Nasambilile Icine ca mu Baibolo ku Romania

NGA FINTU CASHIMIKWA NA GOLDIE ROMOCEAN

Mu 1970, natandalile balupwa mu Romania pa muku wa kubalilapo ukutula apo nafumineko imyaka mupepi na 50. Abantu baletekwa na baKomyunisti ba mutitikisha, kabili nalesokwa pe ukuba uwacenjela na cintu nalesosa. Lyene, ilyo naiminine mwi ofesi lya buteko mu mushi wesu, umulashi ankambishe ukufuma mu calo ilyo line fye. Ilyo nshilalondolola umulandu, lekeni mwebeko ifyo nasambilile icine ca mu Baibolo mu Romania.

NAFYELWE pa March 3, 1903, mu mushi wa Ortelec pa kati ka kapinda ka ku kuso na masamba mu Romania mupepi ne tauni lya Zalău. Twaleikala mu ncende yayemba. Amenshi no mwela fyali ifyasanguluka. Twaleilimina ifya kulya fyesu fwe bene kabili lwa ku mubili tatwalebulisha kantu. Mu myaka yandi iya kubangilila, icalo cali mu mutende.

Abantu balitemenwe nga nshi ukupepa. Na kuba, ulupwa lwesu lwalyakanikene mu mipepele itatu iyapusanapusana. Bamama bamo baali muli baKatolika ba ciOrthodox, bambi muli baAdventist, e lyo abafyashi bandi bena baali baBaptist. Pa mulandu wa kuti nshalesuminishanya ne mipepele yabo iili yonse, ulupwa lwandi lwaletila nali no kuba mukanalesa. Naletontonkanya ukuti, ‘Nga ca kuti Lesa abako fye umo, kufwile ukubako fye imipepele imo—te mipepele itatu mu lupwa lumo.’

Ifintu namwene mu mipepele fyalenkalifya. Ku ca kumwenako, shimapepo aletandalila amayanda ku kupoka umutuulo we calici. Nga abantu tabakwete indalama sha kutuula, aalesendelamo amalangeti yabo ayasuma aya mafufu. Mwi calici lya ciKatolika, nalemona uko mama alefukama ukupepa ku cikope ca kwa Maria. ‘Mulandu nshi uwa kupepela ku cikope?’ e fyo naletontonkanya.

Inshita sha Mafya

Batata baile ku United States mu 1912 ku kunonka indalama sha kubwesesha inkongole. Bwangu bwangu pa numa ya ico inkondo yalibukile, kabili abaume ba mu mushi wesu baile ku bulwi—abashele fye baali banakashi, abana, na bakote. Umushi wesu watekelwe na bena Hungary pa kashita akanono, lelo lyene abashilika ba mu Romania balibwelele no kupokolola umushi. Batukambishe ukufumamo ilyo line fye. Nangu cibe fyo, pa mulandu wa kukwankwanya ne cimfulumfulu pa kulonga ifipe na bana mu cikocikala, balinshile. Mulandu wa kuti, pa bana basano nine nalipo umukalamba.

Nabutukile ku mwina mupalamano, umukote uwashele eka, kabili atile: “Kabiye ku ŋanda. Ukome ku fiibi, kabili wileka uuli onse ukwingila.” Bwangu bwangu nalyumfwilile. Pa numa ya kunwa umuto wa nkoko no kulya kabiki iyashelepo ku baalekwankwanya ukuya, nalifukeme mupepi no busanshi bwandi no kupepa. Bwangu bwangu naliponene mu tulo tukalamba.

Ilyo nashibwike, ninshi nakabala, kabili natile: “Iye, ndemutasha, mwe Lesa! Ncili uwa mweo!” Icibumba caiswilemo ifipunda umwalepula ifipoolopoolo, apantu kwali ukupike mfuti ubushiku bonse. Lintu Bamayo baishibe ukuti nshali na bo mu mushi wakonkelepo, batumine umulumendo George Romocean, uwansangile no kunsenda. Mu kwangufyanya twalibwelulwike ku mushi wesu no kutendeka ukwikala kulya na kabili.

