Inshila ya Kubafwilamo

Abena Kristu ba cine balabomba umulimo wa kushimika imbila nsuma ku cintubwingi. (Fil. 2:17) Pa kupwishishisha uyu mulimo, amabroshuwa, amatrakiti, ne mpapulo shimbi ishayanguka ukuumfwa shalibikwa pa Intaneti. Ishi mpapulo shaba mu ndimi 20 kabili web site ni www.watchtower.org. Iyi Web site teyakusabankanishishamo impapulo ishipya ku Nte sha kwa Yehova. Ico yabelako kwafwilisha icinabwingi ukwishiba ifyebo fine fine ifyo Inte sha kwa Yehova basambilisha pali Baibolo.

Nomba line, ulupapulo na lumbi balubikile pali iyi Web site. Ulupapulo babikilepo ni Broshuwa ya Cinshi Cintu Lesa Afwaya Kuli Ifwe? mu ndimi ukucila 220. Na kabili, bamagazini ba Ulupungu lwa kwa Kalinda na Loleni!, aba mu ndimi shonse, bakulaaba na Web address yesu pa nkupo iya kulekelesha. Bamagazini ba Ulupungu lwa kwa Kalinda ulwa January 1 na Awake! ya January 8, 2004, e bakabalilapo ukukwata iyi Web address.

Bushe kuti mwaibomfya shani? Nalimo kuti mwakumanya abantu abengafwaisha ukubelenga impapulo shesu lelo abashaishiba ululimi mulanda. Nga balabomfya intaneti kuti mwabalanga adresi uuli pa nkupo ya kulekelesha iya Ulupungu lwa kwa Kalinda nelyo Loleni! Ukubalanga iyi adresi kuti kwalenga baibelengela broshuwa ya Cintu Lesa Afwaya mu lulimi lwabo ukufikila ilyo mu kabatwalila impapulo mu lulimi lwabo. Nelyo kuti mwaeba aba mu cilonganino nelyo ibumba ililanda ulo lulimo ukuyabatandalila.