Babungene nga Bakalumbanya ba Buseko

ABANTU ba kwa Yehova Lesa aba pa kale bakambishiwe ‘ukuba fye abasamwa’ lintu babungene ku kupepa. (Amalango 16:15) Amabungano ya Citungu aya “Bakalumbanya ba Buseko” aya 1995/96 mu kushininkisha yalipeela Inte sha kwa Yehova imilandu isuma iya kubela aba buseko.

Ukutula apo uku kukonkana kwa mabungano kwatendekele, kwalikuulilila icitetekelo. Na kabili kwalilanga ifya kusanga ubuseko mu calo cabulo buseko. Lekeni tulanguluke ibungano ubushiku no bushiku.

‘Lumbeni Yehova . . . Samweni!’

Umutwe uli pa muulu uwa bushiku bwa kubalilapo ubwe bungano washimpilwe pe Ilumbo 149:1, 2. Ilyashi lyaleti “Twalikwato Mulandu wa Kwawila” lyabebetele ukufikilishiwa kwa busesemo bwa muli Esaya icipandwa 35. Bwafikilishiwe muli Israele wa pa kale kabili ukucilisha mu kasuba kesu mu kuba no kubweshiwa kwa bakapepa ba kwa Yehova ku lubanda no butuntulu muli paradise wa ku mupashi. Muli fyo, abalebungana balikwete umulandu wa kwawila pa co Lesa apekanishisha abantu bakwe muli paradise wa ku mupashi na muli Paradise wa ku mubili uuli no kwisa uupalamishe nga nshi.

Ilyashi likalamba, “Abapaatulwa nga Bakalumbanya ba Buseko mu Kusaalala kwa Calo,” lyayaswike icipusho ca kuti: Cinshi catupaatula kuli cino calo? Caba kupepa kwesu Yehova ukwaikatana. Te mulandu na kuntu Inte sha kwa Yehova bekala pali lino isonde, balanda no kusambilisha mu kumfwana. Balasekelela, na kabili, mu mifwaile yakulisha iya kwa Yehova iya kushisha ishina lyakwe ilya mushilo no kwebela bumulopwe bwakwe ukupitila mu Bufumu bwakwe. Ni shani, nangu ni fyo, fintu Yehova atwaafwa ukwakana mu mifwaile yakwe? Alituseekesha icine ca Cebo cakwe ica mushilo. Lesa alitupeela umupashi wakwe uwa mushilo. Alitupaala mu kuba na bumunyina bwa mu kusaalala kwa calo ne mitantikile ya kupepa kwasanguluka. Ulupwa lwesu ulwa pa kati ka nko lutwaafwa ukubombela Yehova mu kuba no buseko bukalamba ubwa ku mutima.

Ilyashi “Ukupaatukako no Kuibaka Ababula Akabi ku fya Pano Isonde” lyakomaile pa kukabila kwa kusengauka amatoni ya kapaatulula na malekano. (Yakobo 2:5-9) Bamo kuti pambi baleenda fye na abo bakwata icikulilo capala icabo nelyo imibele ya mu fya ndalama, ukulekelesha Abena Kristu banabo ababa abapiina nelyo abapusulwa. Bambi kuti pambi bakongamina ku kubisha abakwata ifishingamo mu cilonganino. Balalaba ukuti ishuko lyakulisha ilyo umuntu uuli onse engakwata ni lilya ilya kuba Inte ya kwa Yehova. E ico, tatufwile ukuleka ukukongama kwa ku calo ukutulenga ukuba na kabi no kupumfyanya umutende wa cilonganino.—2 Petro 3:14.

Ilyashi lyaleti “Bushe Ninjipekanya Ukwingila mu Cupo?” lyalondolwele ukuti abengi bengila mu cupo mu kususwa. Bamo bengila mu cupo pa kufyuke mibele yaafya pa ŋanda nelyo pa mulandu wa kuti abanabo baleingila mu cupo. Nangu cibe fyo, imilandu isuma iya kwingilila mu cupo isanshamo ukufwaisha kwa bonse babili ukwa kusupila amabuyo ya teokrasi, ukutemwa kwa cine cine, ukukabila kwe senge no kucingililwa, no kufwaisha ukukwata abana. Ukukansha kwa ku mupashi kwalikatama mu kupekanishisha icupo. Pa mbali ya fintu fimbi, kwalibako ukukabila kwa kulundulula imibele ifwaikwa pa kufwala ubuntu bupya. Calibamo amano na kabili ukupimununa nampo nga uuleenekelwa ukuba umunobe wa mu cupo alepeela ubushininkisho bwa kukwata ukwampana kwa cine cine na Yehova kabili nga alabomba na bambi mu mucinshi. Ukulomba ukufundwa ku Bena Kristu bakosoka na ko kwaliba bwino.—Amapinda 11:14.

