Ukufishilisha no Kubepesha Shikulu

SUMU wa busanso mwi shitima lya mu mpito sha pa nshi ku Tokyo, Japan, mu March 1995 aipeye abantu 12, ukulwalika amakana ayengi, no kwaafwa ukusokolola inkama imo. Icakaniko ca mipepele icaishibikwa ukuti Aum Shinrikyo (Icine Cafikapo) mu bumfisolo calipangile ubutala bwa sumu wa sarin uwa kubomfya ku kufikilisha amapange ya ciko aya mu bumfisolo.

Mu April ibomba lyalipuulike no kuwisha icikuulwa ca buteko mu Oklahoma City, U.S.A., no kwipaya abantu 167. Ubushininkisho busokololo kuti ubu busanso bwalilundene no kukanaumfwana kwa buteko ne cakaniko ca mipepele ya kusefya ica Branch Davidian mu Waco, Texas, ukwa mu April, 1993, icilepilibula imyaka ibili iituntulu ukufika pa bushiku ubu busanso bwacitike. Pali ilya nshita abali muli aka kabungwe mupepi na 80 balifwile. Ili bomba na kabili lyasokolwele ico abantu abengi bashaishibe: Utubungwe twa bakapokola utwingi e ko twaba pali nomba mu United States, tumo pali twene tutunganishiwa ukuba ne pange lya mu bumfisolo ilya kupinuna ubuteko.

Pa numa, ilyo umwaka wa 1995 wali mupepi no kupwa, imibili ya bantu 16 abaocewa yalisangilwe mu mutengo mupepi na Grenoble, France. Baali mu Kabungwe ka Solar Temple, icakaniko cinono ica mipepele ico mu October 1994 calandilwepo nga nshi mu malyashi ya ku Switzerland na Canada ilyo aba muli yi mipepele 53 bambi ukuipaya fye na bambi ukwipaiwa fye. Lelo te mulandu no bu busanso, ici cakaniko calitwalilile ukubomba. Ukufika kuli buno bushiku amapange yabo yaba fye ya mu bumfisolo.

Ubusanso Bwaba mu Kufishilisha mu fya Mipepele

Pa mulandu wa ifi fya kucitika, bushe kuti twapapa umulandu abantu abengi baletunganishisha utubungwe twa mipepele? Mu kushininkisha takuli nangu umo uwingafwaya ukwafwilisha akabungwe ka mu bumfisolo—nampo nga ka mipepele nelyo takali ka mipepele—ako akengabomfya fye ukucetekelwa kwakwe ukucita ifintu ifyo tasuminisheko. Nangu cibe fyo, cinshi cintu abantu bengacita, pa kusengauka ukuisanga mu kabungwe ka mu bumfisolo akali na mapange yabipa?

Mu kushininkisha, uuli onse uulefwaya ukuilunda ku kabungwe ka mu bumfisolo afwile ukupimununa icaba amapange ya kako. Ukupatikishiwa ne fibusa nelyo abeshibishi kufwile ukusengaukwa, kabili ukupingulapo kulingile ukushimpwa pa fishinka te pa kukuntukilwa iyo. Ibukisheni, ilingi line umuntu umwine e ukalacula na mafya yengafumamo—te bantu bambi iyo.

Ukukonka ifishinte fya mu Baibolo e nshila yawamisha iya kusengaukilamo utubungwe twa busanso utwaba na mapange yalubana. (Esaya 30:21) Ici cilesanshamo ukukanaibimbamo mu mapolitiki, ukutemwa abantu bambi, nangu line bengaba balwani besu, ukusengauka “imilimo ya bumubili,” no kulundulula ifisabo fya mupashi wa kwa Lesa. Pali fyonse, Abena Kristu ba cine tabafwile ukuba aba pano isonde, nga fintu fye Yesu taali uwa pano isonde, kabili ici cilesanshamo ukusengauka utubungwe twa mu bumfisolo utwa ku calo.—Abena Galatia 5:19-23; Yohane 17:14, 16; 18:36; Abena Roma 12:17-21; Yakobo 4:4.

Inte sha kwa Yehova basambi ba Baibolo abafumaluka abacindamika imipepele yabo kabili abesha ukwikala umwabela imipepele yabo ukwabula ukufishilisha. Mwi sonde fye lyonse, balishibikwa bwino ukuti libumba lya mipepele ‘ilifwayo mutende no kuukonkelela.’ (1 Petro 3:11) Icitabo cabo ica Jehovah’s Witnesses—Proclaimers of God’s Kingdom calisosa bwino aciti: “Inte sha kwa Yehova tababa nangu panono kabungwe ka mu bumfisolo. Ifisumino fyabo ifyashimpwa pali Baibolo fyalilondololwa bwino bwino mu mpapulo isho uuli onse engakwatako. Ukulundapo, balabombesha nga nshi ukwita uuli onse ukusangwa ku kulongana kwabo pa kuti bengaimwena no kuyumfwila icicitika.”

Ukupepa kwa cine takwaba nangu panono ukwa mu bumfisolo. Abapepa Lesa wa cine balisambilishiwa ukukanaifisa nelyo ukufishilisha imifwaile yabo pamo nge Nte sha kwa Yehova. Abasambi ba mu kubangilila aba kwa Yesu baiswishe Yerusalemu ne sambilisho lyabo. Ifisumino fyabo ne mibombele fyalemonekela fye apabuuta tutu. E fyo caba na ku Nte sha kwa Yehova ilelo. Ca cine, lintu amabuteko ya culukusu mu cilubo yabinda amaipepele, Abena Kristu bafwile ukutwalilila mu kucenjela kabili mu kushipa, ukunakila “Lesa ukucilo kunakila abantu,” imibele iyo baisangamo abene pa mulandu wa kushimikila apabuuta.—Imilimo 5:27-29; 8:1; 12:1-14; Mateo 10:16, 26, 27.

Nga ca kuti mwaletontonkanyapo ukuti Inte sha kwa Yehova pambi cakaniko ca mipepele ica mu bumfisolo, ico nakalimo cali pa mulandu wa kuti tamwaishibe ifingi pa lwa bene. Cifwile e fintu cali na ku bantu abengi mu mwanda wa myaka uwa kubalilapo.

Imilimo icipandwa 28 itweba pa lwa kukumana uko umutumwa Paulo akumene ne “ntungulushi sha baYuda” mu Roma. Bamwebele ukuti: “Tuletila ciyene ukuumfwa kuli iwe ifyo uletontonkanya; pantu icakaniko ici caishibikwa kuli ifwe ukuti konse konse cisoselwo bubi.” (Imilimo 28:16-22) Pa kwasuka, Paulo ‘alibakolobondelemo, ukushininkishe fya bufumu bwa kwa Lesa,’ kabili “bamo bena basuubile ifyalesoswa.” (Imilimo 28:23, 24) Mu kushininkisha calibawamine kuli pe na pe ukufwailisha ifishinka fyonse pa lwa Bwina Kristu bwa cine.

Apantu baliipeelesha ukubombela Lesa apabuuta tutu, Inte sha kwa Yehova bakaitemenwa ukulondolola ukwabula no kupita mu mbali ifishinka fyonse pa lwa mibombele yabo ne fyo basuminamo ku uuli onse uulefwaya ukwishiba ifi fishinka. Mulandu nshi mushingabebeta mwe bene, na muli fyo ukulondolwelwa bwino pa lwa fyo basuminamo?

[Icikope pe bula 6]

Inte sha kwa Yehova baliba abaitemenwa ukuilondolola no kulondolola umulimo wabo