Ilyashi lya Bakabilisha ba Bufumu

Icine ca Baibolo Catwalilila Ukushimikilwa mu Ireland

MU MYAKA ya nomba line mu calo ca mimonekele yayemba ica Ireland mwalipona icimfundawila icishaikulila. Pa nshita imo ine, abantu ba mu Ireland balyankulako bwino ku bukombe bwe subilo ubwa muli Baibolo ubuletwa kuli bene ne Nte sha kwa Yehova. Ifya kukumanya fili pano ukufuma ku Ireland e filekoshe co cishinka.

▪ Mu Dublin umo uwa Nte sha kwa Yehova no mwana wakwe umwanakashi umunono baalebomba umulimo wa kushimikila kwa ku mwinshi no mwinshi. Bakumenye umwanakashi uwe shina lya Cathy uwakwatishe ncito pa mulandu wa bana ubwingi. Nte alombele nga umwana wakwe umwanakashi, uwalesambilila ukushimikila, engamwebako ubukombe mu kwipifya. Cathy alisumine, kabili umukashana munono ashimikile ubukombe bwaumfwika, ubwapekanishiwe bwino. Cathy alipapushiwe ku kuilumbulwila kwamonekesha ukwa uyu wacaice no mucinshi wakwe, kabili alipokeleko trakiti walelanda pali Baibolo untu bamutambike.

Pa numa Cathy alitontonkenye pa lwa kuipekanya bwino ne mibele ya ulya mutandashi wacaice. “Nalyebekeshiwe ukuti umukashana munono kuti alanda ubukombe bwa musango ulya ubwa kusekesha ukwabula no kuimono kuti ndi mwaice,” e fyo asosele. “Napingwilepo kuti umuku ukakonkapo lintu Inte sha kwa Yehova bakesa, ndi no kukutika kuli bene.”

Pali iyo nshita imo ine Cathy akuukiile kwi tauni linono mu ciputulwa ca pa kati ka kapinda ka kulyo na masamba ica Ireland mupepi ne fitungu fya Cork na Kerry. Pa numa Inte sha kwa Yehova batandalile iŋanda yakwe, kabili alibapokelele. Alisumine ukuti balekwata isambililo lya lyonse ilya Baibolo kabili nomba alasangwa ku kulongana kwa cilonganino na bana bakwe abafulilako. Cathy alatasha pa kufwaisha kwa cine cine ukwa mukashana munono ukwa kulanda imbila nsuma na wene.

▪ Mu ncende ya Tullamore, Inte shalilanshenyepo pa lwa Baibolo no mwanakashi uwe shina lya Jean pa ciputulwa ca myaka 7. Limo limo alelango kuti alesekelela no kupokako impapulo, lelo inshita shimo taleba na bulya buseko. Kasuba kamo, lintu Nte uwe shina lya Frances no munankwe batandalile Jean, bamusangile abukile uwakalifiwa nga nshi. Uyu Nte ashimiko kuti: “Icili conse cintu twasosele calelundapo fye ukumukalifya. Mu kulekelesha, alitutamfishe aisalako na ku ciibi.”

Frances aletwishika nampo nga ukutandala na kumbi bengatandala kuti baisabapokelela mu nshila imo ine. ‘Nakalimo tacingaba na kabili icisuma ukumutandalila nga ca kuti mu cituntulu tali uwasekelela mu bukombe,’ e fyo Frances aletontonkanya. Nangu cibe fyo, Frances alanshenye uyu mulandu no mulume wakwe, Thomas, kabili Thomas wene amoneke ukuba ne subilo. Umuku wakonkelepo ilyo baali mu ncende imo ine, na kabili balitandalile Jean. Aali uwa bucibusa kabili alipokeleko bamagazini ba Ulupungu lwa kwa Kalinda na Loleni! Ukutandala kwakonkelepo na ko kwali ukwa nsansa, kabili Thomas na Frances balitendeke ukutungulula isambililo lya Baibolo ilya mu ŋanda ilya lyonse kuli wene.

Mulandu nshi kwabelele uku kwaluka? Jean pa kulondolola atila ilya nshita aali uwabulo mucinshi ku Nte, e lyo fye apaapile kabili e lintu fye afumine mu cipatala. Pa mulandu wa konsha umwana no kupeela umusunga ku mwana wakwe uwakulileko, kanshi ubushiku alelaalako fye utulo iawala limo na hafu epela. “Icintu nshakwatiile nshita,” e fyo Jean asosa, “cali kulanda pa fya mipepele.”

Mu kati ka myeshi ibili Jean aalesangwa ku kulongana konse ukwa cilonganino, kabili mu kati ka myeshi ine alitendeke ukubombako ubutumikishi bwa mwi bala. Imyeshi 10 ukufuma pantu atendekele isambililo lya Baibolo, alibatishiwe. Nomba ici cintu Jean umwine apitilemo cilamwaafwa mu butumikishi. Ashimiko kuti: “Nga nakumanya umo uushaba na mucinshi, ndeshako ukumulangulukilako. Lyonse ndalemba ukuti ndeibukisha. Nalimo imibele ikaaluka pa nshita lintu nkabwelelako; uyo muntu nalimo akomfwako bwino kabili akampokelela mu kuwaminako.”