Tendekeni Ukushimikila ku Bantu Abafuma ku Fyalo Fimbi
1. Ni bani bambi abo twingashimikila ilyo tulebomba mu fifulo tushimikilamo?
1 Yesu Kristu asobele ukuti imbila nsuma ikabilwa mu calo conse “ku kuba ubunte ku nko shonse.” Bonse ababombako umulimo wa kushimikila no kusambilisha balishiba ifyo aya mashiwi yacindama. (Mat. 24:14; 28:19, 20) Ilyo tulebomba uyu mulimo wa kushimikila no kupanga abasambi, nalimo kuti twasanga abantu abafuma ku fyalo fimbi abalanda ululimi lumbi. Abantu ba musango yu na bo bafwile ukumfwa ubukombe bwa Bufumu no kubika sana amano ku fyo balesambilila ilyo ubushiku bwa kutiinya ubwa kwa Yehova tabulafika. (Mal. 3:18) Bushe kuti twatendeka shani ukulashimikila ku bantu abafuma ku fyalo fimbi ababa mu cifulo tushimikilamo?
2. Bushe ni mwi twingapashanya Yehova ilyo tulelanda na bantu abalanda ululimi lumbi?
2 Mulemona Abalanda Ululimi Lumbi nga Filya Yehova Abamona: Nga tulefwaya ukulanga abantu ifyo Yehova abatemwa bonse ukwabula akapaatulula, tufwile ukulafwaisha ukwafwa bonse pa kuti beshibe bwino Lesa wa cine Yehova, te mulandu no lulimi balanda. (Amalu. 83:18; Imil. 10:34, 35) Nangu ca kuti tubika sana amano ukushimikila ku bantu abalanda ululimi icilonganino tulonganamo cibomfya, tufwile no kulatontonkanya na pa fyo twingafwa abalanda ululimi lumbi e lyo no kumona ifyo twingabashimikila ubukombe bwa Bufumu. Nga tatuleshimikila ku bantu abalanda ululimi lumbi ninshi tatulepashanya Yehova uufwaya abantu bonse aba mu nko ukubashimikila. Finshi kanshi tufwile ukucita pa kuti tuleshimikila ku bantu abalanda ululimi lumbi?
3. Bushe katabo nshi aka kutwafwa ako bapekanya, kabili kuti twaipekanya shani ukukabomfya mu kushimikila?
3 Mulebomfya Akatabo ka Good News for People of All Nations: Aka katabo bakapangila ukuti tulebomfya pa kushimikila ku bantu abo twasanga abalanda ululimi lumbi. Lyonse mulesenda aka katabo, mukeshibe bwino bwino, kabili mulekabomfya. Pa kuti tamulepoosa inshita ukufwaya ifyebo, bikeni ifishibilo apasangwa indimi isho abantu ababa mu cifulo mushimikilamo balanda. Nga ca kuti impapulo shilasangwa muli isho ndimi, kuti caba bwino mwasendako ishinono pa kuti nga mwalanshanya no muntu ifili mu katabo, mwamushila ulupapulo.
4. Bushe kuti twabomfya shani akatabo ka Good News ilyo tuli mu mulimo wa mwi bala?
4 Ilyo muleshimikila nga mwasanga umuntu uulanda ululimi lumbi kabili tamwishibe no lulimi alanda, mulangeni inkupo ya katabo. Mulangeni pa nkupo apaba mapu ya calo, balilenipo ukuisonta mwe bene e lyo musonte ne calo umo mwikala, kabili mwebeni ukuti mulefwaya ukwishiba icalo ico ena afumako e lyo no lulimi alanda. Nga mwaishiba ululimi alanda, kabiyeni pe bula apo balemba ati table of contents, fwayeni ibula apali ulo lulimi, kupukuleni pali ilyo bula kabili langeni uyo muntu ifyebo ifyafiita ifili pa muulu we bula, e lyo mwebeni ukuti mulefwaya abelenge ifyebo filipo. Lilya apwisha ukubelenga, mupeeleni trakiti iya mu lulimi lwakwe nelyo sonteni pa mashiwi ayapentelwepo, ayalelanga ukuti kuti mwatemwa ukubwela ku kumuletela icitabo mu lulimi lwakwe. Lyena sonteni pa filembo fyafiita ifiletila “ishina lyandi,” kabili landeni ishina lyenu bwino bwino. Pa numa sonteni apali ifilembo fyafiita ifiletila “ishina lyenu,” kabili loleleni amwebe ishina lyakwe. Pekanyeni bwino pa kuti mukabweleleko.
