Bakabilisha Ba Bufumu Bacita Lipoti

Ukwikusha aba Nsala ya ku Mupashi—Mu Sukulu

“BA NSANSA abo abaibukila ulwa kukabila kwabo ukwa ku mupashi,” e fyasosele Yesu mu Lyashi lyakwe ilya pa Lupili. (Mateo 5:3, NW) Abana be sukulu abengi bali ne cilaka ca kwishiba kwa kwa Lesa ne mifwaile yakwe iya kusungusha. Bafwaya ifyasuko ku fipusho pa lwa bumi kabili bafwayo kwishibe fyo balingile ukwikala pa kuti bengapokelela ukusuminisha kwa kwa Lesa no kuba aba nsansa. Calimoneke mwi sukulu mu British Virgin Islands. Umo uwa Nte sha kwa Yehova kulya alondolola ukuti:

◻ “Nasangilwe ku kukumana kwa bafyashi na bakafundisha pe sukulu lya cikaya, kabili ifingi fyalilandilwe pa lwa miti ikola, ukunwa, ukwishishanya, ukutamba TV, amatoni, ne milandu imbi, e co napingwilepo ukusenda icitabo Ifipusho Abacaice Bepusha—Ifyasuko Fibomba no kucipeela kuli kafundisha mukalamba umwanakashi. Pa numa abebetele icitabo, asosele ukuti cali fye cintu balekabila kabili aipwishe nga ca kuti isukulu kuti lyakwatako kope kuli umo umo uwa basambi 120. Umulandu walilanshanishiwe na baeluda ba cilonganino, kabili bapingwilepo ukusangula ifitabo ku sukulu. Lintu twalumbwile ici, bakafundisha baipwishe ukuti tupeele ifitabo kwi bumba lya basambi. Inte shibili baliile, kabili umuputule waliswilemo abasambi abalebalolela. Bamunyina balandile pali citika we awala, kabili ifya kukumanya ukulangisha fintu icitabo caafwa abanono na bakalamba fyalibelengelwe ukufuma muli bamagazini ba Watch Tower Society. Lyene ifitabo fyalipeelwe ku basambi balefwaisha.”

Cili ica buseko ukwishibo kuti isukulu lyalipingulapo ukubomfya icitabo ngo lubali lwa masambililo ya lyonse ku baba mu magredi ya bune na ya busano. Mu cine cine cikaasuka ifipusho ifingi ifyo aba basambi bakwata pa lwa bumi ne nshita ya ku ntanshi.

Ukwikusha aba Nsala ya ku Mupashi—Mu Papua New Guinea

Ica kukumanya cakonkapo capokelelwe ukufuma kuli kangalila wenda. Cilangilila ifyo abantu baba ne nsala ya ku mupashi muli cilya calo na fintu impapulo shesu ishashimpwa pali Baibolo shaba isha kufumamo cimo mu kwikusha insala yabo.

◻ “Apantu nshakwete amaka ya kutandalila umushi wa Kamberatoro,” e fyasosele kangalila, “napoosele inshita yandi ukubomba pamo ne cilonganino icinono mu Vanimo. Kwaliba ubuseko ubwingi kulya. Impendwa ya bantu ukufuma ku Bewani balipokelele ifitabo. Umwaume umo anjipwishe ukwisatandalila uyu mushi, kabili aali no kumpayanishisha umwa kusendama. Abantu abengi baliba ababeleshanya ne fitabo fyesu. Cila nshita twaya kwi tauni lya Vanimo, ifitabo filapwa te mulandu no kusenda ifibokoshi fitatu ifya fitabo. Icitabo Candi ca Malyashi ya mu Baibolo cilangulukwa nge caumo mutengo nga golde. Abantu balecifwaya. Ifitabo nasendele fyalishalikwe mu kwangufyanya. Lintu twalangishe abantu ifitabo fyesu, bamo baali no kwipusha ukuti: ‘Nge citabo ca mutuntula cili kwi?’ Umwaume umo aipwishe mutanda. Alimpeele ishina lyakwe na adresi no kunjipusha ukukwata ukubilisha ukucitwa pa mulabasa lintu napokelela fyene. Kuti lyene aisa ukufuma ku mushi wakwe ku kupoka fyene.” Kangalila wenda alundapo kuti: “Nasangile ukuti abantu abengi mu Vanimo balipokelele ifitabo Mankind’s Search for God na Ifipusho Abacaice Bepusha—Ifyasuko Fibomba.”

Ici cilangilila ifyo abantu ba mitima ya bufumacumi baba ne nsala ya ca kulya ca ku mupashi icisangwa muli Baibolo na mu mpapulo isho Yehova apayanya ukupitila mu “musha wa cishinka kabili uwashilimuka.” (Mateo 24:45-47) Fintu Inte sha kwa Yehova baba aba nsansa pa kuba na maka ya kwaafwa aba bantu ba nsala ya cine!

[Icikope pe bula 19]

Ukucitilo bunte mu Papua New Guinea