Ubumi Bwawaminako—Nabupalama!

ELENGANYA uusabankanya ifyo imiceele ikaba uo ukusobela kwakwe ilingi line nga nshi kulafikilishiwa. Nga ca kuti mu lyashi lya cungulo bushiku asobela ukuti ubushiku buli no kukonkapo ikaloka, taushingashinga ukusenda umwamfuli lintu wafuma pa ŋanda ulucelo lwakonkapo. Ifyo wamwishiba kale calikulenga ukumucetekela. Ulabombela pa cintu asosa.

Nomba, bwaba shani ubwashintililwapo ubulayo bwa kwa Yehova ubwa kuti akaleta ubumi bwawaminako pe sonde lya paradise? Cisuma, cinshi cintu ukwishibikwa kwakwe ukwa ku numa kwalanga? Ukufikilishiwa kwa masesemo ya Baibolo mu kulengama e cipanga ukwishibikwa kwa kwa Yehova. Aba ni Lesa uwaba no kulungika kushingafilwa ne cine. (Yoshua 23:14; Esaya 55:11) Amalayo ya kwa Yehova Lesa yaliba ayashintililwapo nga nshi ica kuti pa nshita shimo alanda ulwa fya kuponako fya ku nshita ya ku ntanshi kwati no kucitika fyalicitika kale. Ku ca kumwenako, ukukonkesha pa bulayo bwakwe ubwa calo cipya umo imfwa no kuloosha fishakabemo na kabili, tubelengo kuti: “Nafiba [amapaalo yasobelwa].” Mu mashiwi yambi, “Fyaliba cishinka!”—Ukusokolola 21:5, 6, NW, utulembo twa mwi samba.

Ee, ukufikilishiwa kwa masesemo yapita aya kwa Yehova kutupeela ukucetekela kwa kuti ubulayo bwakwe ubwa bumi bwawaminako ku mutundu wa muntu bukafishiwapo. Lelo ni lilali lintu ubu bumi bwawaminako bukesa?

Ubumi Bwawaminako—Lilali?

Ubumi bwawaminako nga nshi buli no kwisa mu kwangufyanya! Kuti twaba abashininkisha ulwa ico pantu Baibolo itila ifintu fyabipa ifingi fikacitika pa ntanshi fye Paradise talaletako ubumi bwawaminako. Ifyo fintu ifyabipa nomba filecitika.

Ku ca kumwenako, Yesu Kristu asobele ukuti kwali no kubako imbuli shikalamba. Atile: “Uluko lukemino luko, no bufumu bukemino bufumu.” (Mateo 24:7) Ubu busesemo bwalifikilishiwa. Mu myaka ukutendeka 1914 ukufika 1945, kwaliko inkondo sha calo shibili, kabili ishi shalikonkwapo ne nkondo na shimbi ishingi umo inko shalwishanya. “Pa cishinte ca avareji wa cila mwaka, impendwa ya bafwa mu nkondo muli ici ciputulwa ca nshita [ukutula pa Nkondo ya Calo iya II] yaba ukucila pa miku ibili pa mpendwa ya bafwile mu mwanda wa myaka uwalenga 19 kabili yaba imiku [7] ukucila pa bafwile mu mwanda wa myaka uwalenga 18.”—World Military and Social Expenditures 1993.

Ukwanana kwa malwele bushininkisho na bumbi ubwa kupalama kwa bumi bwawaminako mu Paradise. Yesu asobele ukuti kwali no kubako ‘ifikuko uku no ku.’ (Luka 21:11) Bushe ubu busesemo bwalifikilishiwa? Ee. Pa numa ya nkondo ya calo iya kubalilapo, Spanish flu aipeye abantu ukucila pa mamilioni 20. Ukutule lyo, kansa, ubulwele bwa ku mutima, ubulwele bwa mpepo, AIDS, ne ntenda shimbi fyalipaya amamilioni ya bantu. Mu fyalo filelunduluka, amalwele ayafuma ku menshi yakowela (ukusanshako ukunyonga kwa mu mala ne nsokanda) yalesenda amamilioni ya myeo cila mwaka.

Yesu na kabili atile: “Kukaba ne fipowe.” (Mateo 24:7) Nga fintu cimwenwe mu cipande citangilileko, abapiina ba mu calo tabalekumanisha imiliile. Ulu luli lubali na lumbi ulwa bushininkisho bwa kuti ubumi bwawaminako nga nshi mu Paradise buli no kwisa mu kwangufyanya.

