Ukutasha pa Mpapulo Shesu
1 “Ku kucita amabuuku ayengi takuli mpela.” (Luk. Mil. 12:12) Amabuuku ayengi ya cabe cabe. Lelo impapulo sha Watchtower Society shena shaibela. Sha mutengo wa patali pantu shabamo ifya kulya fya ku mupashi ifingapususha abantu. Shafwa abantu ukwishiba Yehova, no kukosha icitetekelo ca bamwishiba kale kabili abaipeela ku kumubombela.
2 Tufwaya na bambi ukubelengako impapulo shesu apo twalishiba ukuti na bo kuti bamwenamo. Nangu ca kuti tusha ukwabula ukulipilisha, kwaliba ifipooswapo pa kushipulinta no kushisabankanya. Kanshi tatulefwaya ukulafolesha fye impapulo. Nga tatwishibe bwino bwino nga mwine ng’anda alesekelela nelyo iyo, ilingi tusha fye trakiti. Tufwile ukubwelela kuli bonse abapokako impapulo shesu, kabinge nga bacili balesekelela ne yo ine nshita, kuti twashalika ulupapulo na lumbi.
3 Bamo balashimunuka ukweba mwine ng’anda ukuti umulimo wesu wafwilishiwa ne misangulo ya kuitemenwa, lelo ilingi line cisuma ukulumbula ici. Ici kuti calenga mwine ng’anda ukwishiba ukuti umulimo wesu te wa bukwebo. Citucinkulako lyonse ukuti ico twaimininapo caba kushimikila imbila nsuma ya Bufumu no kupanga abasambi. Cilatwafwa ukwishiba abalesekelela icine cine. Abantu ilingi balakwata indalama sha kupoosa ku fishikabilwa sana na ku mpapulo sha ku calo. Nga cine cine basekelamo mu fyo twabeba, bali no kumona ukuti ca mano ukusangwilako ku kutungilila ubuKristu bwine bwine. Nga tulelondolwela abantu ifyo umulimo wesu utungililwa, ninshi tulelangilila ukuti tulatasha pa mpapulo shesu. Tulangilile fyo twalishiba ukuti palapooswa indalama pa kuti shifume.
4 Nga twalondolola bwino ifya misangulo, abene mayanda abengi balaitemenwa ukwafwilishako umulimo wesu uwacindama. Inshita shimo kuti mwamona ukuti teti ciwame ukulumbula umusangulo, lelo ilingi cisuma ukulumbula ifya misangulo pa kutandala kwa kubalilapo ilyo mwine ng’anda alefwaisha ukubelenga ulupapulo twamushiila.