Bakabilisha ba Bufumu Bacita Lipoti
‘Ba Nsansa Abali ne Nsala ya ku Mupashi’
YESU asosele ukuti: “Ba nsansa abo abaibukila ulwa kukabila kwabo ukwa ku mupashi.” (Mateo 5:3, NW) Aba musango uyo bakafwaya ifyebo fipeela ubumi ukufuma mu Cebo ca kwa Lesa, Baibolo, kabili ukupokelela uku kwishiba kukabatungulula ku bumi bwa muyayaya.—Mateo 4:4; Yohane 17:3.
◻ Umuntu uwa nsala ya ku mupashi mu calo ca mu Africa aendele amaawala yane mu mpepo kabili mu mfifi pa kuti engakwatako kope wa Icitabo Candi ca Malyashi ya mu Baibolo. Lintu afikile mu mushi umo Inte sha kwa Yehova baleshimikila, alilengelwe insoni icabipisha pa kusanga ukuti icitabo ca kulekeleshako calishalikwe. Aikele muli ulya mushi inshiku shitatu ukufikila ifitabo fyalundwako fyapokelelwe, kabili lyene aali uwa nsansa mu kupelako pa kukwata pa lwakwe ifi fyebo fishaiwamina ifya ku mupashi.
Mu kati ka mweshi untu baikele muli ici icifulo caba ceka, Inte baanenye ifitabo 55, amabroshuwa 365, na bamagazini 145, kabili bapokele ukulembesha 5. Baliseshiwe nga nshi lintu ilyo baleya, bonse abakalamba na bana babilikishe mu lulimi lwa ciKpelle ukuti: “Shi Yehova abe na imwe!” Ukubombesha kulecitwa ukukonkelela ubuseko.
Umuntu na umbi muli ici calo cimo cine na o aali ne nsala ya ku mupashi. Uyu mwanakashi aali kasunga wa cipao ce calici lyakwe kabili umulashi wa fya kusekesha mu citungu cakwe. Lintu Inte bamutandalile, mu kuba ne filamba asumine ukuti icalici lyapelebele nga nshi ukufika pa fifwaikwa fya Baibolo ifya Bwina Kristu. Inte bamulangile ukufuma muli Baibolo wakwe wine ifya kwishiba ubutotelo bwa cine. Lyene asangilwe ku kulongana kubili pa Ŋanda ya Bufumu kabili pa numa asosele ukuti: “Ico nacimona no kuumfwa mu cituntulu cacinshinina ukuti ici e cine.” Alyebekeshiwe no kulongana ne myendele ya basangilweko. Amwene ukuti cintu Inte abamutandalile basosele tacali cintu cimo ico balotele lelo cali icintu cimo ica cine cine. Ukutula ilyo alibuula intampulo ku kuputulako ukwampana kwakwe ne calici, kabili ici califumamo ubunte busuma mu bwikashi.
◻ Kafundisha wacaice uwa katekisimu umwina Melanesia mu New Caledonia aali uwa nsala ya ku mupashi. Asangile kope wa citabo ca Icine Icitungulula ku Bumi bwa Ciyayaya pe tebulo mu ŋanda ya kwa nyina, kabili abelengele ifipandwa 2 na 3. Amalembo ya Baibolo Ukufuma 20:4, 5 na Yohane 4:23, 24 ayalandilwepo mulya yafikile pa mutima wakwe. Mu cilolwa ca fintu aya malembo yasosa, aipwishe shimapepo wakwe umulandu Icalici lya ciKatolika lisuminishisha ukubomfya kwa fipasho mu kupepa. Shimapepo alisengawike icipusho. Umwaume aile ku mabutotelo ya “Bwina Kristu” ayafulilako, lelo tabamupeele ifyasuko fya kwikusha ku fipusho fyakwe. Mu kupelako apingwilepo ukusangwa ku kulongana kwa Nte sha kwa Yehova na nyina, uyo kale kale walangishe ubuseko mu cine. Ukutemwa kuntu amwene pa kati ka Nte ne fisambilisho fyabo ifyashimpwa pali Baibolo fyalimwebekeshe apakalamba nga nshi.
Ukwabula ukusakamana intamfu yalepa, lyonse aleimika bamotoka pa kuya ku kulongana, mu kwangufyanya alibulile ukwiminina ku cine, kabili alibatishiwe. Nomba mubomfi utumikila. Nyina na ba nkashi yakwe babili aba ku mubili nabo bene babele Inte sha kwa Yehova. Uyu mulumendo ashimikile ku ba mukowa wakwe wine kabili alitendeke amasambililo ya Baibolo ayengi. Nomba abengi balesangwa ku kulongana muli ici cifulo—ici conse pa mulandu wa kuti umulumendo amwene icitabo pe tebulo icalelondolola Baibolo, asambilile cene, kabili asendele mu kukatama ifyo asambilile.
Yehova alikwata programu iikalamba iya kuliisha kwa ku mupashi iili mu kubomba ilelo, kabili bacinkupiti balanonkelamo ukufuma muli yene. Esaya mu kulinga aseseme pa lwa yene lintu asosele ukuti: “Moneni, ababomfi bandi bakalya, na imwe [ifilundwa fya butotelo bwa bufi] mukaba ne nsala.” (Esaya 65:13) Tuli ba nsansa nga ca kuti twanonkelamo ukufuma mu kupayanya kwa kwa Yehova ukwa kwikusha insala yesu iya ku mupashi.