“Kukaba ne finkukuma fikalamba,” e fyasosele Yesu. (Luka 21:11) Ici na co califikilishiwa mu nshita yesu. Ukutula 1914 ubonaushi bwa finkukuma fipomona bwalisenda imyanda ya makana iya myeo.

Baibolo mu kulundapo isoso kuti “inshiku sha kulekelesha” shikeshibikilwa ku kwaluka kwa bantu. Bali no kuba “abaitemwa” kabili “abatemwe ndalama,” kabili abana bali no kuba “aba bucintomfwa ku bafyashi.” Abantu mu cinkumbawile bali no kuba “abatemwo kwangala ukucisho kutemwa Lesa.” (2 Timote 3:1-5) Bushe taulesumino kuti abengi balelinga muli ubu bulondoloshi?

Ilyo abantu abalecite fyabipa baleya balefulilako, kuli ukwingilishiwako kwa bupulumushi. Ici na co calisobelwe. Ukulingana na Mateo 24:12, Yesu alandile ulwa “kufulisha kwa bupulumushi.” Mu kupalishako walasumino kuti imisoka nomba naibipilako ukucila fintu yali imyaka yafumako. Abantu ukuli konse bali no mwenso wa kuti bali no kwibilwa, ukufutikwa, nelyo ukucenwa mu nshila imo.

Inkondo, ukwanana kwa malwele, ukubulisha kwa fya kulya, ifinkukuma, imisoka ileingilishiwako, no kubipilako mu kwampana kwa buntunse—fyonse ifi filemoneka ilelo, kwati fye ni fintu Baibolo yasobele. ‘Lelo bushe ifi fintu tafyacitika ukupulinkana ilyashi lyonse ilya buntunse?’ e fyo pambi wingepusha. ‘Cinshi cipuseneko pa lwa kasuba kesu?’

Kwalibako imbali shimo ishacishapo kucindama isha mu cilecitika ilelo. Baibolo taisoso kuti ulubali ululi lonse lumo pamo nga ukubulisha kwa fya kulya, mu lwine lweka luli no kuba bushinino bwa kuti tuli mu nshita ya mpela no kuti ubumi bwawaminako nabupalama. Amasesemo ya Baibolo pa lwa nshita ya mpela yali no kufikilishiwa pa nkulo yabula bukapepa.—Mateo 24:34-39; Luka 17:26, 27.

Mu kulundapo, cili iceni nga nshi ukuti imbali shimo isha busesemo bwa kwa Yesu shingalafikilishiwa pali lelo—maka maka isha pa lwa kubulisha kwa fya kulya na malwele yaleanana. Mulandu nshi? Pantu ukutulukusha kwa mu fya sayansi takwatala akufika pa kalume nga pantu kufikile nomba. Ukwishiba kwa fya miti ya cipatala ne misango ya kundapilamo nafilunduluka nga nshi nelyo ukusalangana mpanga yonse. Ni Lesa fye eka e wali na maka ya kusobela mu Cebo cakwe, Baibolo, ukuti pa nshita ya musango yo, amalwele ne fipowe fyali no kubipilako, no kukanawaminako.

Apantu amasesemo yonse aya mu Baibolo pa lwa nshita ya mpela, nelyo “inshiku sha kulekelesha,” yalefikilishiwa, cinshi cintu twingasondwelela? Ca kuti ubumi bwawaminako nabupalama! Lelo bukesako shani?

Ubumi Bwawaminako—Shani?

Bushe uletontonkanya abantunse kuti baletako Paradise? Ukupulinkane lyashi lya kale ukufika kuli kano kasuba, kwalibako imisango yalekanalekana iya makamfulumende ya buntunse. Yamo yalyesha na maka ukwikusha ukukabila kwa bantu. Lelo, impika ishingi shilebipilako. Mu fyalo ifikankaala ne fipiina, amakamfulumende yalelwishanya no kubomfye miti ikola, amayanda yashalondoloka, ubupiina, imisoka, ukubulwe ncito, ne nkondo.

Nangu fye amakamfulumende nga yengapikululapo shimo muli ishi mpika, tayengapayanya ukulubuka kwa mupwilapo ukufuma ku bumi bwabipa; kabili tayengapwisha ubukote ne mfwa. Mu kumfwika, abantunse tabakatale abaleta Paradise kuli ili sonde.

Baibolo mu kubamo amano itila: “Mwitetekela bakankaala, nangu mwana wa muntu uo takuli ukupususha muli wene.” Ni muli ani kanshi, tulingile ukutetekela? Baibolo yasuka ukuti: “Alishuka uo Lesa wa kwa Yakobo e kwafwa kwakwe, uo icilolelo cakwe cili kuli Yehova Lesa wakwe.” (Ilumbo 146:3, 5) Nga twabika isubilo lyesu muli Yehova Lesa, tatwakatale atulengwe nsoni.

