamo kutemwa uko bapokelele. Munyina Twumasi asondwelelo kuti: “Nangu cingati ifintu nalufishe muli mulamba fyali fya mutengo nga nshi ukucila pa fipe fya kukumbusuka, ine no lupwa lwandi tuleyumfwa ukuti pa mulandu wa uku kupayanya kwabamo kutemwa ukufuma ku Sosaite, natunonka ifingi ukucila fintu twalufishe.”

San Angelo—“Camoneke Kwati Icalo Calapwa”

Bakalulumpunga abapitile mu San Angelo pa May 28, 1995, bashulile imiti, bawishishe imilando ya ntambo sha malaiti, no kusha intambo sha malaiti ukuli no mulilo ukucilinganya imisebo. Inkuuka yalebutukisha ukufika kuli bakilomita 160 cile awala, ukonaula ifibombelo fya bekashi. Amayanda ukucila pali 20,000 tayakwete amalaiti. E lyo kwaishile imfula ya mabwe. Icipani Cilolekesha pa Miceele Muli ici Calo cashimike “imfula ya mabwe ukuti [intanshi yali] nga kamombo,” lyene “imfula ya mabwe iikulu ngo mupila wa softball,” kabili, mu kupelako, “imfula ya mabwe iikulu kwati ciitwalo ca grapefruit.” Imililile ya aya mabwe yali ya kukomya amatwi. Umwikashi umo asosele ukuti: “Camoneke kwati icalo calapwa.”

Pa numa ya nkuuka kwaishilebako umutalalila watekanya. Panono panono abantu batendeke ukufuma mu mayanda yabo ayapuminwe ku kumona ifyonawilwe. Imiti iyashele naiminina yalilukushiwe amabula. Amayanda ayashele nayeminina yamoneke kwati yantu basusawile. Mu ncende shimo amabwe ya mfula yafikile kuli mita umo ukufuma pa nshi. Amawindo ayengi aya mayanda na ya bamotoka yalitobelwe mu mfula, ica kuti pa numa utupimfya twa makalashi yasansaika twalebengeshima pa mabwe ya mfula ayakupile umushili. Umwanakashi umo asoso kuti: “Lintu nafikile ku ŋanda, naikele fye muli motoka wandi mu musebo no kulila. Ubonaushi bwalibipishe nga nshi, bwalicishishemo.”

Imitantikile ya kukumbusuka ne fipatala mu kwangufyanya fyapayenye ukwaafwa kwa ndalama, ifisolobelo fya kukuulila, umuti, no kupanda amano pa fya kubomba no bu busanso. Icali cisuma ca kuti, abantu abengi abo abene bene baali finakabupalu fya iyi mfula bacitile apo bengapesha ku kwaafwa bambi.

Ifilonganino fya Nte sha kwa Yehova fyalibombelepo na fyo fine. Aubrey Conner, eluda mu San Angelo, ashimiko kuti: “Ilyo fye yakalike, twatendeke ukutuma lamya ukwishiba icicitike kuli bambi. Twalyafwene no kwaafwako abanensu abashali Nte ukubika amawindo yambi, ukubika bapulastiki pa mutenge, no kucingilila amayanda ku miceele yabipa ukufika pantu twingapesha. Lyene twalilembele amashina ya bantu bonse mu cilonganino abo amayanda yabo yaonawilwe. Amayanda mupepi na 100 yalekabila ukuwamishiwa, kabili ifipe ifyo aba kukumbusuka balepayanya tafyali ifyakumanina. E co twashitile ifipe fyalundwako no kuisunsunkanya ukutendekako umulimo. Bonse pamo, baNte mupepi na 1,000 baliitemenwe ukwaafwa, impela ya mulungu imo na imo balefika mupepi na 250. Uko baalefuma kwalepele fye na bakilomita 740. Bonse babombele ukwabulo kuleka, ilingi line imiceele yaleba amadigiri celcius 40 ukukaba. Nangu fye ni nkashi uwa myaka ya bukulu 70 alebomba na ifwe pa mpela ya mulungu iili yonse ukufumyako fye pa mpela ya mulungu imo, kabili ilyo lyali ni lintu iŋanda yakwe ine yalewamishiwa. Kabili pali ilya mpela ya mulungu alininine pa mutenge wakwe wine ukulaafwako ukulungisha!

