Baacitile Ukufwaya kwa kwa Yehova

Yobo Alambulwa Pali Bumpomfu Bwakwe

YOBO aali muntu uwa nkumbu, kaafwa wa bamukamfwilwa, inshiwa, na balanda. (Yobo 29:12-17; 31:16-21) Lyene, mu kupumikisha, aliponenwe no bucushi, alufishe icuma cakwe, abana bakwe, kabili alilwele. Ku ca bulanda, ilyo uyu musambashi uwaleafwilisha abalanda atendeke ukucula ubwafwilisho apokelele bunono. Umukashi wakwe alundilepo no kumwebo kuti “tukeni Lesa, no kufwa.” Na “banankwe” bene Elifasi, Bildadi, na Sofari tabamusansamwishe. Mu cifulo ca ico, batungile ukuti Yobo alibembwike, kabili ukucula kwakwe cali ca nsambu.—Yobo 2:9; 4:7, 8; 8:5, 6; 11:13-15.

Te mulandu no kucula, Yobo atwalilile uwa busumino. Pa mulandu wa ici, Yehova asukile abelela Yobo uluse no kumupaala. Ilyashi lya fintu Yehova acitile lipayanya ubushininkisho kuli bonse ababomfi ba kwa Lesa abekatisha bumpomfu ukuti inshita imo na bo bene bakalambulwa.

Ukwebelwa no Kupuupuutulwa

Mu kubalilapo, Yehova akalipile Elifasi, Bildadi, na Sofari. Pa kulanda na Elifasi, uyo mu kumonekesha aali umukalamba, Yehova atile: “Ubukali bwandi bwaimina iwe na babiyo babili; pantu tamwasoseele ine iciyene, ngo mubomfi wandi Yobo. Awe nomba buuleni utuombe tulume cinelubali na basukusuku cinelubali, muye na fyo ku mubomfi wandi Yobo, mufininike ica kuninika ica imwe, no kuleka Yobo umubomfi wandi amupaapaatile.” (Yobo 42:7, 8) Shi tontonkanyeni muntu ici calolele!

Yehova akambishe Elifasi, Bildadi, na Sofari ukuteyanya ilambo ilikalamba, nakalimo alefwaya beshibe ubukulu bwa lubembu bacitile. Mu cine cine, aba baume mu kwishiba nelyo mu kukanaishiba, balipontele Lesa pa kulando kuti Lesa ‘ku babomfi bakwe tatetekelako’ no kuti taasakamene nampo nga Yobo aali uwa busumino nelyo iyo. Elifasi alundilepo no kulando kuti mu menso ya kwa Lesa, Yobo aali kwati fye cipelebesha! (Yobo 4:18, 19; 22:2, 3) E mulandu wine Yehova alandile ukuti: “Pantu tamwasoseele ine iciyene”!

Lelo te co ceka. Na kabili Elifasi, Bildadi, na Sofari balibembukile Yobo pa kumwebo kuti ukucula kwakwe kwali kwa mayobwele. Pa kumubepesha no kukanamumfwilako uluse balengele Yobo ukukalifiwa no kupopomenwa, ukumulengo kulilishika ati: “Mukafisha lilali pa kulengo mutima wandi ubulanda, no kumfwanta ku fyebo?” (Yobo 10:1; 19:2) Elenganyeni aba baume batatu ifyo baumfwile insoni lintu baisa kuli Yobo ne ca kuninika ica pa membu shabo.

Lelo Yobo taali no kusekelela pa kuseebana kwabo. Mu cine cine, Yehova aebele Yobo ukupepelako aba balemupeele milandu. Yobo acitile ifyo fine, kabili pali ici alipaalilwe. Mu kubalilapo, Yehova aundepe ubulwele bwakwe ubwabipisha. Lyene, bamunyina, inkashi shakwe, na balebishanya nankwe kale baishile ku kumusansamusha, kabili “umuntu onse amupeele ulwa golde lumo, kabili umuntu onse inindamunwe ya golde.”a Mu kulundapo, Yobo “akwete impaanga ne mbushi amakana ikumi na yane [14,000], ne ngamali amakana mutanda [6,000], ne ŋombe shilume isha makoli ikana limo shibili shibili [1,000], ne mpunda nkota ikana limo [1,000].”b Kabili mu kumonekesha Yobo aliwikishenye no mukashi wakwe. Mu kupita kwa nshita, Yobo alipaalilwe mu kuba na bana baume 7 na bana banakashi batatu, kabili aishilemonako inkulo shine isha bufyashi bwakwe.—Yobo 42:10-17.

Ifyo Twingasambililako

Yobo aimike ica kumwenako cisuma ku babomfi ba kwa Lesa aba muno nshiku. Yobo aali “uwa mpomfu kabili uwatambalala,” umuntu uo Yehova aumfwilepo ne cilumba ica kumwita “umubomfi wandi.” (Yobo 1:8; 42:7, 8) Nangu cibe fyo, ici tacilolele mu kuti, Yobo aali uwapwililika. Pa nshita imo lintu aali mu mesho, abeepeshe Lesa ukuti e wamuleteele ubucushi. Alundilepo no kusuusha inshila intu Lesa abombelamo na bantu. (Yobo 27:2; 30:20, 21) Kabili aliilungamike mu cifulo ca kulungamika Lesa. (Yobo 32:2) Nalyo line Yobo alikeene ukufutatila Kalenga wakwe, kabili mu kuicefya alipokelele ukulungika ukufuma kuli Lesa. Asumine ukuti: “Nalandile no kukanailuka, ni pali ici ndeisuulila, no kulapila mu lukungu ne mito.”—Yobo 42:3, 6.

Lintu twaba mu mesho nalimo na ifwe bene kuti twatontonkanya, ukulanda, nelyo ukucita ifintu ifishilingile. (Linganyeniko Lukala Milandu 7:7.) Nangu ni fyo, nga twalitemwisha Lesa, tatwakapondokele nelyo ukufulilwa Lesa pa mulandu wa kuti nasuminisho kuti tupite mu bucushi. Mu cifulo ca ico, tukekatisha bumpomfu bwesu tukasuke atulobolola ipaalo ilikalamba. Pa lwa kwa Yehova, kemba wa malumbo atile: “Ku wa bucishinka, mukaba aba bucishinka.”—Ilumbo 18:25, NW.

Ilyo Yobo ashilapuupuutulwa, Yehova amwebele ukupepelako abamubembukile. Mwandi ici ca kumwenako icisuma kuli ifwe! Ilyo imembu shesu tashilalekelelwa, Yehova afwayo kuti tulekelele abatubembukila. (Mateo 6:12; Abena Efese 4:32) Nga tatulefwaya ukulekelela bambi lintu cili icalinga ukucite fyo, bushe kuti twaenekela Yehova ukutubelelo luse?—Mateo 18:21-35.

Mu nshita mu nshita ifwe bonse tulapita mu mesho. (2 Timote 3:12) Nalyo line, ukupala Yobo kuti twaikatisha bumpomfu. Nga twacite fyo, tukalobolola icilambu icikalamba. Yakobo alembele ukuti: “Moneni, tuletila balishuka abashipikisha; mwalyumfwo kushipikisha kwa kwa Yobo, kabili mwalimwene ukupanga kwa kwa Shikulu, kwa kuti Shikulu wa luse ulwingi kabili wa congwe.”—Yakobo 5:11.

[Amafutunoti]