Ifipusho Ukufuma ku Babelenga

Cinshi Paulo apilibwile lintu atile ‘alelaba ifya ku numa, no kusupile fya ku ntanshi’? (Abena Filipi 3:13) Bushe umuntu kuti alabe ifintu fimo ku mumbo fye?

Iyo, ilingi line nga nshi te kuti tulabeko ku cintu cimo ku mufulo fye. Icishinka cili ca kuti, tulalaba ifingi ifyo twingatemwa ukwibukisha kabili tulebukisha ifingi ifyo tufwile ukulaba. Cinshi, lyene, cintu Paulo apilibwile lintu alembele amashiwi ya pa Abena Filipi 3:13? Amashiwi yashingulukako yalatwaafwa ukumfwikisha.

Mu Abena Filipi icipandwa 3, Paulo alondolola “[apashintililo, NW] kusuubila mu fya mubili.” Alondolola icikulilo cakwe icabula akalema ica buYuda ne fyo apimpile Amalango—ifintu ifyo ifyali no kumupeela amashuko ayengi mu luko lwa Israele. (Abena Filipi 3:4-6; Imilimo 22:3-5) Nalyo line, alifutatile amashuko ya musango yo, ukuyasuula ukuti yaba ngo kulufya. Mulandu nshi? Pantu alisangile icintu cimo icawamapo—“icapulamo ica kwishiba Kristu Yesu Shikulu.”—Abena Filipi 3:7, 8.

Ubuyo bukalamba ubwa kwa Paulo tabwali kunonka icifulo casumbuka muli cino calo, lelo ukunonko “kubuuka kwa ku bafwa.” (Abena Filipi 3:11, 12) Na muli fyo, alembo kuti: “Pa kulaba ifya ku numa, no kusupile fya ku ntanshi, nkonkelela ukulola ku buyo, ku mwaala wa bwite bwa mu muulu bwa kwa Lesa muli Kristu Yesu.” (Abena Filipi 3:13, 14) Lintu Paulo atile ‘alelaba ifya ku numa,’ taloseshe mu kuti mu nshila imo alifuutile “ifya ku numa” ukufuma mu muntontonkanya wakwe. Mu cine cine alefibukisha, apantu e lintu fye apwile ukufitantawila. Na kuba, mu ciGriki ca kutendekelako, abomfya umusango wa verbu uulangilila icintu icicili cilecitika, icishilapwishishiwa. Atila “pa kulaba,” tatile “pa kuba nindaba.”

Ishiwi lya ciGriki ilyapilibulwa “ukulaba” (e·pi·lan·thaʹno·mai) lyalikwata amabupilibulo yapusanapusana, bumo bwaba “ukukanayangwako ku cintu,” nelyo “ukulekelesha.” Ukulingana na Exegetical Dictionary of the New Testament (iyalembelwe na Horst Balz na Gerhard Schneider), ifi e fintu ishiwi “ukulaba” lipilibula pa Abena Filipi 3:13. Paulo taletontonkanya lyonse pa fintu aali nasha. Alisambilile ukufimona nge fishacindama. Fyali ngo “busali” lintu fyalinganishiwa kwi subilo lya ku muulu.—Abena Filipi 3:8.

Ni shani fintu amashiwi ya kwa Paulo yengabomba ilelo? Kwena, Umwina Kristu, kuti pambi ukupala Paulo aliipusula ifintu ifingi pa kuti engabombela Lesa. Kuti pambi alilekele incito yawamisha pa kuti atampe umulimo wa nshita yonse. Nelyo kuti pambi aba mu lupwa ulukankaala ulo lwamusuula pa mulandu wa kuti talusuminisha icine. Ukuipusula kwa musango yo kulatashiwa, lelo te fintu ifilingile ukutontonkanishiwapo lyonse fye. Umwina Kristu ‘alalaba,’ alaleka ukuba uwayangwako pa lwa, “fya ku numa” pa mulandu wa nshita ya ku ntanshi iya bukata iilemupembelela.—Luka 9:62.

Ifishinte fyaikatilila amashiwi ya kwa Paulo napamo kuti fyabomfiwa mu nshila na imbi. Ni shani pa lwa Mwina Kristu uwaibimbile mu myendele yalubana ilyo talasambilila pa lwa kwa Lesa? (Abena Kolose 3:5-7) Nelyo tutile pa numa ya kusanguka Umwina Kristu, acitile ulubembu lwabipisha kabili alisalapwilwe ne cilonganino. (2 Abena Korinti 7:8-13; Yakobo 5:15-20) Kwena, nga ca kuti mu cine cine nalapila kabili alyalula inshila shakwe, ‘alisambwa.’ (1 Abena Korinti 6:9-11) Ifyacitike fyalipita. Te kuti pambi mu cine cine alabe ifyo acitile—mu cine cine, kuti caba ca mano kuli wene ukusambilila ku fintu apitilemo pa kuti tabwekeshepo ulubembu lumo lwine. Nalyo line, ‘alalaba’ mu mano ya kuti tatwalilila ukuisenuka lyonse. (Linganyako Esaya 65:17.) Pa kuba nalekelelwa pa cishinte ce lambo lya kwa Yesu, alatukuta ukulabako ku fyapita.

Pa Abena Filipi 3:13, 14, Paulo ailondolwele umwine ngo ulebutuka muli nakatango, “ukusupile fya ku ntanshi” pa kufika ku buyo. Kabutuka alolesha ku ntanshi, te ku numa. Mu kupalako, Umwina Kristu alingile ukulolesha ku mapaalo ya ku ntanshi, te ku fintu ifyashala ku numa. Paulo na kabili atila: “Nga mwaangilwe cintu umwaibela, Lesa akamusokolwela ici cine.” (Abena Filipi 3:15) E co, pepa kuli Lesa ukuti akwaafwe ukulundulule yi mimwene. Isusha amatontonkanyo ya kwa Lesa ayasangwa muli Baibolo mu muntontonkanya obe. (Abena Filipi 4:6-9) Etetula pa kutemwa kwa kwa Yehova uko akutemwa na pa mapaalo uipakisha pa mulandu wa uko kutemwa. (1 Yohane 4:9, 10, 17-19) Lyene, ukupitila mu mupashi wa mushilo Yehova akakwaafwa ukukanayangwako pa lwa fintu washa ku numa. Lelo, ukupala Paulo, ukalolesha ku nshita ya ku ntanshi iya bukata.—Abena Filipi 3:17.