Ukufwaisha Kwandi Ukwa Cine ca mu Baibolo

Bamayo baalefwaya ine ukubatishiwa nga Baptist, lelo nshalefwaya ukucite fyo pantu nalekaana ukuti Lesa wa kutemwa te kuti ooce abantu kuli pe na pe muli helo. Ukwesha ukulondolola, Bamayo baleti: “Cili fye bwino, nga ca kuti abo bantu babi.” Lelo naleyasuka nati: “Nga ca kuti babi, cawama ukubepaya fye, ukucila ukubalungulusha. Ine te kuti nungulushe fye ne mbwa nelyo nyau.”

Ndebukisha ukuti pa bushiku bushaiwamina ubwa muli shinde, ilyo nali ne myaka ya bukulu 14, Bamayo bantumine ukutwala iŋombe ku mulemfwe. Ilyo nalambalele pa cani mu mbali ya mumana, ninshi ne mitengo ilemoneka bushilya, naloleshe mu muulu no kusoso kuti: “Mwe Lesa, nalishiba ukuti e ko mwaba; lelo nshifwaya iyi mipepele yonse. Mufwile mwalikwata imipepele imo iisuma.”

Mu cine cine nalicetekela ukuti Lesa alyumfwile ipepo lyandi pantu lulya lusuba lumo lwine ulwa mu 1917, Abasambi ba Baibolo babili (nga fintu Inte sha kwa Yehova shaleitwa pali ilya nshita) balishile ku mushi wesu. Baali bakolopota, nelyo abatumikishi ba nshita yonse, kabili baishile kwi calici lya Baptist ilyo kwali amapepo.

Icine ca mu Baibolo Casalangana mu Romania

Imyaka inono pa ntanshi, mu 1911, Carol Szabo na Josif Kiss, abasangwike Abasambi ba Baibolo mu United States, babwelulukile ku Romania ku kulondolola icine ca mu Baibolo kulya. Baikele mu Tîrgu-Mureş, bakilomita mupepi na 160 pa kati ka kapinda ka ku kulyo na kabanga aka mushi wesu. Mu myaka fye iinono, ukupenda abantu ba cine cine imyanda ne myanda balyankwile ku bukombe bwa Bufumu no kupokelela ubutumikishi bwa Bwina Kristu.—Mateo 24:14.

Kwena, lintu Abasambi ba Baibolo babili abacaice baishile kwi calici lya Baptist mu mushi wesu uwa Ortelec, George Romocean, nangu cingati aali fye ne myaka 18, e walepepesha kabili aleesha ukulondolola ubupilibulo bwa Abena Roma 12:1. Mu kuya kwa nshita, umo uwa bakolopota bacaice aliminineko no kusoso kuti: “Bamunyinane, mwe fibusa, cinshi cintu umutumwa Paulo aleesha ukutweba pano?”

Lintu naumfwile ico, nalicincimushiwe nga nshi! Natontonkenye ukuti, ‘Aba baume bafwile balishiba ifya kulondolola Baibolo.’ Lelo ubwingi bwa baalipo bapundile ukuti: “Bakasesema ba bufi! Natumwishiba bwino sana!” Kwaimine icimpungili. Lelo lyene wishi kwa George aliminine no kusoso kuti: “Talaleni imwe bonse! Mupashi wa musango nshi uyu—bushe bwalwa munwene? Nga ca kuti aba baume nabakwata ifya kutweba e lyo tamulefwaya ukukutikako, nalabasenda ku ŋanda ku mwandi. Onse uulefwaya ukwisa kuti aisa.”

Mu kucincimuka, nalibutukile ku ŋanda no kweba Bamayo icacitike. Nali umo uwa abo abapokelele ubwite bwa kuya ku ŋanda ya baRomocean. Fintu nali uwacincimushiwa cilya cungulo bushiku ukusambilila ukufuma muli Baibolo ukuti takwabako helo uwabamo umulilo no kumona muli Baibolo yandi ine iya ciRomanian ishina lya kwa Lesa, Yehova! Bakolopota batantike ukuti Umusambi wa Baibolo aletandalila iŋanda ya ba Romocean pa Mulungu lyonse ku kutusambilisha. Ulusuba lwakonkelepo, pa mushinku wa myaka 15, nalibatishiwe ku kulangilila ukuipeela kwandi kuli Yehova.

Mu kupita kwa nshita, mupepi no lupwa lonse ulwa baProdan no lwa baRomocean lwalipokelele icine ca mu Baibolo no kupeela ubumi bwabo kuli Yehova. Bambi na bo abengi ukufuma mu mushi wesu balicitile co, ukusanshako abaupana babili abacaice abo iŋanda yabo kale yalebomfiwa nge calici lya Baptist. Pa numa bayalwilile mu cifulo ca kulonganinamo kwi sambililo lya Basambi ba Baibolo. Icine ca mu Malembo calisalangene lubilo lubilo mu mishi yali mupepi, kabili ukufika mu 1920 kwaliko bakasabankanya ba Bufumu mupepi na 1,800 mu Romania.

