Abasha ba Bantu Nelyo Ababomfi ba kwa Lesa?

“INTE SHA KWA YEHOVA shifwile ukucindikwako kwena.” E fyasosele icitabo ca ciGerman ica Seher, Grübler, Enthusiasten (Abelenganya, Abetetula, Aba Mipepele Bashipelulula). Nangu ca kuti cilalengulula Inte sha kwa Yehova ku cipimo cimo, cisumina ukuti: “Ubwingi bwabo baba abatambalala, te ba cuma sana kabili te bapiina. Baba ababombesha kabili abasakamanishisha mu ncito yabo iya ku mubili, bekashi ba mutende kabili abafumacumi mu kulipila imisonko. Tabakonkelela ifyuma mu kucishamo. . . . Imibele yabo pa mabungano yaliwaminwa ukutasha. Bakwato mupashi wa kuipusula kwati mabumba ya mipepele imbi; lelo ukukuma ku mulimo wa kushimikila baliyacisha yonse. Lelo icabapusanyako sana ku mipepele imbi iya buKristu iya muno nshiku nelyo ibumba caba mupampamina ushinashiwa nangu panono untu ubwingi bwabo baba na o ilyo baleshimikila ififundisho fyabo mu mibele yonse na lintu balolenkene fye no busanso.”a

Te mulandu na mashiwi ya musango yo aya kutasha, fimo ifilandwapo fyesha ukulenga Inte sha kwa Yehova ukumonwa mu nshila yapusanininako fye. Mu fyalo ifingi mwi sonde, Inte sha kwa Yehova shalitwalilila ne mipepele ya shiko pa lwalaala pa makumi ya myaka ukwabula ukupumfyanishiwa. Amamilioni ya bantu balishishiba, balishicindika, no kusumino kuti shalikwata insambu sha maipepele. Lelo, mulandu nshi kwabela ukutwishika cintu Inte sha kwa Yehova shaba?

Nalimo icalenga ukubatwishika nico mu nshita sha ndakai amabumba ya mipepele yaliibimba mu kucenda abana, ukuipaya, no kusansa kwa lukaakala. Kwena, iyi myendele yapumbusa naiseeka, te pa kati fye ka ba fya mapepo. Nangu cibe fyo, abantu bali abalengulula kabili abakaluka ukukuma ku mipepele.

Ubusanso bwa Kukonka Abantu

“Icakaniko” calondololwa nga “ibumba ilikonka icifundisho caibela nelyo intungulushi ya buntunse.” Mu kupalako, abapepa mu “mipepele ya kusefya” batonta “ukuipeelesha ukukalamba ku muntu, itontonkanyo, nelyo icintu.” Icine cine, abapepa mwi bumba lya mipepele ilili lyonse abakakatila ku ntungulushi sha buntunse na matontonkanyo yabo baliba mu busanso bwa kuba abasha ba bantu. Ukwampana kwakosa ne ntungulushi kuti kwafumamo ukushintilila pa bantu lwa ku mupashi na mu nkuntu ukushawama. Ubusanso kuti bwabipilako nga ca kuti umuntu akulila mu mipepele ya cakaniko ukufuma ku bwaice.

Abasakamikwe fyo pa lwa lukuta lwa mapepo lumo bakabila ifyebo fyashintililwapo. Napamo bambi baebwe fyo Inte sha kwa Yehova baba mu mipepele iyo isangula abapepamo ukuba abasha, ukubasunga mu culukusu, ukubatana ubuntungwa, no kubalenga ukuba abantunse bashumfwana na bantu mu bwikashi.

Inte sha kwa Yehova shalishiba ukuti uku kusakamikwa takwalinga. Eco shilemukoselesha ukufwailisha mwe bene. Pa numa ya kulangulukapo ukwasakamanishisha, sondweleleni mwe bene. Bushe Nte basha ba kwa Lesa, nga fintu baitunga, nelyo basha ba bantu? Cinshi caba intulo ya bukose bwabo? Ifipande fibili pa mabula 12-23 fyalaasuka ifi fipusho bwino bwino.

[Futunoti]