Cine cine Umo uwaba na mano na maka ya kubumba isonde, akasuba, ne ntanda kuti na kabili alenga isonde ukuba paradise. Kuti alenga abantunse ukuipakisha ubumi bwawaminako. Icili conse cintu Yehova Lesa aimina ukuti acite, kuti acita kabili akacipwilikisha. Icebo cakwe citila: “Icebo conse icifuma kuli Lesa tacakabulwe amaka.” (Luka 1:37) Lelo ni shani fintu Lesa akaletako ubumi bwawaminako?

Yehova akaletela umutundu wa muntu ubumi bwawaminako ukupitila mu Bufumu bwakwe. Kabili Ubufumu bwa kwa Lesa cinshi? Aaba ni kamfulumende wa cine cine mu kuba na Kateka wasontwa na Lesa, Yesu Kristu. Ubufumu bwa kwa Lesa bwabela mu muulu, lelo mu kwangufyanya bukaleta amapaalo yawamisha no bumi bwawaminako ku bekashi aba pe sonde lya Paradise.—Esaya 9:6, 7.

Napamo kale kale walibeleshanya ne pepo lya cilangililo ilya kwa Yesu, ilisangwa muli Baibolo pali Mateo 6:9-13. Ulubali lwa lilye pepo kuli Lesa lutila: “Ubufumu bwenu bwise. Ukufwaya kwenu kucitwe pano nse nga mu muulu.” Mu kumfwana ne lyo ipepo, Ubufumu bwa kwa Lesa ‘bukesa’ ku kubombe mifwaile ya kwa Yehova Lesa iya kwi sonde. Kabili caba mifwaile yakwe ukuti isonde libe paradise.

Icipusho cimo ica kulekelesha caima ica kuti: Cinshi cintu ufwile ukucita pa kuipakisha ubumi bwawaminako muli Paradise uuleisa?

Ico Ulekabila Ukucita

Yehova Lesa mu kubamo kutemwa alitambika icilolelo ica bumi bwawaminako mu Paradise kuli bonse abacito kufwaya kwakwe. Baibolo itwebo kuti: “Abalungama bakapyaninine calo, no kwikalamo inshiku pe.” (Ilumbo 37:29) Lelo bushe cinshi cilenga umuntu ukuba uwalungama mu menso ya kwa Lesa?

Pa kutemuna Yehova tulekabila ukusambilila ifyafulilako pa lwa cintu afwaya ifwe ukucita. Nga twapokelela ukwishiba pa lwa kwa Lesa no kukubomfya mu myeo yesu, kuti twaikala kuli pe na pe. Mwi pepo kuli Lesa, Yesu atile: “Awe uyu e mweo wa muyayaya, ukuti bamwishibe, mwe Lesa wine wine mweka, no yo mwatumine, ni Yesu Kristu.”—Yohane 17:3.

Icitabo icilanda ulwa kwa Yehova Lesa na Yesu Kristu caba Cebo ca kwa Lesa, Baibolo. Caba ni cimo ica fya bupe fya kwa Yehova ifyaumisho mutengo. Baibolo yaba nga kalata uo wishi wakwato kutemwa atuma ku bana bakwe. Ilanda ulwa bulayo bwa kwa Lesa ubwa kuletako ubumi bwawaminako ku mutundu wa muntu kabili itulanga fintu twingabunonka. Baibolo itulenga ukwishiba cintu Lesa aacita ku numa na cintu akacita ku nshita ya ku ntanshi. Na kabili itupeela ukupanda amano ukubomba pa fyo twingatunguluka mu kubomba ne mpika shesu nomba. Mu cituntulu, Icebo ca kwa Lesa cilatusambilisha ifya kusangako insansa muli cino calo ca macushi.—2 Timote 3:16, 17.

Inte sha kwa Yehova mu kubamo insansa bakakutantikila isambililo lya Baibolo ilya mu ŋanda ilya pa fye. Sambilila ifyo wingakwata ubumi bwa nsansa shakulilako nomba, mu kuba ne cilolelo ca bumi bwacilapo kuwama mu nshita ya ku ntanshi ipalamishe.

[Icikope pe bula 5]

Amasesemo ya Baibolo yalangililo kuti ubumi bwawaminako nabupalama

[Icikope pe bula 7]

Ubufumu bwa kwa Lesa bukaletako ubumi bwawaminako ku mutundu wa muntu