Ukuya ku United States

Twalefwaisha ukwebako shifwe, Peter Prodan cintu twasambilile. Lelo, ku ca kupapusha, ilyo tushilalemba kalata, twapokelele kalata ukufuma kuli wene ukutweba ukuti aali nasanguka umubomfi wa kwa Yehova uwabatishiwa. Asambilile na Basambi ba Baibolo mu Akron, Ohio, kabili aalefwaya ifwe bonse ukuilunda kuli wene mu United States. Nangu cibe fyo, Mayo alikeene ukufuma mu Romania. E co, mu 1921, ukubomfya indalama isho Batata bantumiine, nalibakonkele ku Akron. George Romocean na ndume nankwe baali nabakuukila ku United States umwaka wafumineko.

Lintu nafikile ne ngalaba pa cishi ca Ellis Island, New York, umukalamba wa kumona abaleingila mu calo taishibe ifya kupilibula ishina lyandi, Aurelia, ukutwala mu ciNgeleshi, e co atile: “Ni we Goldie.” Ilyo lyaba e shina lyandi ukutule lyo. Mu kwangufyanya pa numa ya ico, pa May 1, 1921, ine na George Romocean twalyupene. Mupepi no mwaka umo pa numa, Tata abwelele ku Romania kabili mu 1925 aishile ku Akron pamo na nkashi nandi munono, Mary. Lyene Tata abwelelemo ku Romania ku kuyaba na Mayo no lupwa lonse.

Ubutumikishi Bwesu Ubwa Kubalilapo mu United States

George aali mubomfi wa kwa Yehova uwa bucishinka kabili uwaipeelesha nga nshi. Pa kati ka 1922 na 1932, twalipaalilwe mu kuba na bana banakashi bane abayemba—Esther, Anne, Goldie Elizabeth, na Irene. Icilonganino ca ciRomanian calimikwe mu Akron, kabili pa kubalilapo ukulongana kwalebela mu ŋanda mu mwesu. Mu kuya kwa nshita, pa numa ya myeshi 6 lyonse umwiminishi ukufuma ku maofesi yakalamba aya calo conse aya Basambi ba Baibolo mu Brooklyn, New York, aletandalila icilonganino cesu no kwikala na ifwe.

Inshiku sha Mulungu ishingi twalewisha fye akasuba konse mu mulimo wa kushimikila. Twalelonga ifyola fyesu ifya fitabo ne fya kulya fya pa kati ka kasuba, ukupatika abana muli motoka wesu uwa Model T Ford, no kupoosa akasuba konse ukushimikila mu cifulo ca kubombelamo ica mu mishi. Lyene mu cungulo bushiku, twalesangwa kwi Sambililo lya Ulupungu lwa kwa Kalinda. Abakashana besu baishiletemwa umulimo wa kushimikila. Mu 1931, e ko nali ku Columbus, Ohio, lintu Abasambi ba Baibolo bapokelele ishina lya kubalekanyako ilya Inte sha kwa Yehova.

Ukulungikwa Uko Nalekabila

Imyaka inono pa numa, nalifulilwe Joseph F. Rutherford, uwali pali ilya nshita presidenti wa Watch Tower Bible and Tract Society. Nte umupya ayumfwile ukuti Munyina Rutherford tamucitile bwino iyo, pantu tamukutike nakalya. Nayumfwile ifyo Munyina Rutherford alilufyenye. Kwena, ubushiku bwa pa Mulungu bumo inkashi nandi Mary no mulume wakwe, Dan Pestrui, balishile ku kututandalila. Pa numa ya mulalilo Dan atile: “Natuipekanye ukuya ku kulongana.”

Nayaswike ukuti: “Twalileka ukuya ku kulongana. Tatwatemwa icacitile Munyina Rutherford.”

Dan abikile amaboko yakwe ku numa no kushintukilako ku numa panono lyene abwelele ku ntanshi, e lyo asosele ukuti: “Bushe walishibe Munyina Rutherford lintu wabatishiwe?”

“Awe iyo,” e fyo nayaswike. “Walishibo kuti nabatishiwe ku Romania.”

