Ukutambika Impapulo mu Cifulo Balanda Indimi Ishingi
1. Mulandu nshi ifilonganino ifingi filekabila impapulo sha mu ndimi shimbi?
1 Mu fifulo ifingi umo tushimikila, nomba muleba na bantu bafuma ku fyalo fimbi. Abengi basambilila bwangu no kumfwikisha bwino icine nga ca kuti basambilishiwa mu lulimi lwabo. Bushe mapekanyo nshi yabako aya kwafwilisha abalesekelela ne mpapulo shilanda pali Baibolo mu lulimi bengomfwikisha?
2. Kumfwana nshi kufwile ukubapo lintu ifilonganino fibili nelyo ifyafulilako ifilanda indimi shapusana fibombela mu cifulo cimo?
2 Ilya kushalika Impapulo: Ilyo ifilonganino fibili nelyo ifyafulilako ifilanda indimi shapusana fibombela mu cifulo cimo cine, baeluda bakabomfya bakangalila ba mulimo pa kutantika inshila yawamisha iya kushimikila mu kukumanina ku balanda isho ndimi. Ilyo bakasabankanya baleshimikila ku ng’anda ne ng’anda, te lyonse bengatambika impapulo sha mu lulimi lwa cilonganino cimbi. Lelo, ilyo bakasabankanya baleshimikila mu lyashi nelyo mu fifulo fya cintubwingi, kuti batambika impapulo sha mu ndimi shimbi.—Moneni Ubutumikishi Bwesu Ubwa Bufumu ubwa October 1990 pa Umukululo wa Cipusho.
3. Bushe ni lilali icilonganino cingakwata impapulo sha lulimi lumbi?
3 Ilya Kukwata Impapulo: Cinshi twingacita nga ca kuti kuli ibumba lya balanda ululimi lumbi lelo tapali icilonganino cilanda ulo lulimi? Nga caba ifyo, icilonganino kuti pambi casungako impapulo ishinono ishifwaikwa sana ishaba muli ulo lulimi, pamo nga amatrakiti, na mabroshuwa ya Cintu Lesa Afwaya na Cibusa wa kwa Lesa, ne citabo ca Ukwishiba. Bakasabankanya kuti batambika ishi mpapulo lyonse ilyo bakumanya abaishiba ukubelenga ulo lulimi.
4. Bushe impapulo icilonganino cishikwata kuti shaordwa shani?
4 Ifya Kuorda Impapulo: Nga ca kuti icilonganino tacikwata impapulo sha mu lulimi ulo umuntu ulesekelela abelenga, bushe ninshi kuti bakwata shani? Kasabankanya afwile ukwipusha umubomfi wa fitabo pa kuti eshibe impapulo shaba muli ulo lulimi pa kuti pa kuorda kukonkelepo ukwa cilonganino kuti fyasanshiwamo.
5. Bushe cinshi tushalikila impapulo sha Bwina Kristu?
5 Shi natulebomfya bwino impapulo sha Bwina Kristu pa kuti twafwe “abantu ba misango yonse,” te mulandu no lulimi balanda, ‘ukufika ku kwishiba bwino bwino icine no kupusuka.’—1 Tim. 2:3, 4.