Incenshi mu Cebo ca kwa Lesa Shapwisha Isukulu

INTE SHA KWA YEHOVA mwi sonde lyonse shaishibikilwa ku kushimikila kwa ku ng’anda ne ng’anda, mu kupashanya Abena Kristu ba mu mwanda wa myaka uwa kubalilapo. Uyu mulimo walikomailwepo mu mashiwi ya kwiswila programu wa kupwisha ikalasi lyalenga 102 ilye Sukulu lya Baibolo Ilya Gileadi Ilya Watchtower.

Pa March 1, 1997, Albert Schroeder, uwa mwi Bumba Litungulula ilya Nte sha kwa Yehova, alandile pa cipande ca nomba line mu nyunshipepala ya ku France iya Le Point. Calandile pa lwa mapange ya baRoma Katolika aya kutampa ukushimikila ku ng’anda ne ng’anda mu Italy. Ici cipande calondolwele ukuti: “Pa kuti [bamishonari ba Vatican] beelabwelako minwe mikutwa ilyo balecimfyanya mu mulimo wa Nte sha kwa Yehova, Vatican yalitantika fye no kuti amakope 1 milioni aye Landwe lya Mutakatifu Marko yapulintwe, ilyo intumi shabo shilelolenkana ne ncenshi [Inte] mu ‘kusha’ ilyashi lisuma ku mwinshi no mwinshi.”

Abapwishishe isukulu 48 bali pa kati ka bapashanya inshila shalamuka isha kwa Yesu isha kubililamo Icebo ca kwa Lesa. Baishile ku Watchtower Educational Center ku Patterson, New York ukufuma mu fyalo 8. Mu myeshi isano iya kusambilila, balipwishishe ukusambilila Baibolo yonse fye. Kosi wabo asanshishemo ne lyashi lya kale ilya kuteyanya kwa kwa Lesa, ificitika muli bumishonari, ne fisabo fya mupashi wa kwa Lesa. Ilyo balesambilile fi fyonse bali fye no buyo bumo—ubwa kuipekanya ukuyabomba bumishonari mu fyalo fya cilendo 17 uko baletumwa. Ilyo balepwisha isukulu, abasangilweko 5,015 abafumine mu fyalo fyalekanalekana balisangaleleko pali aka kashita. Kufunda nshi kubomba uko abasambi ba Gileadi baumfwile pa kubalaya?

Bamishonari Bapya Bapokelela Ukukoselesha Kwalinga Fye

Pa numa ceyamani alandilepo mu kwiswila, Ralph Walls, kaafwa wa muli Komiti ya Bakabomba uwe Bumba Litungulula, apeele ilyashi lya kubalilapo ilipi ilyakwetemo ukupanda amano kubomba kuli bamishonari bapya. Umutwe alelandapo wa kuti “Ibukisheni Ukulatemwa.” Alondolwele fintu Baibolo, pali 2 Timote icipandwa 3, yasobele ukuti ukubulwa ukutemwa kwali no kufulilako mu calo. Acinkwile bamishonari bapya uku kucinkula kwa mu nshita, mu kumfwana no bulondoloshi bwa kutemwa ubusangwa pali 1 Abena Korinti 13:1-7 ukuti: “Imwe, pamo nga bamishonari, pambi mukalacila pa maawala yakabilwa. Napamo kuti mwalishiba ifingi pa mulandu wa kukansha kwa Gileadi. Nelyo kuti twapushamo inshita no kubomba mu kupimpa mu mulimo wa pa maofesi ya Watchtower. Lelo ukubombesha kwesu konse no kuipusula takwingaba nangu cimo nga twalaba ukutemwa.”

