Ilyashi lya Bakabilisha ba Bufumu

Ukuputukako ku Kusonga kwa Fibanda

UKUPUPE mipashi kwaliteka amamilioni ya bantu pa myaka iingi. Lelo umo kuti aputukako! Ici e cacitike ku bengi aba mu musumba wa Efese uwa pa kale. Ukulingana no bulondoloshi bwa Baibolo, “abengi ba mu balecita amalele, pa kulonganya amabuuku yabo, bayocele pa menso ya bonse . . . E fyo icebo ca kwa Shikulu calekula, no kubombesha mu maka.”—Imilimo 19:19, 20.

Icilonganino ca Bwina Kristu ilelo naco cine cilekula. Nga fintu cali ku Efese, pali abo abaleisa mu kutetekela pali bamo abapupilepo ifibanda. Ica kukumanya cikonkelepo ukufuma ku Zimbabwe cilangilila ici.

Gogo (Nakulu) Mthupha alishibikwe sana pa mulandu wa bung’anga. Abantu balefuma ukushailepela pamo nga ku Zambia, Botswana, na South Africa ukuti abaposhe no muti wakwe. Gogo Mthupha alesambilishako na bambi ifya kuba ing’anga. Kabili inshita shimo, alelowa no kulowa!

Ubushiku bumo pa Mulungu ulucelo, Inte sha kwa Yehova ishali mu butumikishi bwa ku ng’anda ne ng’anda shatandalile Gogo Mthupha. Aliipakishe ukulanshanya na bena pa lwa bulayo bwa Baibolo ubwa calo cipya ica bulungami, icalo umushakabe ukusonga ukuli konse ukwabipa. Alipokele icitabo ca Kuti Waikala Kuli Pe na pe muli Paradise Pe Sondea no kusumina ukukwata isambililo lya Baibolo ilya mu ng’anda. Pa numa fye ya kusambilila imiku itatu, alitendeke ukulongana.

Ukupitila mwi sambililo lyakwe ilya Baibolo, Gogo Mthupha aishileishiba ukuti amaka yakwe ayaibela yafuma ku fibumbwa fya mupashi ifyabipa ifyapondokele bumulopwe bwa kwa Yehova. (2 Petro 2:4; Yuda 6) Na kabili aishileishiba ukuti ifi fibanda fyapampamina pa kufumya uuli onse kuli Yehova no kupepa kwa cine. Apantu mu kubomba ne mipashi ibifi emo aleliila, cinshi ali no kucita?

Gogo Mthupha asosele pa lwa fyo alefwaisha ukupoosa ifipuuta fyakwe fyonse ne fintu apandilamo. Ici casanshishemo impapa yakwe iya kufwala ku mutwe iyaibela ne “nsengo sha kwa cilume wa ng’ombe ishilanda,” fintu alebomfya pa kundapa nge ng’anga. Gogo Mthupha alefwaya ukupoosa ifinkolonkolo fya musango yu fyonse pa kuti abombele Lesa fye eka uwa cine kabili uwa mweo, Yehova.

Bamo balupwa lwakwe nangu ni fyo baalikeene pa mulandu wa kuti alebapako ulupiya. Baalimupaapeete ukuti abapeele ifinkolonkolo fya mipashi, pamo na maka yakwe aya mipashi pa kuti bengatwalilila ukumwenamo. Gogo Mthupha alikaninine fye ndai.

Mu kuba no bwafwilisho bwa cilonganino ca Nte sha kwa Yehova cintu alebishanya naco, aiswishe imifuko iikalamba itatu iya finkolonkolo fya mipashi kabili alifyocele fyonse. Ilyo umulilo washingulwike ifinkolonkolo fyakwe ifya kupepelamo ifiwa, Gogo Mthupha apundile ukuti: “Moneni! Lulya lusengo, te kuti luipusushe.”

Mu nshita, Gogo Mthupha mu buseko alangishe ukuipeela kwakwe kuli Yehova ukupitila mu kubatishiwa. Bushe ni mwi aliila nomba? Ni mu kushitisha umusaalu. Ee, ukupitila mu maka ya Cebo ca kwa Lesa, umo kuti aputukako ku kupepa ifiwa. Gogo Mthupha asosa ukuti: “Ukutula fye ilyo line ndayumfwa uwalubulwa nga nshi.”

[Futunoti]