Inshila Yayanguka iya Kushalikilamo Impapulo Shesu
1 Inshila yayanguka iya kushalikilamo impapulo ukwabula ukulipilisha nomba naibomba umwaka umo. Bushe iyi nshila yalibomba bwino? Amalipoti ya mulimo wa mwi bala yalelangilila ukwingilishiwako kwa mpapulo shonse ishashalikwa. Cine cine abantu abengi balepeelwa ishuko lya ‘kwisa . . . no kubuulapo ica bupe amenshi ya mweo.’—Ukus. 22:17.
2 Nalyo line, tawaba e mulimo wesu, nelyo ukufwaya kwesu, ukulapelaika impapulo ku muntu onse cikulu fye apokelela. Nga filya fine tubomfya mano mano ifikwatwa fyesu, e fyo na kasabankanya umo umo akwata umulimo wa kubomfya bwino impapulo apokelela ukwabula ukulipilisha ukufuma ku Sosaite ukupitila mu cilonganino abamo. Ukupeela impapulo ukwabula ukulipilisha uko Sosaite ipeela kuli bakasabankanya takupilibula ukuti tapapooswa ndalama pa kuti shilembwe no kutwalwa ku bantu. Bonse bafwile ukutasha sana ubucindami ubo impapulo shesu shakwata ku kwafwa abantu ba mitima ya bufumacumi ilyo balefwayafwaya ukwishiba kwine kwine ukukuma kuli Yehova Lesa no Mwana wakwe Yesu Kristu.—Yoh. 17:3.
3 Ni shani fintu Sosaite ikumanisha ukupayanishisha bonse impapulo ukwabula ukulipilisha? Indalama shipooswa pa kupanga impapulo no kutwala ku bantu shifuma ku bupe ubo abantu bapeela. Ababomfi ba kwa Yehova abaipeela ebashingamwa ukutungilila uyu mulimo. Inte sha kwa Yehova tashiya ku cintubwingi ku kulomba ubwafwilisho bwa kwafwa uyu mulimo we pamfya uwa kushimikila pa lwa Bufumu. Tatwatala atulombelesha kabili nangu fye ni nomba tatuya mu kulombelesha indalama ku bantu. Nalyo line, tulatasha pa bupe bunono ubo abantu ba bufumacumi kabili abatasha abo tusanga mwi bala bapeela.
4 Ifyo Ubupe Bwesu Bubomba: E co, cili icalinga ukuti tuleipekanya ukulondolola mu kwipifya kabili bwino bwino ifyo umulimo wa kusambilisha Baibolo uwa mwi sonde lyonse utungililwa no bupe bwa kuitemenwa. Indalama shonse ishipokelelwa shibomfiwa ku fipooswa fishaikulila ifyasanshiwa mu mulimo wa kushimikila pa lwa Bufumu uulecitwa muno nshiku. Fimbi ifyo Sosaite ipoosapo indalama pa kulemba no kwananya impapulo mu calo conse fyaba, kusakamana amaofeshi yanono, amayanda ya Bethel, amasukulu ya batumikishi na bamishonari, bakangalila benda, ififulo fya kwananishishamo impapulo, ne milimo imbi iingi iikabilwa ku kutungilila umulimo wacilapo uo Yesu apeele abasambi bakwe.—Mat. 24:14; 28:19, 20.
5 Ukulunduluka kukalamba ukulecitika pa bantu ba kwa Yehova kwalenga abengi ukwipusha ifyo bengafwilishako. Abengi te kuti baye bakuuleko amaofeshi yapya na Mayanda ya Bufumu nelyo ukuya ku fyalo fya kutali ku kwafwilishako mu mulimo wa kushimikila. Lelo pa kuti bengabombako iyi milimo ya kucincimusha ukufika apapelele amaka yabo, bakasabankanya abengi ne ndupwa shabo lyonse balapaatulako fimo ifyo basangwilako ku mulimo wa mwi sonde lyonse. (Linganyeniko 1 Abena Korinti 16:1, 2.) Muli iyi nshila, imibombele yonse iya Sosaite ilatungililwa, ukubikapo fye no kwananya impapulo. Umuntu nelyo umo tafwile ukumona ubupe bwa kuitemenwa ubupeelwa ku mulimo wa mwi sonde lyonse ngo bubomfiwa fye ku kulemba impapulo.
6 Ilyo twafika pa ng’anda ya muntu nelyo ukuli konse uko tuleshimikila, tufwile ukuipekanya ukulanshanya na bo twasanga ilyashi lya mu Baibolo. Intendekelo shisuma ishingi ishalekanalekana, kumo fye na malyashi yalinga aya mu Baibolo, fyalitubululwa mu citabo ca Ukupelulula Ukufuma mu Malembo. Ukulingana ne fyo umuntu ayankula ku bukombe bwa Bufumu, kasabankanya akamona ifyo engatwalilila ukusosa pa kuti atambike impapulo. Nga mwamona ukuti umuntu mulelandako takwete ubuseko bwa kuti mwamutambika icitabo nelyo ulupapulo lumbi, kuti mwasalapo ukuleka ukulanshanya mu nshila iisuma no kuya pa ng’anda imbi. Nelyo kuti mwafwaya ukusha trakiti nga ca kutila amulaya ukuti ali no kubelenga ubukombe bulimo. Shininkisheni ukuti mwalemba abalangisha ubuseko pa kuti mwingacita icipempu ca kubwelelamo. Kuti mwacita cimo cine na ku muntu uushikwete inshita iya kulanshanya nankwe mu mutima nteka pa mulandu wa kuti napamfiwa nelyo twamutandalila pa nshita iishili bwino kuli wena.
7 Inshila yayanguka iya kushalikilamo impapulo ileafwa umuntu onse ukumona ukuti umulimo wa masomo ya mu Baibolo tawaba bukwebo nangu panono. Ne fwe bene ilatwafwa ukutangishako ubuyo bwesu ubwa kushimikila imbila nsuma ya Bufumu no kupanga abasambi ba kwa Yesu Kristu. Ukupusaninina no tubungwe twaibimba mu “kulombelesha indalama,” Inte sha kwa Yehova balasekelela ilyo balemona ukuti impapulo shashalikwa kuli bonse ukwabula ukubalipilisha. Tatulomba ubupe bwa mulimo wa mwi sonde lyonse ku bashilefwaya ukumfwa ubukombe bwesu. (Moneni Ulupungu lwa kwa Kalinda, ulwa December 1, 1990, amabula 22 na 23.) Ubupe bonse ubupeelwa bubomba ku kutungilila uyu mulimo wa kusambilisha Baibolo mwi sonde lyonse, pantu bonse ababomba uyu mulimo muli uku kuteyanya ni bakabomba bakuitemenwa kabili tabafola nelyo ukulipilwa. Tulanda pa lwa bupe bwa kwafwilisha umulimo wa mwi sonde lyonse kuli abo abatwipusha nelyo abalangisha ubuseko mu mulimo wesu.
8 Ilyo tulelundulula ubutumikishi bwesu mu kupimpa, no kubomfya bwino impapulo shacindama isha Sosaite, Yehova akatwalilila ukutufusha. Abantu ba mitima isuma konse fye balatasha ukulondolola kwesu ukwa mano pa fyo ubutumikishi bwesu bwaba kabili balasekelela ukututungilila ukupitila mu kupeela ubupe bwa kuitemenwa.