‘Bushe Naliba uwa Mutengo Kuli Lesa?’

“BUSHE naliba uwa mutengo? Bushe Lesa alasakamana?” Ifyo e fyali umutwe wa cipande camoneke muli Christianity Today. “Umulimo wandi uwingi nga kalemba watonta fye pa lwa bwafya bwa kucululuka,” e filondolola Philip Yancey, kalemba wa cipande. “Libili libili ndabwekeshapo icipusho cimo cine kwati untu aletonya icilonda icishipola. Ndomfwa kuli bakabelenga ba fitabo fyandi, kabili amalyashi yabo aya kupelelwa yashinina ukutwishika kwandi.”

Nakalimo na iwe wine walipapa nga Lesa alibo wasekelela mu bumi bobe. Napamo, walibeleshanya na Yohane 3:16, apalondolola ukuti “Lesa atemenwe aba pano isonde ukutemwa kwa kuti apeele Umwana wakwe uwafyalwa eka.” Nangu kuti walibelenga Mateo 20:28, apasoso kuti Yesu aishile ku “kupeelo mweo wakwe icilubula ca pa bengi.” Nalyo line kuti waipusha auti, ‘Bushe Lesa alamona? Bushe alansakamana ngo muntu?’ Kwalibako umulandu usuma uwa kusumina ukuti alasakamana, nge fyo twalamona.