“Mulandu nshi wabatishiwilwe?” e fyo aipwishe.

Nayaswike ukuti: “Pantu nasambilile ifyo Yehova e Lesa wa cine, kabili nalefwaya ukupeela ubumi bwandi ku kumubombela.”

“Te kwesha ukulabe co!” e fyo ayaswike. “Ni shani nga ca kuti Munyina Rutherford afumine mu cine, bushe kuti na iwe wafuma?”

“Awe, iyo!” e fyo nasosele. Ico canengele ukukutuluka, kabili natile: “Bonse natuipekanye ukuya ku kulongana.” Kabili tatwalekapo ukulongana ukutule lyo. Fintu nali uwa kutasha kuli Yehova pali uku kulungika kwabamo ukutemwa ukufuma kuli mulamu!

Ukubomba na Mafya ya mu Nshita ya Kubongoloka kwa fya Bunonshi

Mu nshita ya Kubongoloka kwa fya Bunonshi muli ba1930, ifintu fyalyafishe. Bushiku bumo George abwelele ku ŋanda ninshi naundalila icine cine, ukunjeba ukuti nabamufumye ncito pa fakitare yalepanga imipila apo aalebomba. Namwebele ukuti: “Wisakamana, twalikwata Shifwe wa mu muulu umukaankala, kabili takatushe.”

Bulya bushiku bumo bwine George akumene na cibusa wakwe uwakwete umuseke ukalamba uwa bowa. Lintu George aishibe uko cibusa wakwe atoolele bwene, abwelele ku ŋanda ninshi ali no bowa ubushaifulila. Lyene abomfeshe badola batatu abo twakwete fye ukushita imiseke inono. Namwipushe ukuti, “Ni shani fintu mwingacite ci cintu ilintu namwishiba bwino ukuti tuli na bana abanono abalekabila umukaka?”

Ayaswike ukuti: “Wisakamana, iwe ucite fye ifyo ndekweba.” Pa milungu inono iyakonkelepo, mukwai iŋanda yesu yasangwike fakitare umutuntulu, umo twalesamfisha ubowa no kubulonga bwino bwino. Twalebushitisha ku fifulo bepikilamo ifya kulya fisuma no kubwelela ku ŋanda ninshi tuli na badola 30 ukufika kuli 40 cila bushiku, pali ilya nshita shali ishingi nga nshi kuli ifwe. Shimafarmu uwatupeele ulusa lwa kutoola ubowa mu ncende yakwe asosele ukuti aalikele palya pa myaka 25 kabili tabalile amonapo ubowa bwafula nga bulya. Bwangu bwangu fakitare yalepanga imipila yalitile George ukutendeka imilimo na kabili.

Ukusungilila Icitetekelo Cesu

Mu 1943 twakuukiile ku Los Angeles, California, kabili pa numa ya myaka ine twaikele mu Elsinore. Twaiswile ituuka kulya, kabili ulupwa lonse lwalekomboshanya ukubomba muli ili ituuka. Pali ilya nshita, Elsinore lyali fye litauni ilinono ilya bantu mupepi na 2,000 e co twaleenda bakilomita mupepi na 30 ukuya kwi tauni limbi ku kusangwa ku kulongana kwesu ukwa Bwina Kristu. Fintu nali uwa nsansa ukumona icilonganino cinono capangwa mu Elsinore mu 1950! Pali nomba kuli ifilonganino 13 muli iyi ncende imo ine.

Mu 1950 umwana wesu umwanakashi Goldie Elizabeth (uo abengi baishiba ukuti Beth) alipwishishe Isukulu lya Baibolo Ilya Gileadi Ilya Watchtower mu South Lansing, New York, kabili atuminwe ku Venezuela ku kubomba bumishonari. Mu 1955 kasuli wesu umwanakashi, Irene, aali uwa nsansa pa mulandu wa kuti umulume wakwe alilaalikwe ukubomba ngo mutumikishi wenda mu mulimo wa muputule. Lyene mu 1961, pa numa ya kusangwa kwi Sukulu lya Butumikishi bwa Bufumu ku South Lansing, New York, batuminwe ku Thailand. Inshita shimo shimo nalefuluka sana abana bandi abanakashi ica kuti nalelila, lelo lyene naleyeba ukuti, ‘Ifi fine e fyo nalefwaya bene ukucita.’ E co nalefumpula icola candi ica fitabo no kuya mu mulimo wa kushimikila. Lyonse nalebwelela ku ŋanda ninshi ninsansamuka.

