Ifya Kucita nga Mulekabila mu Kwangufyanya Impapulo sha Fitundu Balanda ku Fyalo Fimbi

Inshita shimo tulasanga abantu abatemwa ukubelenga impapulo shesu mu citundu ca ku calo cimbi isho tushakwata pa cilonganino cesu. Bushe mwalishiba ukuti nga ca kuti mulabomfya intaneti kabili mwalikwata mashini ya kupulintilako ifyebo, kuti mwaipulintila impapulo ishaba mu fitundu mupepi na 400? Moneni ifyo mwingacita:

• Kabiyeni kuli adresi ya sosaiti iya, www.watchtower.org.

• Ku lubali lwa ku kulyo mwalamona umutande unono uwa fitundu. Tinikeni pa kakope akalangilila icalo pa kuti mumone ifitundu ifyabamo.

• Tinikeni icitundu mulefwaya. Ibula lyalaisuka ililelangilila impapulo isho mwingapulinta, pamo nga amatrakiti, amabroshuwa, e lyo ne fipande. Pa mulandu wa kuti ibula ilyo mwaisula lyalembwa mu citundu ico musalile, mwisakamana nga ca kuti tamwishibe imitwe ya fipande.

• Tinikeni pa mutwe uuli onse. Ifyebo fikamoneka pali komputa yenu kabili kuti mwapulinta nga mwatinika aka kupulintilako.

Pa Intaneti paba fye ifyebo finono; impapulo shimbi shaba mu cilonganino. Nga mwasanga uulefwaisha impapulo shesu, kuti cawama ukupoka impapulo ku mubomfi wa fitabo.