5. Cinshi twingacita pa kuti twafwe abantu abalanda ululimi lumbi abalefwaya ukusambilila Baibolo?
5 Bweleleniko Ku Bo Mwalaile: Tulingile ukwesha na maka ukubwelela kuli bonse abatemenwe ubukombe bwa Bufumu ilyo twalanshenye na bo pa muku wa kubalilapo te mulandu no lulimi balanda. Nga twasanga umuntu uulefwaya sana ukusambilila pali Lesa na pa Cebo cakwe Baibolo, tufwile ukulemba formu iitila Mukwai Fwayeni Uyu Muntu (S-43) kabili ukwabula ukupoosa inshita peeleni kalemba wa mu cilonganino uufwile ukutuma iyi formu kwi ofeshi lya musambo pa kutila uyo muntu bakamutandalile ku balanda ulo lulimi. Lyena iofeshi lya musambo likatuma formu kwi bumba lya bamunyinefwe ababomfya ulo lulimi. Bamunyinefwe nga bapokelela fye formu bakatandalila uyo muntu bwangu bwangu. Kalemba wa pa cilonganino alingile ukupeelako kope ya iyi formu ya S-43 kuli kangalila wa mulimo pa kuti aleishiba ubwingi bwa balanda ulo lulimi abalefwaya ukusambilila Baibolo. Mufwile ukulemba iyi formu ilyo mwashininkisha ukuti umuntu alefwaya sana ukusambilila Baibolo.
6. Nga twasanga umuntu uulanda ululimi lumbi uulefwaya ukusambilila Baibolo, bushe cinshi tufwile ukucita?
6 Ukutula apo kalemba wa pa cilonganino apokelela formu ya S-43 ukufika ilyo kasabankanya uwaishiba ulo ululimi akaya kuli uyo muntu uulefwaya ukusambilila Baibolo, nalimo kuti papitako inshita. E ico kanshi, ilyo muntu uulefwaya ukusambilila Baibolo talafuupuka, kasabankanya uwatumine formu ya S-43 afwile ukutwalilila ukulayako kuli uyo muntu ukufikila kasabankanya uwaishiba ulo ululimi akamutandalile. Nga tabasangile bwangu kasabankanya uulanda ulo lulimi, kasabankanya uwasangile uyu muntu kuti atendeka ukutungulula isambililo lya Baibolo kuli uyo muntu. Nangu cibe fyo, pali iyi nshita ilyo balefwaya kasabankanya uwaishiba ululimi ulo uyo muntu alanda, bushe kasabankanya uwamusangile akalafumya kwi impapulo sha kutwalila uulefwaya ukusambilila Baibolo?
7. Bushe ni kwi twingafumya impapulo mu ndimi ishilanda abantu abo nalimo twingakumanya ilyo tuleshimikila?
7 Impapulo mu Ndimi Shimbi: Ifilonganino tafifwile ukuorda impapulo ishingi isha mu lulimi lumbi. Lelo nga ca kuti kangalila wa mulimo amona ukuti abantu abalanda ululimi lumbi balefwaya ukusambilila Baibolo, kuti nalimo caba bwino ukusungako impapulo ishalinga muli ulo lwine lulimi isho bakasabankanya bengalabomfya mwi bala. Pa cilonganino nga tapali isho mpapulo, kuti nalimo baorda. Limbi kuti papita inshita pa kutila mukapokelele impapulo sha muli ulo lulimi. Kanshi e co babikilako adresi ya pa Intaneti iya www.watchtower.org apo mwingafumya ulupapulo mulefwaya. Pali iyi adresi ya pa Intaneti paliba impapulo mu ndimi ishingi isho kasabankanya nelyo uulefwaya ukusambilila Baibolo engasanga ifyebo bwangu. Tatuletwishika ukuti uku kupekanya kwa pa Intaneti kukafwa bakasabankanya ilyo balefwaya ukusambilisha abalanda ululimi lumbi abalefwaya ukusambilila Baibolo.
8. Bushe finshi icilonganino cifwile ukucita pa kwafwa abalefwaya ukusambilila Baibolo abalanda ululimi lumbi?
8 Ifyo Icilonganino Cifwile Ukucita: Kulabako incende shimo uko abantu abalanda ululimi lwa ku calo cimbi batendeka ukufula, nalimo kuli ishi ncende te kuti kube icilonganino mupepi icibomfya ulo lulimi. Nga caba ifyo, bonse abalefwaya ukusambilila Baibolo abalanda ululimi lumbi nalimo kuti mwabalaalika ukusangwa mu kulongana. Nga mwabapokelela bwino e lyo bamona no kuti namubatemwa, kuti nalimo balasangwako lyonse mu kulongana. Nalimo pa kubalilapo te kuti batemwe sana pa mulandu wa lulimi ne ntambi, lelo nangu cibe fyo, takwaba icingalesha ukutemwa kwa cine ukuba pa Bena Kristu ba mwi sonde lyonse aba Nte sha kwa Yehova. (Sefa. 3:9; Yoh. 13:35) Bushe mulalanda ululimi lumbi bwino bwino? Nga ca kuti mulalanda kabili kuti mwatemwa ukuyamona abalefwaya ukusambilila abalanda ulo lulimi, mukwai ebeni kalemba wa pa cilonganino pa kuti eshibishe iofeshi lya musambo. Nga mwacita ifyo ninshi mwawamya, pantu ilyo iofeshi lya musambo likalafwaya kasabankanya uwa kuyatandalila uulefwaya ukusambilila Baibolo muli ulo lulimi, kuti bamutuma imwe bene.
