Ilyashi lya Bakabilisha ba Bufumu

Lesa Alemesha Imbuto mu Alaska

ULUSEKE ulwacepesha ulwashiikama mu mfula yabuuta na mu menshi makaasa lulelolela ukumena. Mu myeshi fye itatu iya lusuba lwa mu Alaska, uluseke lwa kabiki ulwa bukulu bwa mamilimita yatatu kuti pambi lwakula no kufina mupepi na bakilogramu 40! Ee, ici calo kuti cafumya ifilimwa fishaifulila nangu cingati kale abengi balecimona nge calo ca matololo ayaumba kabili aya mpepo ya cipesha amano.

Ifi e filecitika maka maka kwi bala lya ku mupashi ilya mu Alaska. Muli ico calo umo impepo isende inshita iikalamba, Inte sha Yehova shiletwalilila ukutanda imbuto sha Bufumu. Lesa alameshe mbuto mu mitima iyafunda, nga fintu acita na mu ncende shimbi ishe sonde.—1 Abena Korinti 3:6, 7.

● Ilintu ali muli basi we sukulu, Nte wacaice uwe shina lya Vanessa amwene Ann, umwana we sukulu munankwe, uwatemenwe ukwikala eka. Ann alemoneka uwa bulanda, e co Vanessa amwebele ukuti bekale bonse. Banyina balifwile ku bulwele bwa ku mutima, kabili papitile fye inshita iinono, na bawishi balifwile kuli kansa. Te ca kupapa ukuti Ann ali no bulanda! E mulandu wine Ann aleikalila na balupwa mu Alaska.

Pa Cibelushi cimo ilyo Vanessa aleshimikila alitandalile cibusa wakwe umupya no kumushila broshuwa wa Bushe Lesa mu Cituntulu Alatusakamana? Ku sukulu, pali Cimo icakonkelepo Ann afwailishe uko uyu Nte wacaice ali. Nangu cingati Ann ali ne fipusho ifingi ifya mu Baibolo, Vanessa alyaswike. “Ni kwi mupepela?” e fyo Ann aipwishe. Cilya cungulo bushiku Ann aile mu kulongana ku Ng’anda ya Bufumu umuku wa kubalilapo.

Tacapoosele ne nshita pa kuti uyu kashiiwa uwa myaka 17 asange ‘bawishi’ na ‘banyina’ abashaifulila, nga fintu Yesu alaile. (Mateo 19:29) Kabili fintu cali ica kusekelela ukumona Ann uwa nsansa kabili uwalemwentula ukulangisha ukuipeela kwakwe kuli Yehova ukupitila mu lubatisho lwa mu menshi pe Bungano lya Citungu ilya “Inkombe sha Mutende wa Bukapepa”!

● Mu ncende shabela ukutali isha mu citungu cishaikulila ica Alaskan Arctic—icakwata imishi iyatalukana sana pa kati apaba ne fiswebebe—indeke iya mainjini yabili iya Watch Tower Society yalibomfiwa ku kutanda imbuto isha Bufumu mu mishi 150. Lelo ukukula kwa ku mupashi kwashintilila pe sambililo lya lyonse ilya Baibolo ilya kulembeshanya. Apo ku bengi calikosa ukulemba bakalata, kasambilisha wa Baibolo alingile ukuba uwacenjela mu kusambilisha pa kuti umusambi engatwalilila ukusekelela. Ni shani nalimo uyu mulimo wingapwishishiwa?

Kathy atungulwile isambililo lya Baibolo kuli Edna ilyalelunduluka, nangu cingati baikele apatalukene bakilomita ukucila pali 600! Mu cifulo ca kwambula fye ifipusho mu citabo, Kathy alelemba ifipusho pe pepala limbi no kushako incende iya kulembapo ifyasuko. Pa numa Edna alembapo ifyasuko, Kathy pa kubwesha alebikapo ifyebo ifyalekabilwa ku kulondolola icishinka cimo. Kathy alando kuti: “Nalelubulako icungulo bushiku ca pali Citatu kwi ‘sambililo’ lyesu, kabili nalyeseshe ukukakatilako nga fintu nalecita ku masambililo yambi aya Baibolo. Na kabili naletumina Edna enifulupu uwabikwapo sitampa uwalembwapo akeyala kandi. Apantu cisenda imilungu ibili pa kuti bakalata bafike, mu nshila imo isambililo lya kulembeshanya lyamoneke kwati lyalekokola.”

Elenganyeni ukucincimushiwa kwaliko lintu Kathy na Edna bakumene pe bungano lya citungu mu Anchorage pa numa ya myeshi 10 iye sambililo lya kulembeshanya! Na kabili baNte balitemenwe pa kumona abasambi ba Baibolo na bambi abalesekelela abasangilweko abafumine mu mishi yatalukana iya mu Alaska.

Nangu cingati limo limo ukumena kuti pambi kwamoneko kukokola, “banimbo” bamo balamena bwangu lintu basansalikwa ku lubuuto lwa cine. Nga kwakanya pa myaka yonse, bakalumbanya abapya aba kwa Yehova abacila pali 100 e babatishiwa cila mwaka mu Alaska! Tuletila, “Twamutootela mwe Yehova,” pa kumeshe mbuto!