Bushe Mwalikatamika Impapulo Shesu?

¹ Daimani na mabwe yambi yalikatamikwa pa mulandu wa kuti yaliyemba e lyo ya mutengo nga nshi pa kuyasanga no kuyemba. Ukwishiba Yehova na Yesu Kristu kwalikatama no kucilapo, kabili impapulo shesu e mpapulo fye sheka pe sonde ishilondolola mu kushika ifi fyuma fya ku mupashi na mano ya bukapepa. (Rom. 11:33; Fil. 3:8) Kuti twalanga shani ukuti tulatasha icine cine pa mpapulo shesu?

² Abantu abengi pamo ne ndupwa lyonse balabikako umusangulo pa mbali uwa kutwala ku Ng’anda ya Bufumu no kupoosa mu kabokoshi kalembwapo ati “Imisangulo ya Kwafwilisha Umulimo wa Sosaite uwa mwi Sonde Lyonse.—Mateo 24:14.” Na kabili balasangwilako ku mulimo wa mwi sonde lyonse lintu bapokako impapulo nelyo bamagazini na lintu bapoosa mu tubokoshi imisangulo bafumya mwi bala.

³ Inshila na imbi iya kulangisha ukuti tulatasha yaba kusalulula aba kushalikako impapulo mu mulimo wa mwi bala. Teti tufwaye ukupeela daimani wa mutengo ku kanya, akashingeshiba ubucindami bwa iko. E fyo ne mpapulo shesu ishakatama, tatupeela abantu abashakatamika ifya ku mupashi. (Linganyeniko AbaHebere 12:16.) Ukuipeelesha fwe bene ne mpapulo shesu kufwile ukwendela pamo no kwiluka. Bushe mwine ng’anda alefwaya ukulanshanya? Bushe alekutika ilyo tulelanda, aleyasuka amepusho tuleipusha, no kukonkamo ilyo tulebelenga Baibolo? Nga ca kuti alecite fyo, tulaitemenwa ukusha ulupapulo ulumulingile. Lintu tuletungulula amasambililo mu mpapulo shesu, tulaafwa abantu ukwishiba ifyo Baibolo isambilisha kabili kulaba ishuko lya kuti kuti balundulula bucibusa na Yehova. Icipima sana ifyo umuntu engamwenamo mu mpapulo shesu, ni fintu shabomfiwa.

⁴ Impapulo shishala pa shelufu ku Ng’anda ya Bufumu nelyo ku mwesu ninshi tashilebomba imifwaile ya shiko, kabili ubucindami bwa shiko tabulenonsha abantu. Tufwile ukubomfya bwino nangu fye ni bamagazini ba kale, amabroshuwa, ifitabo fya nkupo shakosa, na matrakiti.

⁵ Lyonse muletontonkanyapo bwino ubwingi bwa mpapulo sha kwananya muli no kukabila. Ukulingulula bwino kulakabilwa. Ilintu kuti mwakabila ishafulilako, maka maka nga mulebomba bupainiya, tamulekabila ukukwata ishafulisha, pantu kuti mwapoka na shimbi ku Ng’anda ya Bufumu ilyo ukulongana ukuli konse kushilatendeka e lyo na lintu kwapwa. Ipangasheni ne mpapulo mulekabila ku kutendeka kwa mweshi kabili mwakulapokelapo na shimbi ilyo isho mukwete shileya shilepwa.

⁶ Ibukisheni no kuti, nga tatulondolwele bwino mu mulimo wa mwi bala inshila ipya iya kwananishishamo ifitabo, cikakosa sana ukulungika bamo pa lwa mashiwi yabangukila ukulanda nelyo inshila sha kubomfya. Bamo balilenga abantu ukulatontonkanya ukuti impapulo shesu nomba sha kufolesha fye kabili calyafya ukulungika abatontonkanye fyo. Indalama shilakabilwa pa kushita amapepala, pa kupulinta no kutuma impapulo mwi sonde lyonse, ukulundapo no mulimo wa kupilibula mu ndimi mupepi na 350. E co bakasabankanya balingile ukweba mwine ng’anda ukuti tulesha impapulo ukwabula ukulipilisha no kuti tulapokelela nga ca kuti umo apeelako ubupe.

⁷ Impapulo shesu shicilamo ukukatama nga ca kuti shashala ku bantu abatesekesha Icebo ca kwa Lesa ica cine. E co ifwe bonse natube aba mano kabili abashilimuka mu kubomfya ifyo twapeelwa, muli fyo ukulangisha ifyo twakatamika nga nshi impapulo shesu.