Mu 1966 umulume wandi uwatemwikwa, George, akwete ulupumo. Beth, uwali nabwela ukufuma ku Venezuela pa mulandu wa kulwalilila, alyafwile ukumuteensha. George afwile umwaka wakonkelepo, kabili nalisansamushiwe ku cishinka ca kuti atwalilile uwa citetekelo kuli Yehova kabili alipokelele icilambu cakwe ica ku muulu. Pa numa Beth aile ku Spain ku kubomba ukwali ukubulisha kukalamba ukwa bakashimikila ba Bufumu. Umwana wandi umukalamba pali bonse, Esther, alwele kansa kabili afwile mu 1977, kabili mu 1984, Anne afwile kuli kansa wa mu mulopa. Umo na umo aali mubomfi wa busumino uwa kwa Yehova ubumi bwakwe bonse.

Pa nshita Anne alefwa, Beth na Irene baali nababwela ukufuma ku mulimo wabo uwa kushimikila ku fyalo fya cilendo. Balyafwileko ukuteensha inkashi shabo, kabili bonse twali no bulanda apakalamba. Ilyo papitileko inshita naebele abana bandi ukuti: “Cisuma, capwa! Twalisansamusha bambi ukupitila mu malayo ya mu Baibolo ayaumo mutengo. Nomba tufwile ukusansamushiwa fwe bene. Satana alefwaya ukutupusula ubuseko mu kubombela Yehova, lelo tatufwile ukumuleka ukucite co.”

Ulupwa Lwesu Ulwa Busumino mu Romania

Ine na nkashi nandi Mary twaimine ubulendo bushakalabwe ubwa kutandalila ulupwa lwesu mu Romania mu 1970. Inkashi yesu imo yalifwile, lelo twalitandalile indume yesu John na nkashi nensu Lodovica, abaali bacili bekala mu mushi wa Ortelec. Pa nshita twatandele, Batata na Bamayo ninshi balifwa, batwalilile aba busumino kuli Yehova. Abengi batwebele ukuti Tata aali lupanda mu cilonganino. Nangu fye fishikululwa fyakwe fimo mu Romania nomba ni Nte. Na kabili twatandalile balupwa abengi aba ku mulume wandi abatwalilile abashangila mu cine ca Baibolo.

Mu 1970, Romania aishileba pe samba lya kuteka kwa bukalushi ukwa Komyunisimu ukwa kwa Nicolae Ceauşescu, kabili Inte sha kwa Yehova balepakaswa mu bukatu. Umwana mwaume uwa kwa ndume yandi John, Flore, pamo pene na balupwa bandi bambi, bapoosele imyaka iingi mu nkambi sha kucushiwilwamo pa mulandu wa citetekelo cabo ica Bwina Kristu, e fyo cali na ku mwipwa wa mulume wandi, Gábor Romocean. E mulandu wine lintu twaseekeshiwe umulimo wa kutwala bakalata ku maofesi yakalamba aya Nte sha kwa Yehova mu New York, bamunyinefwe ba mu Romania batile imitima tayali na kwikala ukufikila baumfwa ukuti natufuma mu calo umutende!

Lintu twaishibe ukuti ifipepala fyesu ifya kwendelapo fyalipwile, twaile kwi ofesi lya buteko mu Ortelec. Cali ni pali Cisano icungulo, kabili kwali fye umulashi umo uwali pa ncito. Pa numa ya kwishiba bantu twaletandalila no kuti umwipwa wesu aali mu nkambi ya kucushiwilwamo, atile: “Imwe banamayo, mufwile ukuya nomba line!”

“Nomba takuli ishitima ilileima lelo,” e fyo nkashi nandi ayaswike.

Mu kwangufyanya asosele ati, “Uyo tauli mulandu wandi. Nga mulefwaya munine basi. Kuti mwanine shitima. Nangu munine takisi. Nelyo ukwenda fye. Icishinka cili ca kuti mufume muno calo bwangu bwangu ukufika pantu mwingapesha!”