9. Bushe ni lilali kufwile ukuba isukulu lya kusambilila ululimi lumbi, kabili kuti lyatendeka shani?
9 Ukusambilila Ululimi: Nga muleafwa abalanda ululimi lumbi, kuti caba bwino sana ukubakoselesha balelongana mu cilonganino icibomfya ululimi lwabo nga ca kutila ico cilonganino caba mu mupepi. Lelo nga tapali icilonganino icili mupepi, bakasabankanya bamo kuti nalimo basalapo ukusambilila ulo lulimi pa kutila baleafwa bwino abalefwaya ukusambilila Baibolo. Nga tapali icilonganino mupepi, e lyo ne ofeshi lya musambo lyamona ukuti abalanda ululimi lumbi nelyo abana calo abalefwaya ukusambilila ulo lulimi bafula, kuti lyamona nga kuti kwaba isukulu lya kusambilila ulo lulimi nelyo iyo. Iofeshi lya musambo nga lyamona ukutila isukulu lifwile ukubako, bakeshibisha ifilonganino ifili mupepi pa mapekanyo ya kubikako isukulu kabili iofeshi likeba ifyo filonganino ukuti bakabilishe. Bonse abalefwaya ukusangwa kuli ili sukulu lya kusambilila ulo lulimi, bafwile ukukwata ubuyo bwa kukuukila kuli ili bumba nelyo icilonganino pa kuti bafwe abengi abalanda ulo lulimi.
10. Ni lilali ibumba lya balanda ululimi lwa ku calo cimbi lingapangwa, kabili finshi fifwaikwa pa kuti lipangwe?
10 Ukupanga Ibumba: Pa kuti ibumba lipangwe ilya bantu abalanda ululimi lumbi, ifintu fine e fikabilwa. (1) Kufwile ukuba abantu abengi abalefwaya ukusambilila Baibolo abalanda ulo lulimi. (2) Kufwile ukuba ibumba ilya bakasabankanya abaishiba nelyo abalesambilila ulo lulimi. (3) Pafwile paba eluda nelyo umubomfi utumikila uwafikapo uwingatungulula ukulongana nangu fye umuku umo mu mulungu muli ulo lwine lulimi. (4) Baeluda bafwile ukuitemenwa ukwafwa ili ibumba ilipya. Nga bakumanisha bwino ifi fyonse ififwaikwa, baeluda balingile ukweba iofeshi lya musambo pa fyo ibumba lili e lyo no kulyeba ukuti icilonganino cabo e ciletungilila ili bumba lya balanda ululimi lwa ku calo cimbi. (Moneni icitabo ca Abaiteyanya, amabu. 106-107.) Eluda uuleyangalila ili bumba akulaitwa ati “kangalila we bumba” e lyo nga mubomfi utumikila ninshi ni “kafwa we bumba.” Uyu wine uuleangalila ibumba ninshi e ufwile no kulisakamana.
11. Mulandu nshi cicindamine ukutendeka ukushimikila ku bantu abalanda ululimi lwa ku calo cimbi mu cifulo tushimikilamo?
11 Ukutendeka ukulashimikila ku bantu abalanda ululimi lwa ku calo cimbi mu cifulo tushimikilamo kwalicindama sana ku mulimo wesu uwa mwi sonde lyonse uwa kushimikila uo Yesu Kristu ica kumwenako cesu atendeke. Lekeni tube abacincila muli uyu mulimo no kulamonako uko Yehova aletwalilila ukutensha inko no kubuulamo ifisuma fya mu nko. (Hag. 2:7) Ala mwandini caliwama ukuba abaikatana ilyo tulebomba uyu mulimo wa kushimikila ku balanda ululimi lumbi! Shi Yehova natupaale ilyo tulebombesha ukushimikila ku bantu abalanda indimi sha ku fyalo fimbi ababa mu fifulo tushimikilamo. Lyonse natuleibukisha ukuti te mulandu ne fyo cingafya ukulanda no kumfwa ululimi lumbi, ni Lesa e umesha!—1 Kor. 3:6-9.