“Ilingi line twaleumfwa uko abapita nshila balesosa abati, ‘Bushe te kuti ciwame nga ca kuti aba fya mapepo bambi na bo bengacitila abo bapepa na bo ifya musango yu?’ Abena mupalamano besu balipeshiwe amano ukumona ibumba lya bantu ba kuitemenwa 10 ukufika kuli 12 (ukusanshako bankashi) bafika pali Cisano ulucelocelo pa ŋanda ya kwa Nte, abaipangasha ukuwamya nelyo fye ukupanga cipya cipya umutenge ukwabula ukulipilisha. Ilingi line umulimo walepwa fye pa mpela ya mulungu imo. Inshita shimbi, akampani ka ku calo kuti nakaswangana ukubika umutenge lintu ibumba lyesu lilefika pa ŋanda iikonkelepo. Twalefumya no kubika umutenge umbi no kuwamya pa lubansa ilyo bashilapwa ukuwamya umutenge wabo. Inshita shimo shimo baleleka ifyo balecita no kulatutamba!”

Munyina Conner asondwelelo kuti: “Ifwe bonse tuli no kulafuluka ifya kukumanya twaipakishe capamo. Natwisaishibana bwino ukupitila mu nshila yapusanako pa kulangisha no kulangwa ukutemwa aba bwananyina ukwacilapo. Tuleyumfwa ukuti ici cili fye kusondela libela ukwa fyo cili no kuba mu calo cipya ica kwa Lesa, mu kuba na bamunyina ne nkashi ukwafwana pa mulandu wa kuti mu cine cine balefwaya.”—2 Petro 3:13.

Kobe—“Icitantaala ca Mbao, Indaka ne Mibili ya Bantunse”

Abekashi ba mu Kobe balingile ukuba abaipekanya. Ee, pa September 1 lyonse balabaka Ubushiku bwa Kucilikila Amasanso. Abana be sukulu balesha ifya kucita nga kwaba icinkukuma, abashilika mu ndeke sha pakapaka balesha ifya kupususha abantu, ne cipani cilolekesha pa fya kushimya umulilo filaletako bamashini bakweseshako ifinkukuma, umo abalefwaya besha ifyo bengacita pa kupusuka ilyo bali mu cibokoshi icili fye ngo muputule ubukulu icilesunkana no kutelententa kwati fye cinkukuma ca cine cine. Lelo lintu icinkukuma ca cine cine cacitikeko pa January 17, 1995, amapekanyo yonse yamoneke ukuba aya cabe cabe fye. Amayanda ayengi yaliwile—icintu ico bashabalile abamonapo ilyo baleesha. Amashitima yalifulamwike; ifiputulwa fimo ifya misebo fyalimbawike cibi; imipaipi ya mwela na menshi yalitulaike; amayanda yalebongoloka kwati fibokoshi. Magazini wa Time alondolwele cilya ca kucitika ati “icitantaala ca mbao, penti ne mibili ya bantunse.”

Lyene pakonkele umulilo. Ifikuulwa fyalibilime ilyo abashimya umulilo abafuupulwa bacilikilwe mu milongo iitali iya bamotoka bashaifulila. Abalefika ukubelele umulilo balesanga ukuti takwali amenshi apantu imipaipi ya mu musumba yalyonawilwe nakalya nakalya. Umulashi umo atile: “Ubushiku bwa kubalilapo kwali ukutulumushiwa nga nshi. Nshabala ncepelwapo amaka nga filya ukutula apo nafyalilwa, pa kwishiba ukuti kwaliko abantu abengi nga nshi abashiikilwe muli yalya mayanda yalebilima. Kabili pa kwishiba ukuti tapali ico nali no kucitapo.”

Bonse pamo, abantu mupepi na 5,000 balipaiwe, kabili ifikuulwa mupepi na 50,000 fyashele ifitantaala. Mu Kobe mwali fye iciputulwa cimo ica fya kulya ilintu ifyalekabilwa fyali fiputulwa fitatu. Pa kusanga amenshi bamo bayalukile ku kukula amenshi ya fiko ukufuma mu mipaipi ya menshi iyaonaika. Abashakwete amayanda abengi babutukile ku matenti kumo kumo, uko balepeelako ifya kulya, umuntu umo umo ukupoka utumupunga fye utunono pa bushiku bumo. Ukukanaikushiwa kwalisalangene mu kwangufyanya. Umwaume umo ailishenye ukuti: “Abalashi tabalacitapo icili conse. Nga ca kuti twatwalilila fye ukubalolela tuli no kufwa ku nsala.”