Ilyo twatampile ukufumapo, alitwitile no kutweba ukuti ishitima lya bashilika ilishikonka nshita lyali no kupita pa 18:00 hrs. Fintu ico caishileba pa nshita yalinga! Mwi shitima lya lyonse, amapepala yesu yali no kulabebetwa libili libili, lelo apantu ili shitima lyasendele abashilika kabili ni fwe fye twali abekashi abashali bashilika, takwali nangu umo uwatwebele ukumulanga amapaso yesu. Napamo batontonkenye ifyo twali banakulu ba balashi bamo mu bashilika.

Twafikile ku Timisoara ulucelo lwakonkelepo, kabili pa kwafwiwa na cibusa wa kwa lupwa lwesu, twalipokele ifipepala fya kwendelapo. Ubushiku bwakonkelepo twalifumine mu calo. Ilyo twafikile ku ŋanda twaleibukisha ifingi pa lwa bamunyinefwe ba Bwina Kristu ne nkashi aba bucishinka mu Romania.

Mu myaka ya pa numa ya kutandala kwesu ku Romania, tatwaumfwileko ifingi pa lwa mulimo wesu uwa kushimikila kuli cilya cifulo catekelwe na bashilika. Lelo, twali abacetekela ukuti bamunyinefwe aba Bwina Kristu ne nkashi baali no kutwalilila ukuba aba bucishinka kuli Lesa wesu—te mulandu ne cili conse. Kabili mu kushininkisha balitwalilila ukuba aba bucishinka! Fintu cali buseko ukumfwa ukuti Inte sha kwa Yehova shalilembeshiwe mwi funde ukuti kuteyanya kwa mipepele mu Romania mu April 1990! Ulusuba lwakonkelepo twalicincimushiwe ku malipoti pa lwa mabungano yabelele mu Romania. Na kuba, ukucila pali 34,000 balisangilweko mu misumba 8, kabili 2,260 balibatishiwe! Nomba kuliko abalebombako umulimo wa kushimikila mu Romania ukucila pali 35,000, kabili umwaka wapwile 86,034 balisangilwe ku Cibukisho ca mfwa ya kwa Kristu.

Icine Cicili Icaumo Mutengo Kuli Ine

Pa myaka inono, nalilekele ukulyako ku fimpashanya fya pa Cibukisho. Namwene bamunyina bafikapo nga nshi abashalelyako, no kupelululo kuti: ‘Mulandu nshi Yehova engampeelela ububile bwa kuba impyani inankwe iya Mwana wakwe mu muulu ilintu bambi abaali bakalanda balongoloka tabakwete ubo bubile?’ Lelo lintu nalekele ukulyako, nayumfwile uwabipilwa nga nshi. Cali kwati ndekaana icintu cimo. Pa numa ya kubelengesha nga nshi no kupaapaata mwi pepo, natendeke ukulya na kabili. Umutende wandi no buseko fyalibwelele, kabili tafyabala afifumapo.

Nangu ca kuti nomba nshimona no kubelenga, cila bushiku ndakutika ku matepu ya Baibolo na bamagazini ba Watchtower na Awake! Kabili ncili ndabombako umulimo wa kushimikila. Ilingi line nshalika bamagazini pa kati ka 60 na 100 cila mweshi, lelo lintu twakwete kampeni waibela uwa kushalika magazini wa Loleni! mu April umwaka wapwa, nashalike 323. Pa kwaafwiwa na bana bandi abanakashi, ndapeela fye na malyashi mwi Isukulu lya Butumikishi bwa Teokrasi. Naliba uwa nsansa pa kuti ntwalilila ukukoselesha bambi. Ni cikanga fye bonse mu Ŋanda ya Bufumu balenjita abati Mama.

Lintu napituluka mu myaka ukucila 79 iya mulimo wa kuipeelesha kuli Yehova, ndamutasha cila bushiku ukuti alinsuminisha ukwishiba icine caumo mutengo no kubomfya ubumi bwandi mu mulimo wakwe. Naliba uwa kutasha nga nshi ukuti nalikalako uwa mweo no kumona ukufikilishiwa kwa masesemo ya kusungusha aya mu Baibolo ayasobele ukulonganikwa kwa bapale mpaanga aba kwa Lesa muli shino nshiku sha kulekelesha.—Esaya 60:22; Sekaria 8:23.

[Icikope pe bula 23]

Nkashi nandi Mary na Batata nabeminina, e lyo nine, George, na bana besu abanakashi Esther na Anne

[Icikope pe bula 24]

Na bana bandi abanakashi Beth na Irene na muka Irene na bana babo babili abaume, bonse abalebombela Yehova mu busumino