Ilyashi lya Bakabilisha ba Bufumu
Ukufulumukila ku Kuteyanya kwa kwa Yehova Ukwa Teokrasi
KALE sana kasesema Esaya aliseshiwe ukubilisha ati: ‘Bafwile ukucindika Yehova mu fishi fya muli bemba.’ (Esaya 24:15) Inte sha kwa Yehova shimona ifishi fya muli bemba pamo ngo lubali lwa “fyalo fyonse” umo Yesu atile ‘imbila nsuma yali no kubilwa.’—Mateo 24:14; Marko 13:10.
Ifishi fya Marquesas fyabela mupepi na bakilomita 1,400 pa kati ka kapinda ka kuso na kabanga aka Tahiti. Ifi fishi fyaba lubali lwa munkulinkuli wa fishi fyaba mu South Pacific ifyo beta abati French Polynesia. Apo mwaba umushili wafunda, uwe loba lyasansantike ku mpili shapuulike e lyo ne miceele yakaba iyo ilenge cipuki, kanshi ifimenwa filakula bwino nga nshi muli ifi fishi. Nangu cibe fyo, ifishi fya Marquesas filetwala umusango na umbi uwa fisabo. Langulukeni pa cacitike mu lupwa lumo ulwayankwile ku bukombe bwa Bufumu pa cishi ca Hiva Oa.
Jean no mukashi wakwe, Nadine, tabatemenwe ico abantu beta abati ubwikashi bwatumpuluka ubwaba mu Bulaya bwa ku Masamba muntu baikele. E co bapingwilepo ukufuma muli ilya mikalile yapamfiwa no kukuukila ku fishi fya Marquesas pamo no mwana wabo. Ing’anda yabo iipya, iyakuulwa ne nsengu, yafyanteme mu mupokapoka waba fye weka. Pa kuyafika pa bena mupalamano babo abaaliko mupepi, ninshi baali no kutumbilo lupili lwakalabana pa maawala yabili. Umushi wapalamishe sana umwali dokota, isukulu, ne tuuka pa kufikako kwenda na motoka wa jeep pa maawala yatatu.
Jean na Nadine tabaalefwaya ukupepa. Nangu cibe fyo, baaleibimba mu kulanshanya pa lwa fyo ubumi bwatendeke. Ilingi line, balekolobonda mu fisambilisho fyapikana ifya kusanguka kwa muntu. Lelo tapaali nangu cimo ica fisambilisho fyabo icabekwishe.
Pa numa ya kwikala beka pa myaka 6, balipapile ilyo babili aba Nte sha kwa Yehova babatandalile. Pa mushi wapalamineko e po Inte shaumfwile ulwa kuntu Jean na Nadine baali. Nga fintu cingenekelwa, ukulanshanya kwatungulwile ku kulanda pa lwa cisambilisho ca kusanguka kwa muntu. Icaleteele aba baupana ukucankwa cali ca kuti baNte balikwete icitabo ca Life—How Did It Get Here? By Evolution or by Creation?, icasabankanishiwa ne Nte sha kwa Yehova. Jean na Nadine balitemenwe ukukwata icitabo icakonkobwele mu fintu ubumi bwaishilebako.
Papitile fye inshita inono, isambililo lya Baibolo lyalitendeke. Pa ciputulwa ca myaka mupepi na itatu, Jean na Nadine bali abashikatala mu kulunduluka kwabo. Balishininwe ukuti mu kwangufyanya isonde lyonse apo lyapela lili no kusanguka paradise. Ilyo ulupwa lwakulile ukufika ku bana batatu, ukwenda pa maawala yane ku kusangwa ku kulongana kwa Bwina Kristu ku Ng’anda ya Bufumu bwali bwafya ubwine bwine. Lelo nangu cibe fyo, ico tacabalengele ukukanalasangwako. Mu kupita kwa nshita Jean na Nadine balilangishe ukuipeela kwabo kuli Yehova ukupitila mu lubatisho lwa mu menshi. Babatishiwe pe bungano ilyaliko mu mushi ukalamba, uko icipimo ca pa muulu ica basangilweko cali ni 38!
Pa kuti bengalaafwilishako ili bumba linono ilya bakasabankanya ba Bufumu, ulu lupwa lwapingwilepo ukusha ing’anda yabo uko baikele beka. Bakuukiile ku mushi wakwatamo abantu mupepi na 1,000, uko nomba Jean alebomba ngo mubomfi utumikila mu cilonganino ca cikaya ica Nte sha kwa Yehova. Ulu lupwa, ulushasakamene ukutumpuluka lelo ulwafulumukiile ku fishi, lucimona ukube shuko ukuti balisanga icubo ca cine cine, icaba kuteyanya kwa kwa Yehova ukwa teokrasi.