Ifilonganino fya Nte sha kwa Yehova mu Kobe na mu ncende shashingulwikeko fyaliiteyenye mu kwangufyanya. Kensha wa ndeke ya pakapaka uwaimwenene uko balebomba atile: “Naile ku ncende kwabelele ubusanso pa bushiku bwa cinkukuma no kupoosa umulungu umo kulya. Lintu nafikile pe tenti limo, pali icimfulumfulu nga nshi. Tapalipo ifya kukumbusuka ifili fyonse ifyalepayanishiwa. Ni Nte sha kwa Yehova fye beka e babutukile kuli cilya cifulo, ukubombe milimo yalekanalekana.”

Mu cine cine, kwaliko umulimo wa kubomba uushaikulila. Amayanda ya Bufumu 10 tayali ayalinga no kubomfiwa, kabili Inte ukucila 430 tashakwete amayanda. Amayanda yalundwako 1,206 umo baleikala yalekabila ukuwamishiwa. Te ico ceka lelo indupwa sha Nte 15 abafwile muli bulya busanso shalekabila nga nshi icisansamushi.

Inte mupepi na 1,000 ukufuma muli cilya calo conse shaliitemenwe ukubomfya inshita yabo ku kwaafwako mu mulimo wa kuwamya. “Lintu twabombela pa mayanda ya basambi ba Baibolo abaali bacili tabalabatishiwa,” e fyasosa munyina umo, “lyonse twaleipushiwa ukuti, ‘Bushe ni lunga twalalipila pali ifi fyonse?’ Lintu twabebele ukuti umulimo waleafwilishiwa ukupitila mu filonganino, balitutashishe, ukusoso kuti, ‘Cintu twasambilila nomba cafikilishiwa!’”

Abengi balipeshiwe amano pa nshila Inte shayankwililemo mu kwangufyanya kabili ukwabula ukushako kuli bulya busanso. Kensha wa ndeke uwambwilwe ku numa atila: “Nalipeshiwe amano apakalamba. Mwitana amuti ‘munyina’ kabili ‘nkashi.’ Ninjimwena inshila mwafwaninamo; imwe mwe bantu mu cituntulu muli ba bwananyina.”

Inte abene basambilile amasambililo yakatama kuli cilya cinkukuma. Nkashi umo asumine ukuti: “Lyonse ntontonkanya ukuti ilyo ukuteyanya kulecililako kukula, e lyo cicililako kwafya ukusakamana umuntu umo umo.” Lelo ukusakamana kwabondoka uko asakamenwe kwayalwile imimwene yakwe. “Nomba ninjishibo kuti Yehova alatusakamana te pamo fye ngo kuteyanya lelo na kabili nga bantu umo umo.” Nangu cibe fyo, ukwiluluka kubelelela ukufuma ku masanso kuli fye pa ntanshi apa.

Ukwiluluka Kubelelela Nakupalama!

Inte sha kwa Yehova shenekela mu kuswatuka inshita lintu ubumi bwa buntunse ne mikalile fishakalepumfyanishiwa na kabili ku masanso. Mu calo cipya ica kwa Lesa, umuntu akasambilishiwa ukubombela pamo ne filengwa na Lesa ifya pe sonde. Ilyo abantunse bakalasotola ifibelesho fya kaso, tabakasansalikwe nga nshi ku masanso ya mu fyabumbwa.

Ukulundapo, Yehova Lesa—Kabumba wa fya maka—akashininkisha ukuti ulupwa lwakwe ulwa buntunse no bubumbo bwa pe sonde tafiletiinishiwa na kabili ku fyabumbwa ifya maka. E lyo isonde likaba paradise mu cine cine. (Esaya 65:17, 21, 23; Luka 23:43) Ubusesemo bwa pa Ukusokolola 21:4 ubutila: “Akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya,” buli no kufikilishiwa mu kubamo ubukata.

[Icikope pe bula 5]

Beatrice Jones (ku kuso) alelangilila fintu wene na bambi basuntinkene capamo pa kwabuka bamulamba

[Icikope pe bula 6]

Umulimo wa kukumbusuka pa numa ya bakalulumpunga