Mulebomfya Bwino Impapulo Shesu Ishilanda Pali Baibolo
1, 2. Bushe abantu abengi batila shani pa mpapulo shesu, kabili ifyo balanda filenga twaipusha atuti shani?
1 “Natendeke ukubelenga impapulo shenu mu 1965. Ndabelenga na malembo ya mu Baibolo ayabamo, kabili fyonse ifiba mu mpapulo shenu, e fyo na Baibolo ilanda. Ndafwaisha ukwishiba Lesa na Yesu bwino bwino, kabili ukulanda fye cishinka, mu mpapulo shenu na mu Baibolo e mo nsange cine.” Ifi e fyebo umuntu umo alembeele ku maofesi yakalamba aya Nte sha kwa Yehova. Muli iyi yine kalata alombele ne sambililo lya Baibolo.
2 Abantu abengi sana pano calo na bo balatasha pa mpapulo shitusambilisha ifyaba mu Baibolo, ishilembwa no “musha wa cishinka kabili uwashilimuka.” (Mat. 24:45) Cila mwaka impapulo ishingi icine cine shilalembwa ku kwafwilisha abafumacumi “ukwishiba bwino bwino icine.” (1 Tim. 2:4) Bushe cinshi twingacita pa kuti tulebomfya bwino impapulo shesu ishitusambilisha ifyaba mu Baibolo?
3. Kuti twacita shani nga tatulefwaya ukulaonaula impapulo?
3 Mwilaonaula: Mu kuya kwa nshita kuti twalonganika impapulo ishingi ukucila ne sho tulekabila. Kuti twacita shani nga tatulefwaya ukonaula impapulo shesu ishacindama? Mulesenda impapulo ishalinga. Ukucila ukupoka impapulo ishingi isha kutambika, kuti twasenda fye lumo nelyo shibili; nga twashalika e lyo twingesapokako na shimbi. Nga tulecite fi ninshi impapulo te kuti shiletuulama mu mayanda yesu. Kabili, nga twalikwata bamagazini abengi abatuulama, kuti cawama nga twacefyako impendwa iyo twalembesha ukupokako.
4. Cinshi cingacitwa nga ca kutila impapulo icilonganino cikwete shafulisha?
4 Impapulo Nga Shafulisha: Nga ca kutila impapulo icilonganino cikwete shafulisha, kampanya wa fitabo kuti aipushako ifilonganino fimbi ifyaba mupepi nga kuti babomfyako shimo. Bakasabankanya kuti bashalika impapulo sha kale kuli balupwa lwabo abashasumina, ku basambi ba Baibolo, na ku bantu fye bambi. Abatendeke ili line ukulongana kuti batemwa ukukwata impapulo sha kale isha kuti balebelenga.
5. Nga tulatasha pa mpapulo shesu, tukalacita cinshi?
5 Tulefwaya impapulo shesu ukulabomba ukulingana ne co shilembelwa, e kutila, ukwafwa abafumacumi ukusambilila ifintu ifisuma sana ifyo Yehova afwaya ukucita. Nga filya fine Yesu ashaonawile ifya kulya fyasheleko pa numa ya kuliisha abantu abengi mu cipesha mano, e fyo na ifwe tufwile ukupanga mu mitima yesu ukulabomfya bwino impapulo shishaiwamina ishilanda pali Baibolo. (Yoh. 6:11-13) Ubukombe bwe pusukilo ubwaba mu mpapulo shesu te kuti bufike pa mitima ya bantu nga ca kutila impapulo shileikala fye pa mashelufu nelyo mu fyola fyesu. E ico, ilyo tulefwaya impapulo sha kubomfya mu mulimo, tufwile ukusenda fye ishalinga no kushibomfya bwino pa kuti bambi bamwenemo.—Fil. 4:5.