Uku kulanshanya kwa kubuutusha kwakonkelwepo ne lyashi lyaleti “Abafyashi Abacankilwa mu Bana Babo.” Ukufyalwa kwa mwana ilingi line kuba kashita ka kusekelela kukalamba. Nangu cibe fyo, ukufyala abana na kabili kuletako ukushingamwa kukalamba. (Ilumbo 127:3) Muli fyo, caliba icacindama ukuti abana basambilishiwe ukutemwa Yehova. Abafyashi kuti bacite ci pa kulanda pa lwa kwa Yehova lyonse ku bana babo no kubomfya ifishinte fya Cebo cakwe mu lupwa.

Ubushiku bwa kubalilapo ubwe bungano bwasondwelele ne cishaleenekelwa—ukukakulwa kwa broshuwa mupya Inte sha kwa Yehova na Masomo. Uyu broshuwa alalondolola mu kumfwika ukuti Inte “bakoselesha abacaice babo ukubombesha no kukatamika imilimo bapeelwa pa sukulu.” Ulu lupapulo na kabili lulondolola ifya kufumamo fyawamisha ifye sukulu lya shibukeni ilyo Inte sha kwa Yehova shatungulula pa myaka iingi mu Nigeria, Mexico, ne fyalo fimbi. Broshuwa alingile ukwaafwa bakafundisha ukwishiba ukuti twalikatamika amasomo apakalamba nga nshi.

‘Muletuula Ilambo lya Malumbo Kuli Lesa.’

Uyu mutwe wa bushiku bwalenga shibili washimpilwe pa AbaHebere 13:15. Programu wa lucelo akwetemo ukukonkana kwa malyashi ukwaleti “Ukwankula ku Bwite bwa Kulumbanya Yehova.” Umushinku tawaba cipindami ku kwankula kuli ubu bwite. Ilumbo 148:12, 13 licincisha abalumendo, abakashana, abakote, na baice ukulumbanya Yehova. Ababomfi ba kwa Yehova abengi aba buseko balingilishako ilumbo lyabo. Mu kusaalala kwa calo, ukucila pali 600,000 bakana mu mibombele ya kushimikila iya nshita yonse, nelyo umulimo wa bupainiya. Ukucila pali 15,000 babomba umulimo wa bupainiya bwaibela, kabili abacila 15,000 baba mu mulimo wa pa Bethel.

“Ukubomba Muli Bucishinka no Kuteyanya kwa kwa Yehova” lyali lyashi ilyalangishe ukuti bucishinka bwalikatama ku babomfi ba kwa Lesa. Ukuba uwa bucishinka kuli Yehova cipilibula ukulambatila kuli wene mu kuba no kuipeelesha kwakosa ica kuti kwabomba nge ca kukambatikilako ica maka. Bucishinka bufwaya ukuti tusengauke ukutoba amafunde ya mu Baibolo ku mufulo, nampo nga bambi baletumona nelyo iyo. Na kabili bufwayo kuti muli bucishinka tusumbule ifisambilisho fya Baibolo ifisangwa muli bamagazini ba Ulupungu lwa kwa Kalinda na Loleni! pamo pene ne ca kulya ca ku mupashi conse icipayanishiwa na Watch Tower Society. Pa numa ya ili lyashi pakonkele ilyashi lya lubatisho. Mwandi kwali ubuseko lintu abaleya ku lubatisho bapeele ubushininkisho bwa kuipeela kwabo kuli Yehova!

Amashiwi ya pali Hosea 4:1-3 e pashimpilwe ilyashi lya mu cungulo kasuba ilyaleti “Ubulumba Nelyo Ubupulumushi—Ni Cili Kwi Usalapo?” Nangu cingati imimwene ya calo iya bulumba yalibotelela, Abena Kristu balingile “ukucincila” ku kusalapo ubulumba. (2 Petro 1:5) Ici citendekela ku fyo umuntu atontonkanya. Nga ca kuti amatontonkanyo yakwe ya bulumba, akalalanda amashiwi yasanguluka, ayasuma, kabili aya kukuulilila kabili akatukusha ukuba umufumacumi ilyo alebomba na bambi. Ukusalapo ubulumba na kabili kubimbamo ukutukuta ukuba uulangulukilako kabili uwa cililishi ku Mwina Kristu munobe uulecula ku kukanshika nelyo ukupopomenwa.—1 Abena Tesalonika 5:14.

Ilyashi na limbi ilyaleti, “Ibakeni ku Fiteyo fya kwa Kaseebanya,” lyasokele Abena Kristu pa lwa kuisansalika abene ku kusonga kwa fibanda. Mu lubali lwa kundapa amalwele, Abena Kristu bakabila ukuba abapempwila ku nshila sha kupiminamo, pamo nga ukulaalikisha mu tulo, isho shisanshamo ifya kupandapanda. Nangu cibe fyo, cintu abantu bacita ku kusakamana ubutuntulu bwabo ubwa bumi waba mulandu wa pa lwabo.

