llyashi lya Bakabilisha ba Bufumu

Ukucimfya Amafya mu “Calo ca Fishingenekelwa”

UMUTUMWA Paulo aipwishe Abena Kristu ba mu mwanda wa myaka uwa kubalilapo mu Korinti ukuti: “Ipenga nga lyalila icililelile, nani engaipekanisho kuya ku bulwi? Ifyo fine na imwe nga tamusosela mu lulimi insoso iingomfwika, kuti caishibwa shani icilelandwa?”—1 Abena Korinti 14:8, 9.

Mu Papua New Guinea, limo limo iciitwe Calo ca Fishingenekelwa, Inte sha kwa Yehova shikumanya ifipindami ifya kufuupula mu kubila ubukombe ubwaumfwika ubwa Baibolo. Bashimikila ku bantu abalande ndimi ishapusanapusana ukucila pali 700 kabili abakwate myata iyalekanalekana. Inte na kabili shilolenkana ne mpanga iya mpili, iishaba ne misebo, kabili no kufulilako kwa bumpula mafunde. Ukulundapo pali aya amafya yonse, kwabo kukaanya ukufuma ku mabumba yamo aya mipepele na ku bakalamba ba masukulu mu nshita shimo shimo.

Nangu ni fyo, ukukanshiwa kusuma ukwa ku mupashi no kufulilako ukwa fitabo ifya kwafwo kusambilila Baibolo mu ndimi sha cikaya, nafipangasha Inte ukubile mbila nsuma ngo kulila kwe penga ukwaumfwika. Ilingi ukwankulako kusuma kulabako, nga fintu amalipoti ayakonkapo yalelangilila:

• Ku kutampa kwa mwaka upya uwe sukulu, kafundisha umo alefwayo kwishibo mulandu abana ba Nte sha kwa Yehova tabapikila sulupu ku mendela nelyo ukwimbo lwimbo lwa cishipa. Aipwishe Maiola, umwana we sukulu uwa myaka iya bukulu 13 kabili uuli ni Nte iyabatishiwa. Maiola alondolwele mu kumfwika ubulondoloshi ubwashimpwa pa Malembo. Ulya kafundisha asuminishe ukupelulula kwakwe pantu kwafumine mu Baibolo. Bakafundisha na bambi balyumfwileko ifyo alelondolola.

Pa numa, lintu abana be sukulu baebelwe ukulemba amalyashi, Maiola asalile ukulemba pali Bulesa Butatu. Bamupeele amatoni ayengi mu kalasi pa lyashi alembele, kabili kafundisha aipwishe uko afumishe ifyebo. Amulangishe icitabo Kuti Waikala Kuli Pe na pe muli Paradise Pe Sonde mu ciNgeleshi. Kafundisha atambike ico citabo kuli bonse mu kalasi, kabili abengi bafwaile ukukwatako icitabo ca pa lwabo. Ubwakonkapo, Maiola ashalike ifitabo 14 na bamagazini 7 ku banankwe ba pa sukulu, kabili atendeke ukusambilila Baibolo na banankwe batatu. Ubuyo bwa kwa Maiola bwa kubo mutumikishi wa nshita yonse.

• Ukutula pa kutendeka kwa ba 1970, ibumba lyaba lyeka ilya Nte sha kwa Yehova mu mushi wa ku lulamba, mupepi na ku Port Moresby, lyalikumanya ukukaanya. Nangu cibe fyo, nomba line, bapokelele ukwafwa ukufuma ukushingenekelwa. Bushiku bumo, shikofu uwe calici lya ciAnglican kulya kwine, kabili umukaya wa mu Papua New Guinea uwasambilishiwe ku nse ya calo, aebele ibumba mwi calici ukuti bamwipushe ifipusho. Umwaume umo aipwishe ati: “Mwaba imipepele ibili mu mushi mu mwesu—baAnglican ne Nte sha kwa Yehova. Cinshi tulingile ukucita nge Nte shaisa pa mwinshi wesu?” Pa numa ya kukutumana pa nshita ntali, shikofu ayaswike ati: “Namwishiba, mu cine cine nshishibe ica kumweba. Nomba line, baNte babili aba cilumendo baishile pa mwinshi wandi. Nangu nakanshiwe ku yuniversiti, ilyo banjipwishe cipusho nshaishibe icasuko. Lelo mu kwanguka banjaswike ukufuma mu Baibolo. E co nshamwebe ifya kucita—mwe bene mupingulepo. Nga tamulefwaya mwilakutikako, lelo mwilabalulunkanya.”

Pa numa ya kutandalila ili bumba lya Nte, umwiminishi uwenda uwa Watch Tower Society ashimiko kuti: “Mupepi na bonse mu mushi balikutike ku Nte ilyo shaleshimikila. Bamo bapokelele fye ne Nte mu mayanda yabo. Nomba ukushimikila nakuwama.”