Amacalici Yayebelela

“Papa Alubulwisha Icalici.” “Ukulubulwisha Kwakaluka no Kukalukila ubuYuda—Icalici Lilepekanya Ukusumina Icilubo (Mea Culpa).”a “Ukusumina Icilubo ca Kwipayaululwa kwa baYuda.” “BaMethodist Balomba Ubwelelo kuli baNsamya ba ku [masamba ya United States].”

BUSHE mwalibelengapo amalyashi ya musango yo? Cilemoneko kuti libili libili, amacalici yalesumina ukupeelwa umulandu kabili yalelomba ukwelelwa pa fyo yacita pa myanda ya myaka. Ifya kusabankanishishamo ilyashi libili libili filebilisha ukusumina icilubo ukwa kwa Papa ukupya.

Ilyo Papa Alomba Ubwelelo

Pa kati ka 1980 na 1996, John Paul II ‘aishilesumina ifilubo fye Calici ifyabipisha nelyo ukulomba ubwelelo’ pa miku nangu 94, e fyo Luigi Accattoli uulondolola pa fya Vatican asosa mu citabo cakwe ica Quando il papa chiede perdono (Ilyo Papa Alomba Ubwelelo). Accattoli asosa ukuti, “mwi Calici lya Katolika, ni Papa fye eka e wakwata insambu sha kusumina icilubo.” Kabili alicita ici, ukulosha ku fyo baKatolika baacita—inkondo sha mushilo, imbuli, ukwafwilisha budikiteta, amalekano mu macalici, ukukalukila ubuYuda, Ukulubulwisha Kwakaluka, utubungwe twa baMafia, na kapaatulula ka mushobo. Muli kalata watuminwe kuli bashikofu bakalamba mu 1994 (untu bamo bamona nga kalata wakatamisha uwa bupapa), John Paul II atubulwile ukuti kubeko “ukuyebelela kwa mu cinkumbawile kabili ukwa pa membu shacitwa pa makana ya myaka.”

Bashikofu bafulilako balipashanya ica kumwenako ca kwa papa. Mu December 1994 inyunshipepala ya mu Italy iya Il Giornale yashimike ukuti: “Bashikofu abengi abena Amerika balimonekele pa televishoni no kulomba ubwelelo pa cintubwingi.” Mulandu nshi? Pa kucefyako icilubo ca bashimapepo abacenda abana, icatungulula ku konaulwa kwa bacaice abengi abacendwa. Mu January 1995 inyunshipepala ya La Repubblica yashimike pa lwa “kuyebelela ukushatala akucitikapo muli buKatolika bwa nomba”—icilubo ca kwa Papa Pius XII ica kukanacitapo nangu cimo pa lwa kwipayaululwa kwa baYuda calikomailwepo. Mu January 1995 inyunshipepala imo ine yashimike ukuti bashikofu ba ku Germany balombele ubwelelo pa “filubo ifingi” ifyacitwa na baRoma Katolika abayafwilishe bumpulamafunde bwa baNazi. Amacalici yalekanalekana aya ciProtestanti na yo yene yaleilengulula ayene yeka.

Mulandu Nshi uwa Kulombela Ubwelelo?

Baibolo itukoselesha ukulombo bwelelo lintu twalufyanya, kabili abengi balatasha amacalici lintu ayene yailengulula. (Yakobo 5:16) Lelo mulandu nshi amacalici yalecitile ci? Ni shani ici cifwile ukwambukila inshila tuyamwenamo?

[Futunoti]