Ubushiku bwalenga shibili bwasondwelele mu kuba ne cishaleenekelwa icaletele ubuseko—ukukakulwa kwa citabo icipya icilinga mwi tumba icapekanishiwilwa ku kwaafwa abantu ba mitima ya bufumacumi ukulunduluka mu kwangufyanya ukufika ku kuipeela no lubatisho. Ici citabo cipya ica mabula 192 cakwata umutwe wa kuti Ukwishiba Uko Kutungulula ku Mweo wa Muyayaya. Icitabo ca Ukwishiba cilondolola icine mu nshila ya kukuulilila. Tacilanda sana pa kusuusha ififundisho fya bufi. Ululimi lwaumfwika no kulundululwa kwa fyebo ukulingana no mo fyakonkanina kulingile ukucilenga ukuba icayanguka ukubomfya ici citabo ku kutungulula amasambililo ya Baibolo no kwaafwa abantu ukufumbata ukwishiba kwa kukafyo mutima ukwa kwa Lesa.

‘Sekeleleni no Kwanga Pe Pe’

Aya mashiwi ukufuma pali Esaya 65:18 yali e mutwe wa bushiku bwalenga shitatu ubwe bungano. Ukufikilishiwa kwa masesemo ya Baibolo kusonta kuli 1914 ngo mwaka lintu iyi micitile yabipa yaingile mu nshiku sha iko isha kulekelesha. E ico, ukukonkana kwa malyashi ukwali no mutwe wa kuti “Bakalumbanya ba Buseko mu Kusondwelela kwa Ino Micitile ya Fintu” kwalengele ibumba ukukutikisha. Bakalanda balangishe ifyo amabilioni yaba finakabupalu fya mupashi wa bufunushi kabili uwa lukaakala uwa ici calo. Mu kupita kwa nshita, bakapingulwa pamo ngo lubali lwa calo ico Satana abapo kateka. Muli fyo, nomba e nshita ya kusalapo. Lubali nshi tulefwaya ukubako? Bushe tulefwaya ukupepa Yehova no kusumbula bumulopwe bwakwe, nelyo bushe tuli no kuleka Satana ukuba kateka wesu pa kucite fintu ifimutemuna? Ifwe bonse tufwile ukwiminina ku lubali lwa kwa Yehova mu kukumanina.

Ilyashi lya cintubwingi ilye bungano, “Lumbanyeni Imfumu ya Muyayaya!” lyalengele bonse abasangilweko ukukwata ifya kutontonkanyapo. Nangu cingati abantunse banakuka te kuti bomfwikishe imfundo ya muyayaya, Yehova aliyumfwikisha bwino bwino. Kemba wa malumbo aimbile ati: “Yehova ni Mfumu umuyayaya umuyayaya.” (Ilumbo 10:16) Iyi Mfumu ya muyayaya yalisula inshila ku mutundu wa muntu ukuipakisha umweo wa muyayaya ukupitila mu Mwana wa iko, Yesu Kristu. (Yohane 17:3) Kalanda atile: “Ee, ifwe fwe bantunse ababembu kuti twanonka umweo wa muyayaya ukupitila mu masomo ya bulesa ne citetekelo mwi lambo lya cilubula ilya kwa Yesu.”

Ilyo ibungano lyalepalamina ku kupwa, abasangilweko balikuulililwe ku lyashi lya kupelako, ilyakwete umutwe wa kuti “Ukulumbanya Yehova mu Buseko Akasuba na Kasuba.” Cali ca kukafyo mutima ukupokelela amalipoti ya kulunduluka kwa mulimo wa kupanga abasambi ukupulinkana isonde. Kabili ababungene baliseshiwe ‘ukulacindika Yehova inshiku shonse no kutasha ishina lyakwe umuyayaya.’—Ilumbo 145:2.

Imicitile ya bukatu iishingalondololwa yalipusula abantu ubuseko. Nangu ni fyo, abantu abacetekela muli Yehova mu kukumanina kuti bakwata ubuseko bwa bukapepa. Pamo nga aba bwananyina abasangwa mu kusaalala kwa calo, Inte sha kwa Yehova muli fyo kuti babilisha amashiwi yakonkapo aya pe Ilumbo 35:27, 28 ayatila: “Lekeni baaule no kusamwa ababekelwo bulungami bwandi, no kutila pe, Yehova alumbaniwe, uubekelwo mutende wa mubomfi wakwe. Kabili ululimi lwandi lukalando bulungami bwenu, lukalando kumutasha akasuba konse.”

[Ifikope pe bula 7]

Indupwa shili no kunonkelamo muli broshuwa wa mutwe wa kuti “Inte sha kwa Yehova na Masomo”

[Ifikope pe bula 8, 9]

Icitabo cipya ica “Ukwishiba Uko Kutungulula ku Mweo wa Muyayaya,” cilondolola icine ca Baibolo mu nshila ya kukuulilila

[Icikope pe bula 9]

Abengi balibatishiwe ku kulangilila ukuipeela kwabo kuli Yehova

[Icikope pe bula 9]

Ababungene baliseshiwe apakalamba ku cilangililo caleti “Ukucindika Abawaminwa Ukucindikwa mu Myaka Yabo iya Bukalamba”