Uwakonkelepo ni Carey Barber, uwa mwi Bumba Litungulula, uwalandile pa mutwe wa kuti “Yehova Aletutungulula Ukulola ku Kucimfya.” Ukufuma ku ntendekelo shinono pa numa ya Nkondo ya Calo iya 1, Yehova Lesa alitungulula ababomfi bakwe aba busumino ukulola ku kucimfya mu kubilisha imbila nsuma ya Bufumu, te mulandu no kupakasa. Mu 1931 Abasambi ba Baibolo, nga fintu baishibikwe lilya, baipeele ishina Inte sha kwa Yehova, icakalifye bashimapepo ba mu Kristendomu. Munyina Barber atile: “Ikalasi lyalenga 102 ilya bamishonari bakanshiwa pa Gileadi nomba nalikwata ishuko lyakulisha ilya kubombako apakalamba mu mulimo wa lulumbi uwa kuleka abantu abafulisha bakwate shuko lya kwishiba ilyo ishina lyashila.” Baleilunda ku mutande walepa uwa bamishonari 7,131 abakanshiwa pe Sukulu lya Gileadi kabili abayafwilisha ukufisha ukushimikila kwa Cebo ca kwa Lesa mu fyalo 233 ilelo ukufuma ku fyalo 54 mu 1943.

Kalanda wakonkelepo, Lloyd Barry, na o uwa mwi Bumba Litungulula, aali mwi kalasi lyalenga 11 ilya Gileadi kabili abombele bumishonari mu Japan pa myaka ukucila 25. Abakoseleshe no mutwe wa kuti “Ikalilileni Muli Ifi Fintu.” Aebele abasambi ukuti: “Ukusekelela kwenu ukwingi mukakusanga mu kushipikisha.” Filambu nshi fifuma mu kushipikisha muli bumishonari nelyo mu mulimo wa bulesa uuli onse? “Pali fyonse, nga twashipikisha tulalenga umutima wa kwa Yehova ukusamwa . . . Mu kusungilila bumpomfu lintu twaeshiwa mwaba ukwikushiwa kukalamba . . . Lengeni bumishonari bube e mulimo wenu ubumi bonse . . . Icilambu cenu cikaba ni ‘mwabombeni’ uwa cikabilila.” (Mateo 25:21; Amapinda 27:11) Mu kusondwelela ilyashi lyakwe, Munyina Barry atubulwile no mutima onse ukuti bamishonari bapya ‘bekalilile muli ifi fintu’ ukupitila mu kupampamina pa kulenga ibala lya bumishonari ukuba e bumi bwabo.—1 Timote 4:16.

“Finshi Muli no Kumona?” e cipusho caipwishe Karl Adams, uwasambilishako amakalasi ayengi pa sukulu lya Gileadi. Alondolwele ukuti cintu bamishonari bapya bali no kumona mu mulimo wabo cashintilila pa menso yabo aya cine cine na pa menso ya mitima yabo. (Abena Efese 1:18) Ici calangililwe ku cintu inengu sha bena Israele shamwene lintu shalengwile Icalo Calaiwe. Amenso ya ishi nengu 12 yonse yamwene fimo fine, lelo ni shibili fye e shamwenene Icalo Calaiwe ifyo Lesa aalecimona. Bamishonari na bo kuti bamona ifintu mu nshila shapusanapusana. Mu fyalo fimo umo bakalabombela, napamo bakalamona ubupiina, ukucululuka, no kupelelwa. Lelo tabalingile ukutiine fi no kufulumukako. Munyina Adams ashimike ulwa kwa mishonari umo uwa mwi kalasi lya nomba line uwatile: “Ifi fintu fyanengele ukwiluka ukuti ningile ukwikala kuno. Aba bantu balekabila isubilo lya ku ntanshi. Ndefwaya ukuwamyako ubumi bwabo.” Mu kusondwelela Munyina Adams akoseleshe bamishonari bapya ukumona ifyalo baletumwako nge ncende isho Yehova alefwaya ukulunda kuli Paradise Wakwe uwa mwi sonde lyonse no kumona abantu babako nga bengesaba abekashi ba mu calo cipya.

Ilyashi lya kulekelesha muli ulu lubali lwa programu lyapeelwe na Wallace Liverance, uwabombele bumishonari pa myaka yafulilako ilyo ashilaba kafundisha wa pa Gileadi. Umutwe wakwe wali “Bombeni mu Kuba no Kumfwikisha Imilimo Yapesha Amano iya kwa Lesa.” Ukubomba no kumfwikisha cisanshamo ukubomba no kucenjela, ukushilimuka, na mano. E cintu ico Imfumu Shauli iya mu Israele yafililwe ukucita.—1 Samwele 13:9-13; 15:1-22.

