Nga Twasanga Abalanda Ululimi Lumbi
1. Mulandu nshi tulingile ukulaumfwana bwino na banensu nga twakumana nabo mu cifulo tulebombela?
1 Imiku iingi, bakasabankanya ba Bufumu ukushinguluka isonde lyonse balasanga abalefwaya ukusambilila Baibolo abalanda ululimi lumbi ulo icilonganino cishibomfya. Pa kuti bafwilishe abantu ba musango yu, amaofesi ya musambo ayengi yalepanga amabumba ayalanda indimi shimbi nangu ukupanga ifilonganino. Mu cifulo cimo kuti mwaba abantu abalanda indimi ishingi. E lyo muli ici cine cifulo kuti limbi mwaba ne filonganino ifingi ifilanda indimi ishapusanapusana ifishimikila mu cifulo cimo cine. Bushe ifilonganino kuti fileumfwana shani ilyo filebomba umulimo wa kubila ukwabula icimfulumfulu?—1 Kor. 14:33.
2. Ilyo tuleshimikila ku ng’anda ne ng’anda, kuti tuleumfwana shani ne bumba ililanda ululimi lumbi nangu icilonganino icaba kuntu twikala?
2 Ukumfwana: Ilyo kasabankanya aleshimikila mu musebo nangu aleshimikila ilyo alelanda fye ilyashi no muntu umbi, afwile ukulanda no uli onse, ukubikako na balanda ululimi lumbi, no kumupeela impapulo mu lulimi ulo uyu muntu alefwaya ukubelenga. Lelo, ilyo kasabankanya alebomba ku ng’anda ne ng’anda mu cifulo cimo cine umubombela ibumba limbi ililanda ululimi lumbi nangu icilonganino, kasabankanya alingile ukubika sana amano ku mayanda umwikala abalanda ululimi lwa cilonganino alonganamo. Nga ca kuti ifilonganino ifyapusanapusana fishimikila mu cifulo cimo cine, calicindama ukulemba bwino bwino ifyo mulebomba. Bakangalila ba mulimo balingile ukulalanshanya no kutantika bwino ifintu pa kuti bonse balebomba bwino. (Amapi. 11:14) Lelo, nga ca kuti kasabankanya asanga uulanda ululimi lumbi ilyo aleshimikila ku ng’anda ne ng’anda kabili takwaba ifilonganino ifya ulo lulimi mupepi, kasabankanya afwile ukwesha na maka ukushimikila uyo muntu no kutwalilila ukulamwafwa.
3. Kuti twacita shani nga twakumana na bakasabankanya ababa mwi bumba ililanda ululimi lumbi nangu icilonganino balebombela mu cifulo cimo cine umo na ifwe tulebombela?
3 Tubomba Umulimo Umo Wine: Bushe bakasabankanya aba mu filonganino fyalekanalekana kuti bacita shani nga ca kuti bushiku bumo caba fye nkuma ukutila baleshimikila mu cifulo cimo cine? Kwena, nangu pabe ukupusana mu ndimi, ukutemwa kwa bwina Kristu e kulingile ukupulamo kabili bonse balingile ukwishiba ukuti icicindeme sana kushimikila abantu ababa muli ico cifulo. (Yoh. 13:34, 35) E ico, abaletungulula balingile ukwishiba bwino ifya kucita no kulanga ukutemwa ilyo balepingula nampo nga ibumba limo lifwile pali iyo nshita ukuleka ukubombela muli ico cifulo no kuya kumbi.—Yako. 3:17, 18.
4. Busesemo nshi ubulefikilishiwa muno nshiku?
4 Baibolo yasobele ukuti abantu abalanda indimi ishalekanalekana bali no kumfwa imbila nsuma. (Ukus. 14:6, 7) Nga kwaba ukumfwana no kubombela pamo, bakasabankanya ababa mu mabumba yalanda indimi shimbi nangu ifilonganino tabakalebombela mu mayanda yamo yene kabili bakalabila imbila nsuma ku bapya abengi, ukubikako na balanda ululimi lumbi.—Efes. 4:16.