Inshila imo iya kubombelamo mu kuba no kumfwikisha yaba kusuminisha amafya ayo ukwalukila ku mikalile ipya kuleta, ukusanshako ukusambilila ululimi lupya no kwishiba abantu. Ifya kukumanya bamishonari bapitamo ilyo balebomba na mafya no kucimfya ifipindami kuti fyabakosha lwa ku mupashi mu nshila Yoshua na Kalebu bakoshiwe ilyo balecimfya icalo ico Lesa abapeele.

Ukwipusha

Ulubali lwa programu ulwakonkelepo lwali kwipusha. Harold Jackson aipwishe Ulysses Glass, kalemba we sukulu kabili uwasambilishe pa Sukulu lya Gileadi pa nshita yalepa, uuli ne myaka 85 nomba. Bamishonari abengi abacili mwi bala balebukisha bwino bwino imyaka alesambilisha no kukansha ukwasakamanisha. Uwakonkelepo ni Mark Noumair, kafundisha wa pa Gileadi uwapoosele imyaka yafulilako mwi bala lya cilendo mu Afrika ilyo ashilaisaba kabomba wa pa Sukulu lya Gileadi. Aipwishe abasambi pa lwa butumikishi bwabo mu myeshi isano ilyo baalesambilila. Ifya kukumanya fyabo fyalangilile apabuuta ukuti mu cifulo balebombela mwaliba abantu abafwaya ukwishiba Icebo ca kwa Lesa.

Lyene Robert Ciranko na Charles Molohan balandile na baume babelesha abalesangwa kwi sukulu na limbi pa Patterson, isukulu lya ba mu makomiti ya musambo. Ukukabila kwa kuicefya no kusangwilako ku kwikatana kwa cilonganino fyali pa fintu baebele ikalasi lyalepwisha isukulu. Batubulwile ukuti abalepwisha isukulu tabalingile ukuumina fye pa cintu baletontonkanya ukuti e fyaba bumishonari, lelo ukucila, balingile ukuitemenwa ukwikala fye mu mibele iili yonse. Ukwabulo kutwishika ukubomfya uku kufunda kukaafwa bamishonari bapya ukufikilisha umulimo wabo nga bakafundisha ba Cebo ca kwa Lesa.

Mu kupelako, Theodore Jaracz, uwa mwi Bumba Litungulula, alandile kwi bumba pa mutwe wa kuti “Kusonga Nshi Ukuli na Maka?” Alondolwele ukuti fwe Bena Kristu nga twalangisha ifisabo fya mupashi, kuti twasonga abantu bwino. Atile: “Bamishonari batumwa no kuteyanya kwa kwa Yehova bacita ifintu fya kutasha ifya kusonga abantu bwino, mu mibele ya ku mupashi.” Lyene alandile ifyebo fya bantu bamo abaafwiwe ukubombela Lesa pa mulandu wa fya kumwenako fisuma ifya bamishonari. Asondwelele ukuti: “Shi sungilileni ukushimikwa kusuma uko abantu ba kwa Yehova banonka kabili twalilileni ukukonkonsha pa miinshi uko muletumwa ilyo mulefwaya abayana . . . Na kabili, ukupitila mu myendele yenu iyatambalala, iyasanguluka, kaaneni umupashi wa ici calo kabili songeni abantu bwino pa kuti Yehova akalumbanishiwe no kucindikwa.”

Mu kusondwelela programu onse, ceyamani abilishe imitende iyafumine lwa mupepi no kutali e lyo apeele amadiploma no kubilisha uko baletumwa kuli bumishonari. Ilyo papitile fyo, umo uwa bapwishishe isukulu abelengele ukusuminishanya kwe kalasi no kutasha pa kufundwa konse. Calimonekeshe ukuti, programu wa kupwisha isukulu lyalenga 102 alengele bonse abasangilweko ukupampamina nga nshi pa kutwalilila ukusabankanya Icebo ca kwa Lesa.

[Icikope pe bula 31]

Abalepwisha Isukulu lya Baibolo Ilya Gileadi Ilya Watchtower Ilya 102

Mu mutande pe samba, imitande ipeelwe amanambala ukufuma ku ntanshi ukuya ku numa, na mashina yatantikwe ukufuma ku kuso ukuya ku kulyo mu mutande umo umo.

(1) Duffy, C.; Alexis, D.; Harff, R.; Lee, J; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, .; Corey, G.